ବରଗଡ଼,୧୨।୧୧(ପ୍ରେମାନନ୍ଦ ଖମାରୀ)- ବରଗଡ଼ ସହରସ୍ଥିତ ସମ୍ବଲପୁରୀ ବସ୍ତ୍ରାଳୟକୁ ବୁଧବାର ବିଦେଶ ଇଂଲଣ୍ଡରୁ ୮ଜଣ ମହିଳା ଆସିଥିଲେ। ସେମାନେ ସମ୍ବଲପୁରୀ ବସ୍ତ୍ରାଳୟର ରଙ୍ଗଘର ପରିଦର୍ଶନ କରି ସୂତାର ରଙ୍ଗ ପ୍ରଣାଳୀ ଦେଖିଥିଲେ । ଏହା ସହିତ ବନ୍ଦେ ମାତରମ୍ ଡିଜାଇନର ଲୁଗା ବୁଣା ହେଉଥିବାର ଅବଲୋକନ କରିଥିଲେ । ଉକ୍ତ ବିଦେଶିନୀ ଦଳକୁ ସମ୍ବଲପୁରୀ ବସ୍ତ୍ରାଳୟର ପରିଚାଳନା ନିର୍ଦ୍ଦେଶକ, ସମ୍ପାଦକ, ଓ ଏସ୍ ଡି, ବାଣିଜ୍ୟ ଅଧିକାରୀ ସମିତିର ଲୁଗାର ବୈଶିଷ୍ଟ୍ୟ, ଗୁଣବତ୍ତା ଇତ୍ୟାଦି ତାଙ୍କ ପରିଦର୍ଶନ ସମୟରେ ବିସ୍ତୃତ ଭାବରେ ବୁଝାଇଥିଲେ । ଏହି ବିଷୟରେ ବିଦେଶିନୀମାନେ ଅନୁପ୍ରାଣିତ ହୋଇ ସମ୍ବଲପୁରୀ ଲୁଗା, ଗାର୍ମେଣ୍ଟ୍ କିଣିବା ପାଇଁ ଆଗ୍ରହ ପ୍ରକାଶ କରିଥିଲେ । ଏହାପରେ ତାଙ୍କୁ ବରଗଡ଼ସ୍ଥିତ ମେଗା ଶୋ’ ରୁମକୁ ପରିଦର୍ଶନରେ ନିଆ ଯାଇଥିଲା । ସେଠାରେ ସେମାନେ ଲକ୍ଷାଧିକ ଟଙ୍କାର ସମ୍ବଲପୁରୀ ହସ୍ତତନ୍ତ ପୋଷାକ ତଥା ଲୁଗା କିଣିଥିଲେ ଏଵଂ ସମ୍ବଲପୁରୀ ହସ୍ତତନ୍ତ ଲୁଗାକୁ ପ୍ରଶଂସା କରିଥିଲେ । ଉକ୍ତ ପରିଦର୍ଶନ ସମୟରେ ସମିତିର ସଭାପତି ସମ୍ବିତ କୁମାର ଆଚାର୍ଯ୍ୟ ବିଦେଶିନୀମାନଙ୍କୁ ସମ୍ବର୍ଦ୍ଧିତ କରିଥିଲେ । ବିଦେଶିନୀଙ୍କ ପରିଦର୍ଶନ ଦ୍ବାରା ସମ୍ବଲପୁରୀ ବସ୍ତ୍ରାଳୟର ଉତ୍ପାଦିତ ବସ୍ତ୍ରର ବିଦେଶରେ ବହୁଳ ଭାବେ ପ୍ରଚାର ପ୍ରସାର ହେବ ବୋଲି ଆଶା କରାଯାଉଛି।
