ନୂଆଦିଲ୍ଳୀ,୧୬।୧୧: ସେମିଫାଇନାଲ ମ୍ୟାଚରେ ନ୍ୟୁଜିଲ୍ୟାଣ୍ଡକୁ ୭୦ ରନରେ ପରାସ୍ତ କରି ଭାରତୀୟ କ୍ରିକେଟ ଦଳ ଫାଇନାଲରେ ପ୍ରବେଶ କରିଛି। ବର୍ତ୍ତମାନ ରୋହିତ ଶର୍ମାଙ୍କ ନେତୃତ୍ୱରେ ଟିମ ଇଣ୍ଡିଆ ବିଶ୍ୱ ଚାମ୍ପିୟନ ହେବାଠାରୁ ମାତ୍ର ଗୋଟିଏ ପାଦ ଦୂରରେ। ମୁମ୍ବାଇର ୱାଙ୍ଖଡେ ଷ୍ଟାଡିୟମରେ ଅନୁଷ୍ଠିତ ଏହି ସେମିଫାଇନାଲ ମ୍ୟାଚ ପରେ ଲୋକମାନେ ଅଧିକାଂଶ ସମୟରେ ବିରାଟ କୋହଲି, ମହମ୍ମଦ ଶାମି ଏବଂ ଶ୍ରେୟସ ଆୟରଙ୍କ ବିଷୟରେ ଆଲୋଚନା କରୁଛନ୍ତି, କାରଣ ବିରାଟ ଏହି ମ୍ୟାଚରେ ତାଙ୍କ ଦିନିକିଆ କ୍ୟାରିୟରର ୫୦ ତମ ଶତକ ପୂରଣ କରିଥିଲେ ମହମ୍ମଦ ଶାମି ୭ଟି ଉଇକେଟ୍ ନେଇ ଭାରତ ପାଇଁ ବିଶ୍ୱକପ ଇତିହାସରେ ସର୍ବୋତ୍ତମ ପ୍ରଦର୍ଶନ କରିଥିଲେ ଏବଂ ଶ୍ରେୟାସ ଆୟର ମଧ୍ୟ ୭୦ ବଲରେ ୧୦୫ରନର ଚମତ୍କାର ଇନିଂସ ଖେଳିଥିଲେ।
ଏହି କାରଣରୁ ଏହି ତିନି ଖେଳାଳିଙ୍କୁ ନେଇ ଅନେକ ଆଲୋଚନା ହେଉଛି, କିନ୍ତୁ ଇଂଲଣ୍ଡର ପୂର୍ବତନ ଅଧିନାୟକ ନାସିର ହୁସେନ୍ଙ୍କ ଅନୁଯାୟୀ ଟିମ ଇଣ୍ଡିଆର ପ୍ରକୃତ ହିରୋ ଅନ୍ୟ କେହି। ସ୍କାଏ ସ୍ପୋର୍ଟସ ସହିତ କଥାବାର୍ତ୍ତା ବେଳେ ଏହି ପୂର୍ବତନ ଇଂଲଣ୍ଡ ବ୍ୟାଟ୍ସମ୍ୟାନ କହିଛନ୍ତି, ଆସନ୍ତାକାଲି ବିରାଟ କୋହଲି, ଶ୍ରେୟସ ଆୟର ଏବଂ ମହମ୍ମଦଶାମିଙ୍କ ବିଷୟରେ ହେଡଲାଇନ ପ୍ରକାଶ ପାଇବ, କିନ୍ତୁ ଏହି ଟିମ ଇଣ୍ଡିଆର ପ୍ରକୃତ ହିରୋ ଏବଂ ପ୍ରକୃତ ବ୍ୟକ୍ତି ସିଏ ହେଉଛନ୍ତି ରୋହିତ ଶର୍ମା ଯିଏ ଦଳର ସଂସ୍କୃତି ବଦଳାଇଛନ୍ତି।
ବାସ୍ତବରେ ରୋହିତ ଶର୍ମା ଏହି ବିଶ୍ୱକପରେ ନିଜର ଚମତ୍କାର ଅଧିନାୟକତ୍ୱ ଏବଂ ଉତ୍କୃଷ୍ଟ ବ୍ୟାଟିଂ ସହିତ ଟିମ ଇଣ୍ଡିଆକୁ ଭଲ ସ୍ଥାନରେ ରଖିଛନ୍ତି। ଟିମ ଇଣ୍ଡିଆ ଏହି ବିଶ୍ୱକପରେ ଏପର୍ଯ୍ୟନ୍ତ ସମସ୍ତ ୧୦ଟି ମ୍ୟାଚ ଜିତି ଫାଇନାଲରେ ପ୍ରବେଶ କରିଛି। ଉଭୟ ଅଧିନାୟକ ତଥା ବ୍ୟାଟ୍ସମ୍ୟାନ ଭାବରେ ଏହି ଉଜ୍ଜ୍ୱଳ ପ୍ରଦର୍ଶନ ପଛରେ ରୋହିତ ଶର୍ମା ଏକ ପ୍ରମୁଖ ଭୂମିକା ଗ୍ରହଣ କରିଛନ୍ତି।
