ଓ୍ବାଶିଂଟନ, ୨୬।୮: ଭାରତ ପାଇଁ ଏସିଆନ ଆଥଲେଟିକ୍ସ ଚାମ୍ପିୟନଶିପ୍ରେ ବ୍ରୋଞ୍ଜ ପଦକ ଜିତିଥିବା ଆଥ୍ଲେଟ୍ ଇକ୍ବାଲ ସିଂ ନିଜ ସ୍ତ୍ରୀ ଓ ମା’ଙ୍କୁ ହତ୍ୟା କରିଥିବା ମାମଲାରେ ଆମେରିକାରେ ଗିରଫ ହୋଇଛନ୍ତି। ଆମେରିକାର ଏକ ଗଣମାଧ୍ୟମରେ ପ୍ରକାଶିତ ରିପୋର୍ଟ ମୁତାବକ, ପେନ୍ସିଲଭାନିଆର ଡେଲ୍ଓ୍ବାରରେ ରହୁଥିବା ୬୨ ବର୍ଷୀୟ ଇକ୍ବାଲ ପୋଲିସକୁ ଡାକି ନିଜ ଅପରାଧ ସ୍ବୀକାର କରିଛନ୍ତି। ଏହି ରିପୋର୍ଟରେ କୁହାଯାଇଛି ଯେ, ଯେତେବେଳେ ନ୍ୟୁଟାଉନ ଟାଉନଶିପ୍ସ୍ଥିତ ଇକ୍ବାଲଙ୍କ ବାସଭବନରେ ପୋଲିସ ପହଞ୍ଚିଥିଲା ସେତେବେଳେ ଦେଖିଥିଲା ଯେ ଇକ୍ବାଲ ନିଜକୁ ଆଘାତ ଦେଇ ରକ୍ତ ଜୁଡ଼ୁବୁଡୁ ଅବସ୍ଥାରେ ଥିଲେ। ତାଙ୍କ ସ୍ତ୍ରୀ ଓ ମା’ଙ୍କ ମୃତ ଦେହ ଘର ଭିତରେ ପଡ଼ିଥିଲା। ଏହି ହତ୍ୟା ମାମଲାରେ ଇକ୍ବାଲଙ୍କ ନାମରେ ମାମଲା ରୁଜୁ କରାଯାଇଛି ଏବଂ ତାଙ୍କୁ ହାଜତରେ ରଖାଯାଇଛି। ଯେତେତୁ ସେ ନିଜ ଦୋଷ ସ୍ବୀକାର କରିନେଇଛନ୍ତି ତେଣୁ ତାଙ୍କ ଜାମିନ ନାମଞ୍ଜୁର ହୋଇଥିଲା। ନିଜର ପକ୍ଷ ଉପସ୍ଥାପନ କରିବା ଲାଗି ଇକ୍ବାଲ କୌଣସି ଓକିଲଙ୍କ ସହାୟତା ନେଇ ନ ଥିବା ଜଣାପଡ଼ିଛି। ଆହତ ଇକ୍ବାଲଙ୍କୁ ଏବେ ହସ୍ପିଟାଲରେ ଚିକିତ୍ସିତ କରାଯାଉଛି। ଏଠାରେ ଉଲ୍ଲେଖଯୋଗ୍ୟ, ଇକ୍ବାଲ ଜଣେ ଶଟ୍ପୁଟ ଆଥ୍ଲେଟ୍ ଥିଲେ। ୧୯୮୩ରେ କୁଏତରେ ଅନୁଷ୍ଠିତ ଏସିଆନ୍ ଆଥ୍ଲେଟିକ୍ସ ଚାମ୍ପିୟନଶିପ୍ରେ ସେ ବ୍ରୋଞ୍ଜ ପଦକ ଜିତିଥିଲେ। ଏହାପରେ ସେ ଆମେରିକାରେ ରହିବାକୁ ସ୍ଥିର କରିଥିଲେ। ରିପୋର୍ଟ ମୁତାବକ ସେଠାରେ ସେ କ୍ୟାବ୍ ଡ୍ରାଇଭର ଭାବେ କାମ କରୁଥିଲେ।
