ନୂଆଦିଲ୍ଲୀ,୧।୧୦ : ଅଭିଜ୍ଞ ଭାରତୀୟ ପୁରୁଷ ହକି ଷ୍ଟ୍ରାଇକର ଏସ୍.ଭି. ସୁନୀଲ ଶୁକ୍ରବାର ଅବସର ଘୋଷଣା କରିଛନ୍ତି। ଏଥିସହ ଦୀର୍ଘ ୧୪ ବର୍ଷ କ୍ୟାରିୟରର ଅନ୍ତ ହୋଇଛି। ୨୦୧୪ ଏସିଆନ ଗେମ୍ସରେ ସ୍ବର୍ଣ୍ଣ ପଦକ ଜିତିଥିବା ଭାରତୀୟ ଦଳର ସେ ସଦସ୍ୟ ଥିଲେ। ଦୁଇ ଦିନ ମଧ୍ୟରେ ତୃତୀୟ ଭାରତୀୟ ଖେଳାଳି ଭାବେ ସୁନୀଲ ଅବସର ନେଇଛନ୍ତି। ଗୁରୁବାର ଡ୍ରାଗ ଫ୍ଲିକର ରୂପିନ୍ଦର ପାଲ ସିଂ ଓ ଅଭିଜ୍ଞ ଡିଫେଣ୍ଡର ବୀରେନ୍ଦ୍ର ଲାକ୍ରା ମଧ୍ୟ ଅବସର ଘୋଷଣା କରିଥିଲେ।
କର୍ନାଟକରୁ ଆସିଥିବା ୩୨ ବର୍ଷୀୟ ସୁନୀଲ ଟୋକିଓ ଅଲିମ୍ପିକ୍ସ ପାଇଁ ଭାରତୀୟ ଦଳରେ ସ୍ଥାନ ପାଇ ନ ଥିଲେ। ସୁନୀଲ ଭାରତ ପାଇଁ ୨୬୪ଟି ମ୍ୟାଚ୍ ଖେଳି ମୋଟ ୭୨ ଗୋଲ ସ୍କୋର କରିଛନ୍ତି।
ତାଙ୍କ ପରିବାର ସେତେଟା ସ୍ବଚ୍ଛଳ ହୋଇ ନ ଥିବା ବେଳେ ସେ ପ୍ରଥମେ ବାଉଁଶ ବାଡିରେ ହକି ଖେଳିବା ଆରମ୍ଭ କରିଥିଲେ ବୋଲି ନିଜ ଟୁଇଟର ହ୍ୟାଣ୍ଡଲରେ ଉଲ୍ଲେଖ କରିଛନ୍ତି। ଅବସର ସଂକ୍ରାନ୍ତରେ ନିଷ୍ପତ୍ତି ନେବା ସେତେଟା ସହଜ ନ ଥିଲା। ଅଲିମ୍ପିକ୍ସ ଦଳରେ ସ୍ଥାନ ପାଇ ନ ଥିବାରୁ ଏହି ନିଷ୍ପତ୍ତି ନେବା ସେତେଟା କଷ୍ଟକର ମଧ୍ୟ ନ ଥିଲା। ଅଲିମ୍ପିକ୍ସ ଦଳରୁ ବାଦ୍ ପଡିବା ପରେ ମୋ ଭବିଷ୍ୟତ ନେଇ ପ୍ରଶ୍ନବାଚୀ ସୃଷ୍ଟି ହୋଇଥିଲା। ୨୦୨୪ ପ୍ୟାରିସ ଅଲିମ୍ପିକ୍ସକୁ ଆଉ ୩ ବର୍ଷ ବାକିଥିବା ବେଳେ ଯୁବ ଖେଳାଳିଙ୍କୁ ନେଇ ଏକ ଶକ୍ତିଶାଳୀ ଦଳ ଗଠନ କରିବାର ଆବଶ୍ୟକତା ରହିଛି ବୋଲି ସୁନୀଲ କହିଛନ୍ତି
