ଖୋର୍ଦ୍ଧା ଅଫିସ,୧୯ା୧୧: ଖୋର୍ଦ୍ଧା ବନାଞ୍ଚଳରେ ବାଘ ବୁଲୁଥିବା ନେଇ ଖବର ପ୍ରଚାରିତ ହେବା ପରେ ଜଙ୍ଗଲ ନିକଟବର୍ତ୍ତୀ ଗ୍ରାମବାସୀ ଭୟଭୀତ ହୋଇପଡିଛନ୍ତି। ଶୁକ୍ରବାର ବନାଞ୍ଚଳ ଅଧିକାରୀ ଜୟକୃଷ୍ଣ ପଣ୍ଡାଙ୍କ ନେତୃତ୍ୱରେ ଏକ ଟିମ୍ ଶରଧାପୁର, ଜରିପୁଟ, ତୋଟାପଡା, ବେରୁଅଁ ଆଦି ଜଙ୍ଗଲରେ ଦିନତମାମ ପଇଁତରା ମାରିବା ସହ ଖୋଜିଥିଲେ। ତେବେ ବାଘ ପାଇଁ ବନ ବିଭାଗକୁ ନାକେଦମ୍ ହେବାକୁ ପଡିଛି। ଏହା ଏକ ଗୁଜବ, ଏଥିରେ ଆତଙ୍କିତ ନ ହେବା ଲାଗି ବନ ବିଭାଗ ପକ୍ଷରୁ ପରାମର୍ଶ ଦିଆଯାଇଛି।
ପ୍ରକାଶ ଯେ, ଗୁରୁବାର ଅପରାହ୍ନରେ ଶରଧାପୁର ଗ୍ରାମର କେତେଜଣ ମହିଳା ଜଙ୍ଗଲରୁ ଜାଳେଣି କାଠ ନେଇ ଘରକୁ ଫେରୁଥିଲେ। ଜଙ୍ଗଲରେ ବାଘ ବୁଲୁଥିବା ନଜରକୁ ଆସିଥିବା ନେଇ ଗ୍ରାମରେ କହିଥିଲେ। ଏପରି କି ବାଘ ସେଠାରୁ ତୋଟାପଡା, ଭାଲିଆବାଡି ଅଞ୍ଚଳରେ ବୁଲୁଥିବା ନେଇ ଖବର ପ୍ରଚାରିତ ହେବା ପରେ ବନ ବିଭାଗର ଏକ ଟିମ୍ ରାତି ସାରା ଉକ୍ତ ଅଞ୍ଚଳରେ ବୁଲି ସ୍ଥିତି ଅନୁଧ୍ୟାନ କରିଥିଲେ। ଏନେଇ ବନ ଅଧିକାରୀ ପଣ୍ଡା କୁହନ୍ତି, ଶରଧାପୁର ଜଙ୍ଗଲରେ ସମ୍ପୃକ୍ତା ମହିଳାମାନେ ହେଟା କିମ୍ବା ବାର୍ହାକୁ ଦେଖି ବାଘ ବୋଲି ଧରି ନେଇଥିଲେ। ଏହି ଗ୍ରାମକୁ ଲାଗି କାଜୁ ଜଙ୍ଗଲ ରହିଛି। ଯେଉଁ ମହିଳା ଦେଖିଥିବା ଦାବି କରିଥିଲେ, ସେମାନେ ଏ ସମ୍ପର୍କରେ କୌଣସି ଠିକ୍ ତଥ୍ୟ ଦେଇପାରି ନ ଥିଲେ। ଏପରି କି ଗ୍ରାମବାସୀ ମଧ୍ୟ କେହି କିଛି କହିପାରି ନ ଥିଲେ। ଜଙ୍ଗଲରେ ବାଘର ପାଦଚିହ୍ନ ମଧ୍ୟ ନାହିଁ। ଏହି ବନାଞ୍ଚଳରେ ବାଘ ନ ଥିବା ବନ ଅଧିକାରୀ ପଣ୍ଡା ସ୍ପଷ୍ଟ କରିଛନ୍ତି। ଏହା ଏକ ସମ୍ପୂର୍ଣ୍ଣ ଭାବେ ଗୁଜବ। କେହି ଗ୍ରାମବାସୀ ଭୟଭୀତ ନ ହେବା ଲାଗି ସେ ପରାମର୍ଶ ଦେଇଛନ୍ତି।
