ପାରାଦୀପ,୨୬।୪ (ସ୍ବ.ପ୍ର.): ଜଗତ୍ସିଂହପୁର ଜିଲା ପାରାଦୀପ ଷଣ୍ଢକୁଦ ଉପାନ୍ତରେ ଜଙ୍ଗଲ ଓ ପରିବେଶ ବିଭାଗର ଫରେଷ୍ଟ ବିଟ୍ ହାଉସ ରହିଛି। ସମ୍ପ୍ରତି ଏହା ଭାଙ୍ଗିରୁଜି ଗଲାଣି। ସେଠାରେ ଏବେ କେହି ରହୁନାହାନ୍ତି। ସମୁଦ୍ର ବେଳାଭୂମି ରାସ୍ତାରେ ଗଲେ ତାହା ଦୂରରୁ ଭୂତକୋଠି ପରି ଦୃଶ୍ୟମାନ ହେଉଛି। ଏହି ବିଟ୍ ହାଉସ ନିକଟରେ ଏକ ପୋଖରୀ ରହିଛି। ଏହାକୁ ଜଙ୍ଗଲ ବିଭାଗ ପକ୍ଷରୁ ଖନନ କରାଯାଇଛି। ସେଠାରେ ଏକ ଫଳକ ମଧ୍ୟ ରହିଛି। ସେଥିରେ ଦର୍ଶାଯାଇଛି ଏହି ପୋଖରୀରେ ବନ୍ୟଜୀବମାନେ ପାଣି ପିଇବେ। ତେବେ ଉକ୍ତ ଅଞ୍ଚଳରେ କୌଣସି ବନ୍ୟଜନ୍ତୁଙ୍କୁ ଦେଖିବାକୁ ମିଳନ୍ତି ନାହିଁ। ବିଶ୍ୱସ୍ତରୀୟ ସଙ୍ଗଠନ କାମ୍ପା ଅର୍ଥରେ ଏହି ପୋଖରୀ କରାଯାଇଥିଲେ ମଧ୍ୟ କାହା କାମରେ ଲାଗି ପାରୁନାହିଁ।
ଉକ୍ତ ବିଟ୍ ହାଉସ ଉତ୍ତର ପାର୍ଶ୍ୱ ଷଣ୍ଢକୁଦ ଏବଂ ଦକ୍ଷିଣ ପାର୍ଶ୍ୱ ଜଟାଧାରମୁହାଣ ପର୍ଯ୍ୟନ୍ତ ଝାଉଁ ଜଙ୍ଗଲ ଅଛି। ପ୍ରତିବର୍ଷ ଏଠାରେ ଝାଉଁ ଚାରାରୋପଣ କରାଯାଉଛି। କିନ୍ତୁ ପରିତାପର ବିଷୟ ସେହି ଝାଉଁ ଗଛଗୁଡ଼ିକୁ ଅବାଧରେ କଟାଯାଉଛି। ଅଞ୍ଚଳର କେତେଜଣ କାଠ ବେପାରୀ ନିୟମିତ ଭାବେ ଏପରି ଗଛ କାଟିବାରେ ଲାଗିଛନ୍ତି। ବଡ଼ଗଛଗୁଡ଼ିକୁ କାଟିବା ଦ୍ୱାରା ସେହି ଅଞ୍ଚଳରେ କେବଳ ଛୋଟ ଗଛ ଦୃଶ୍ୟମାନ ହେଉଛି। ଫରେଷ୍ଟ ବିଭାଗର ଜଗୁଆଳିମାନେ ବିଟ୍ ହାଉସରେ ନ ରହିବା ଦ୍ୱାରା ଗଛ କଟାଳିଙ୍କ ପାଇଁ ଅପୂର୍ବ ସୁଯୋଗ ସୃଷ୍ଟି ହୋଇଛି। ଯେଉଁ ୨ଜଣ ଗାର୍ଡ ଅଛନ୍ତି ସେମାନେ ପାରାଦୀପ ବନ୍ଦର ଟାଉନଶିପରେ ରୁହନ୍ତି ବୋଲି କୁଜଙ୍ଗ ବନାଞ୍ଚଳ ଅଧିକାରୀ ରଞ୍ଜନ ମିଶ୍ର କୁହନ୍ତି। ସୂଚନାଯୋଗ୍ୟ, ପାରାଦୀପ ବତିଘରଠାରୁ ଜଟାଧାରୀମୁହାଣ ପର୍ଯ୍ୟନ୍ତ ସୁଦୀର୍ଘ ବେଳାଭୂମି ମୁକୁଳା ପଡ଼ିଛି। ଏହି ବେଳାଭୂମିର ଯେଉଁଠାରେ ସ୍ବଳ୍ପ ଝାଉଁ ଜଙ୍ଗଲ ଅଛି ସେଠାରେ ଏଭଳି ଅବସ୍ଥା ସୃଷ୍ଟି ହୋଇଛି। ଏପରିକି ସେହି ଜଙ୍ଗଲ ମଧ୍ୟରେ କେତେଜଣ ଲୋକ ସମୁଦ୍ର ବାଲି ଖୋଳି ବିକୁଛନ୍ତି। ଆଉ କିଛି ଜାଗାରେ ନଳକୂପ ଖୋଳି ପାଣି ବିକୁଛନ୍ତି। ଜଙ୍ଗଲ ଉଜୁଡ଼ିବା ଏବଂ ବାଲି ଖୋଳିବା ଫଳରେ ପ୍ରାକୃତିକ ସମ୍ପଦ ପ୍ରତି ବିପଦ ସୃଷ୍ଟି ହୋଇଛି ବୋଲି ପ୍ରକୃତି ବନ୍ଧୁ ପ୍ରଭାସ ଚନ୍ଦ୍ର ସ୍ବାଇଁ କୁହନ୍ତି। ବାତ୍ୟା ସମୟରେ ସମୁଦ୍ର ପାଣିକୁ ବାଲିକୁଦ ଅଟକାଇଥାଏ ଏବଂ ପବନକୁ ଝାଉଁ ଜଙ୍ଗଲ କିଛି ମାତ୍ରାରେ ପ୍ରତିରୋଧ କରିଥାଏ। ମାତ୍ର ଏସବୁ ଲୁଟ୍ ହେଉଥିବାରୁ ଉପକୂଳ ପ୍ରତି ବିପଦ ଆଶଙ୍କା ରହିଛି ବୋଲି ସେ କହିଛନ୍ତି। ଗଛ କଟାଯିବା ସମ୍ପର୍କରେ ବନାଞ୍ଚଳ ଅଧିକାରୀ ମିଶ୍ର କୁହନ୍ତି, କେତେବେଳେ କିଏ କାଟୁଛନ୍ତି ତାହା ଜଣାପଡ଼ୁନାହିଁ। ବିଟ୍ ହାଉସ ଜରାଜୀର୍ଣ୍ଣ ପ୍ରସଙ୍ଗରେ କୁହନ୍ତି, ତାହା ଭାଙ୍ଗିଯାଇଥିବାରୁ ସେଠାରେ ରହିବା ପାଇଁ ବ୍ୟବସ୍ଥା ନାହିଁ। ଏ ସମ୍ପର୍କରେ ଉପରିସ୍ଥ ଅଧିକାରୀମାନଙ୍କୁ ଅବଗତ କରାଯାଇଛି। ବଜେଟ ଆସିଲେ ନୂଆ ଘର ହେବ। ସେହିପିରି ଜଙ୍ଗଲ ମଧ୍ୟରେ ନଳକୂପ ଖୋଳି ପାଣି ବିକିବା ଘଟଣାରେ ପାନୀୟ ଜଳ ବିଭାଗୀୟ ଯନ୍ତ୍ରୀ ନରେନ୍ଦ୍ର ଦାସ କୁହନ୍ତି, ଏ ନେଇ ସମ୍ପୃକ୍ତ ଅଞ୍ଚଳରେ ଯାଞ୍ଚ କରିବା ପରେ ଜଣଙ୍କୁ ନୋଟିସ କରାଯାଇଛି।
