ଛେଣ୍ଡିପଦା,୨୧।୪(ସ୍ବ.ପ୍ର.): ହୁ ହୁ ହୋଇ ଜଳୁଛି ଜଙ୍ଗଲ। ନିଆଁର ଆଁରେ ପୋଡ଼ି ପାଉଁଶ ହୋଇଚାଲିଛି ମୂଲ୍ୟବାନ ବନ୍ୟ ସମ୍ପଦ। ବହୁ ଜୀବଜନ୍ତୁଙ୍କ ଜୀବନହାନି ଆଶଙ୍କା ମଧ୍ୟ କରାଯାଉଛି। ହେଲେ ଏହାକୁ କିପରି ଆୟତ୍ତ କରାଯିବ ସେ ଦିଗରେ ତତ୍ପରତା ପ୍ରକାଶ କରୁନି ବନ ବିଭାଗ। ଫଳରେ ଅଧିକରୁ ଅଧିକ ବ୍ୟାପୁଥିବା ଏହି ଜଙ୍ଗଲ ନିଅଁା ଆଗାମୀ ଦିନରେ ସ୍ଥାନୀୟ ଅଞ୍ଚଳବାସୀଙ୍କ ପାଇଁ ଭୟଙ୍କର ସ୍ଥିତି ସୃଷ୍ଟି କରିପାରେ ବୋଲି କୁହାଯାଉଛି।
ଅନୁଗୋଳ ଜିଲା ଛେଣ୍ଡିପଦା ବନାଞ୍ଚଳର ପାତ୍ରପଡାରୁ ଶିମିଳିପାଳକୁ ଲମ୍ବିଥିବା ଦେବୀନଗର ପାହାଡ଼ କିଛିଦିନ ହେବ ଜଳୁଛି। ଜଙ୍ଗଲରେ ନିଆଁ କିପରି ଲାଗିଲା ତାହା ଜଣାପଡ଼ି ନ ଥିଲେ ମଧ୍ୟ ଏହା ସାଧାରଣ ଭାବେ ମନୁଷ୍ୟକୃତ ବୋଲି ଅନୁମାନ କରାଯାଉଛି। କାରଣ ମହୁଲ ଫୁଲ, ଶାଳପତ୍ର ଓ ବିଭିନ୍ନ ଜଙ୍ଗଲଜାତ ଦ୍ରବ୍ୟ ସଂଗ୍ରହକାରୀମାନଙ୍କ ଦ୍ୱାରା ଅନେକ ସମୟରେ ଜଙ୍ଗଲରେ ନିଆଁ ଲଗାଯାଉଥିବା ଦେଖାଯାଇ ଆସିଛି। ତେଣୁ ଏଠାରେ ସେପରି କିଛି ଘଟଣା ଘଟିଥାଇପାରେ ବୋଲି ଚର୍ଚ୍ଚା ହେଉଛି। ଦେବୀନଗର ପାହଡ଼ ଓ ଏହାର ପାଦ ଦେଶରେ ଥିବା ଜଙ୍ଗଲରେ ନିଆଁ ଲାଗିବା ଦ୍ୱାରା ବହୁ ଔଷଧୀୟ ବୃକ୍ଷ, ଲତା, ଗୁଳ୍ମ ପୋଡ଼ିଗଲାଣି। ଜୀବଜନ୍ତୁ, କୀଟପତଙ୍ଗ, ସରୀସୃପଙ୍କ ଜୀବନହାନି ହେଲାଣି। ଅନେକ ବନ୍ୟଜନ୍ତୁ ଜୀବନ ବଞ୍ଚାଇବା ଲାଗି ଜନବସତି ଅଞ୍ଚଳକୁ ଚାଲି ଆସୁଛନ୍ତି। ସେହିପରି ନିଆଁ ଧାସ ସ୍ଥାନୀୟ ଅଞ୍ଚଳର ତାପମାତ୍ରା ବୃଦ୍ଧିର କାରଣ ହୋଇଥିବାବେଳେ ଧୂଆଁ ଅଣନିଃଶ୍ୱାସୀ ପରିସ୍ଥିତି ସୃଷ୍ଟି କରୁଛି। ଏଥିସହିତ ଜଙ୍ଗଲ ନିକଟବର୍ତ୍ତୀ ଗ୍ରାମରେ ଚାଷୀ କରିଥିବା ଫସଲ କ୍ଷତି ହେବାର ସମ୍ଭାବନା ରହିଛି। ଏପରିକି ବନ ସଂରକ୍ଷଣ ସମିତି ଓ ବନ ବିଭାଗ ମଧ୍ୟରେ ଆବଶ୍ୟକ ସମନ୍ବୟ ରହୁ ନ ଥିବାରୁ ଏହି ନିଅଁାକୁ ଆୟତ୍ତ କରାଯାଇ ପାରୁ ନ ଥିବା ଅଭିଯୋଗ ହେଉଛି।
ଆୟତ୍ତ ଉଦ୍ୟମ ଜାରି ରହିଛି
ଜଙ୍ଗଲ ନିଆଁ ଆୟତ୍ତ କରିବା ପାଇଁ କର୍ମଚାରୀମାନଙ୍କୁ ନିୟୋଜିତ କରାଯାଇଛି। ହେଲେ ସ୍ଥାନୀୟ ବନ ସରଂକ୍ଷଣ ସମିତିଗୁଡିକର ସହଯୋଗ ମିଳିପାରୁ ନାହିଁ। ଏହାଛଡ଼ା ଉକ୍ତ ଜଙ୍ଗଲରେ ହାତୀଙ୍କ ଚଳପ୍ରଚଳ ଥିବାରୁ ଭିତରକୁ ପଶି ତୁରନ୍ତ ନିଆଁ ଲିଭାଇବା ସମ୍ଭବ ହେଉନାହିଁ। ହାତୀପଲଙ୍କ ଗତିବିଧିକୁ ଲକ୍ଷ୍ୟ କରାଯାଇ କର୍ମଚାରୀମାନେ ଉଦ୍ୟମ ଜାରି ରଖିଛନ୍ତି।
-ପ୍ରତାପ ଚନ୍ଦ୍ର ରାଉଳ, ବନାଞ୍ଚଳ ଅଧିକାରୀ
ସମନ୍ବୟର ଅଭାବ ଦେଖାଦେଇଛି
ବନ ବିଭାଗର ଅପାରଗତା ପାଇଁ ଦେବୀନଗର ଜଙ୍ଗଲରୁ ନିଆଁ ଲିଭିପାରୁ ନାହିଁ। ଜଙ୍ଗଲକୁ ନିଆଁ ଦାଉରୁ ରକ୍ଷା କରିବା ନିମନ୍ତେ ବନ ସଂରକ୍ଷଣ ସମିତି ଓ ବନବିଭାଗ ମଧ୍ୟରେ ସମନ୍ବୟ ରହୁନାହିଁ। ଏହି କାରଣରୁ ପରିସ୍ଥିତି ଧୀରେ ଧୀରେ ନିୟନ୍ତ୍ରଣ ବାହାରକୁ ଚାଲିଯାଉଛି।
-ବିଜୟ କୁମାର ପ୍ରଧାନ, ସଭାପତି, ଜୟ ଜଗନ୍ନାଥ ବନସଂରକ୍ଷଣ ସମିତି
ତଦାରଖ କରାଯାଉ ନାହିଁ
ଜଙ୍ଗଲ ମଧ୍ୟରେ କରାଯାଉଥିବା ଜଳାଶୟ ଯୋଜନାର ସୁଫଳ ମିଳୁନାହିଁ। ଠିକ୍ ଭାବେ ଫାୟାର ଲାଇନ କରା ନ ଯିବା ଓ ନିଆଁ ଲିଭାଇବା ପାଇଁ ବନ ବିଭାଗ ପକ୍ଷରୁ କର୍ମଚାରୀ ମୁତୟନ କରାଗଲେ ମଧ୍ୟ ଏହାର ତଦାରଖ କରାଯାଉ ନାହିଁ। ଫଳରେ ବନ୍ୟ ସମ୍ପଦ ଓ ଜୀବଜନ୍ତୁ ଏବେ ବିପଦ ମୁଖରେ ପଡୁଛନ୍ତି।
-ଗିରିଶ ଚନ୍ଦ୍ର ପ୍ରଧାନ, ଶିମିଳିପାଳ ସରପଞ୍ଚ
