ଥୁଆମୂଳ ରାମପୁର,୨୩।୨ (ଦୁର୍ଗା କୀର୍ତ୍ତି): ଜଙ୍ଗଲ ହେଉଛି ପ୍ରକୃତିର ଅମୂଲ୍ୟ ବରଦାନ ଏବଂ ଏହାର ସୁରକ୍ଷା ଆମ ସମସ୍ତଙ୍କର ନୈତିକ ଦାୟିତ୍ୱ। ବିଶେଷକରି ଶୁଷ୍କ ଋତୁରେ ବନାଗ୍ନି ବା ଜଙ୍ଗଲ ନିଆଁ ପରିବେଶ ପାଇଁ ସବୁଠାରୁ ବଡ଼ ଶତ୍ରୁ ପାଲଟିଥାଏ। ଏହି ସମସ୍ୟାର ମୁକାବିଲା ପାଇଁ କଳାହାଣ୍ଡି ଜିଲା ଥୁଆମୂଳ ରାମପୁର ଦକ୍ଷିଣ ବନାଞ୍ଚଳ ପକ୍ଷରୁ ସୋମବାର କୋଷାବରା ସ୍ଥିତ ‘ହେଲୋ ପଏଣ୍ଟ’ଠାରେ ଏକ ସଚେତନତା ଶିବିର ଅନୁଷ୍ଠିତ ହୋଇଯାଇଛି। କଳାହାଣ୍ଡି ଦକ୍ଷିଣ ବନଖଣ୍ଡ ଡିଏଫଓ (DFO)ଙ୍କ ନିର୍ଦ୍ଦେଶକ୍ରମେ ଆୟୋଜିତ ଏହି ସଭାରେ ବନ ବିଭାଗ ଓ ଅଗ୍ନିଶମ ବାହିନୀ ମିଳିତ ଭାବେ ସାମିଲ ହୋଇ ଜନସାଧାରଣଙ୍କୁ ସଚେତନ କରିଥିଲେ। ପଡୁଚାଷ ଓ ଜଙ୍ଗଲରେ ଅସାବଧାନତା ବଶତଃ ଲାଗୁଥିବା ନିଆଁକୁ କିଭଳି ରୋକାଯାଇପାରିବ, ସେ ନେଇ ବିସ୍ତୃତ ଆଲୋଚନା କରାଯାଇଥିଲା। “ଜଙ୍ଗଲ ସୁରକ୍ଷା ହିଁ ଜୀବନ ରକ୍ଷା” ବାର୍ତ୍ତା ସହ ବନ୍ୟପ୍ରାଣୀଙ୍କୁ ନିଆଁ ଦାଉରୁ ରକ୍ଷା କରିବା ପାଇଁ ଉପସ୍ଥିତ ସମସ୍ତଙ୍କୁ ଶପଥ ପାଠ କରାଯାଇଥିଲା।
କାର୍ଯ୍ୟକ୍ରମରେ ବନାଞ୍ଚଳ ଅଧିକାରୀ ତ୍ରିନାଥ ସେଠୀ, ଡେପୁଟି ରେଞ୍ଜର ସୋଇରେନ୍ଦ୍ରି ବାଗ, କଲମପୁର ସେକ୍ସନ ବନପାଲ୍ ଅରୁଣ କୁମାର ହରିଚନ୍ଦନ ଏବଂ ଥୁଆମୂଳ ରାମପୁର ବନପାଲ୍ ଏକାଦଶୀ ନାଏକ ପ୍ରମୁଖ ଉପସ୍ଥିତ ରହି ମାର୍ଗଦର୍ଶନ କରିଥିଲେ। ଅଗ୍ନିଶମ ବିଭାଗର ଫାୟାର ଫାଇଟର ମଦନ ମୋହନ ଶବର, ଏସ.ଏ.ଆର ରେହେମନ୍, ରଜତ କୁମାର ବରାଳ ଓ ଦିବ୍ୟ ରଞ୍ଜନ ସାହୁଙ୍କ ଦ୍ୱାରା ଏକ ପ୍ରଦର୍ଶନୀ (ମକ୍-ଡ୍ରିଲ୍) ମାଧ୍ୟମରେ ନିଆଁକୁ ଆୟତ୍ତ କରିବାର କୌଶଳ ଦେଖାଯାଇଥିଲା। ଏହି ଅଭିଯାନରେ ବନରକ୍ଷୀ ସୁଧାଂଶୁ ଶେଖର ସାହୁ, ସୁଚିତ୍ରା କୁମାର ପ୍ରଧାନ, ଅଶୋକ କୁମାର ସାହୁ ଏବଂ କୁମାରୀ ରଞ୍ଜିତା ଖଡିଆ ସକ୍ରିୟ ସହଯୋଗ କରିଥିଲେ। ‘ଆମ ଜଙ୍ଗଲ ଯୋଜନା’ର ଟିମ୍ ଲିଡର ନୀଳାମ୍ବର ନାଏକ ମଞ୍ଚ ପରିଚାଳନା କରିଥିବା ବେଳେ ସତ୍ୟ ନାରାୟଣ ପାଣିଗ୍ରାହୀ ଓ ଅନ୍ୟାନ୍ୟ କର୍ମଚାରୀମାନେ ଉପସ୍ଥିତ ଥିଲେ। ତେବେ ଏହି ସଚେତନତା ଶିବିରକୁ ନେଇ କିଛି ସ୍ଥାନୀୟ ଅଭିଯୋଗ ମଧ୍ୟ ସାମ୍ନାକୁ ଆସିଛି। ଅଞ୍ଚଳବାସୀଙ୍କ କହିବା ଅନୁଯାୟୀ, ଜଙ୍ଗଲ ସୁରକ୍ଷା ଭଳି ଏକ ସମ୍ବେଦନଶୀଳ ପ୍ରସଙ୍ଗରେ ବହୁ ସଂଖ୍ୟକ ଲୋକଙ୍କୁ ସାମିଲ କରାଯିବା କଥା, ମାତ୍ର କାର୍ଯ୍ୟକ୍ରମଟି କେବଳ ହାତଗଣତି କିଛି ଲୋକଙ୍କ ମଧ୍ୟରେ ସୀମିତ ରହିଥିଲା। ଏତେ କମ୍ ଉପସ୍ଥିତିରେ ବାସ୍ତବିକ ସଚେତନତା ସବୁ ସ୍ତରରେ ପହଞ୍ଚିପାରିବ କି ବୋଲି ପ୍ରଶ୍ନବାଚୀ ସୃଷ୍ଟି ହୋଇଛି। ବିଭାଗ ନିଜକୁ ସୁସଜ୍ଜିତ ବୋଲି ଦାବି କରୁଥିଲେ ହେଁ, ଜନସାଧାରଣଙ୍କ ପୂର୍ଣ୍ଣ ସହଯୋଗ ବିନା ବନାଗ୍ନିକୁ ରୋକିବା ଏକ ବଡ଼ ଆହ୍ୱାନ ହୋଇ ରହିଛି।
