ଅଗରତାଲା,୧୦।୧୨ : ପୂର୍ବତନ ଉଗ୍ରବାଦୀ ନେତା ଡାନିଏଲ ବୋରାକ ତାଙ୍କ ଦଳର ଅନ୍ୟ ୨୯ ଜଣ ସଦସ୍ୟଙ୍କ ସହ ଭାଜପାରେ ଯୋଗ ଦେଇଛନ୍ତି। ଭାଜପାର ଆଦିବାସୀ ଫ୍ରଣ୍ଟରେ ଯୋଗଦେବା ଅବସରରେ ତ୍ରିପୁରା ଭାଜପା ରାଜ୍ୟ ଅଧ୍ୟକ୍ଷ ରାଜୀବ ଭଟ୍ଟାଚାର୍ଯ୍ୟ ମଧ୍ୟ ଉପସ୍ଥିତ ଥିଲେ। ଏହା ସହିତ ଭାଜପାର ଆଦିବାସୀ ୱିଙ୍ଗର ରାଜ୍ୟ ଅଧ୍ୟକ୍ଷ ବିକାଶ ଦେବଶର୍ମା ଏବଂ ଉପାଧ୍ୟକ୍ଷ ପାଟାଲ କାନିଆ ଜମାତିଆ ମଧ୍ୟ ଉପସ୍ଥିତ ଥିଲେ। ସୂଚନାଯୋଗ୍ୟ, ଖୁବ ଶୀଘ୍ର ରାଜ୍ୟରେ ବିଧାନସଭା ନିର୍ବାଚନ ହେବାକୁ ଥିବାରୁ ଡାନିଏଲ ବୋରାକ ଭାଜପାରେ ଯୋଗ ଦେଇଛନ୍ତି।
ପରେ ଗଣମାଧ୍ୟମ ପ୍ରତିନିଧିମାନଙ୍କ ସହ କଥାବାର୍ତ୍ତା କରି ଡାନିଏଲ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ତ୍ରିପୁରା ମୁଖ୍ୟମନ୍ତ୍ରୀ ଡ ମାଣିକ ସାହାଙ୍କ କାର୍ଯ୍ୟରେ ସେ ଅନୁପ୍ରାଣିତ ହୋଇ ଭାଜପାରେ ଯୋଗ ଦେବାକୁ ନିଷ୍ପତ୍ତି ନେଇଛନ୍ତି। ସେମାନେ ତ୍ରିପୁରାରେ ଆଦିବାସୀ ଲୋକଙ୍କ ବିକାଶ ପାଇଁ କାର୍ଯ୍ୟ କରୁଛନ୍ତି। ନିଷିଦ୍ଧ ଘୋଷିତ ଏନଏଲଏଫଟି ର ପୂର୍ବତନ ନେତା ଡାନିଏଲ କହିଛନ୍ତି ଯେ ସେ ତ୍ରିପୁରା ୟୁନାଇଟେଡ ଇଣ୍ଡିଜେନସ ରିଟର୍ନ ପିପୁଲ୍ସ କାଉନସିଲ ପାଇଁ କାର୍ଯ୍ୟ କରୁଛନ୍ତି। ଏହା ଆତ୍ମସମର୍ପଣ କରିଥିବା ଉଗ୍ରବାଦୀ, ସହଯୋଗୀ ତଥା ସେମାନଙ୍କ ପରିବାର ସଦସ୍ୟଙ୍କ କଲ୍ୟାଣ ପାଇଁ କାର୍ଯ୍ୟ କରୁଛି।
