ନୂଆଦିଲ୍ଲୀ,୧୭।୧୨: ଗତ କିଛିଦିନ ହେବ ଉଭୟ ଜାତୀୟ ଏବଂ ଅନ୍ତର୍ଜାତୀୟ ସମସ୍ୟା ଲାଗି ରହିଛି। ଏଭଳି ସ୍ଥିତିରେ ଦେଶର ବୈଦେଶିକ ମୁଦ୍ରାଭଣ୍ଡାର (ଏଫ୍ଆର୍)ରେ ବୃଦ୍ଧି ଘଟିଛି। ଏପରିକି ଡିସେମ୍ବର ୯ରେ ଶେଷ ହୋଇଥିବା ବଜାର କାରବାର ଓ ପରିବ୍ୟବସ୍ଥା ଗତ ସପ୍ତାହ ମଧ୍ୟରେ ୨.୯ ବିଲିୟନ ଡଲାର ବଢ଼ି ୫୬୪.୦୬ ବିଲିୟନ ଡଲାରରେ ପହଞ୍ଚତ୍ଛି। ବିଶେଷକରି ଶୁକ୍ରବାର ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ପକ୍ଷରୁ ଏ ନେଇ ବିସ୍ତୃତ ସୂଚନା ଦିଆଯାଇଛି। ଆର୍ବିଆଇର ସୂଚନା ଅନୁସାରେ ବୈଦେଶିକ ମୁଦ୍ରାଭଣ୍ଡାର ଲଗାତର ୫ମ ସପ୍ତାହ ଲାଗି ବୃଦ୍ଧି ପାଇଛି। ଏପରିକି ପୂର୍ବ ସପ୍ତାହରେ ମଧ୍ୟ ବୈଦେଶିକ ମୁଦ୍ରାଭଣ୍ଡାରରେ ୧୧ବିଲିୟନ ଡଲାର ବଢ଼ି ୫୬୧.୧୬ ବିଲିୟନ ଡଲାରରେ ପହଞ୍ଚିଥିଲା। ଉଲ୍ଲେଖଯୋଗ୍ୟ, ୨୦୨୧ ଅକ୍ଟୋବରରେ ବୈଦେଶିକ ମୁଦ୍ରାଭଣ୍ଡାର ୬୪୫ ବିଲିୟନ ଡଲାରର ସର୍ବକାଳୀନ ଉଚ୍ଚସ୍ତରକୁ ଛୁଇଁଥିଲା। ବୈଶ୍ୱିକ ଘଟଣାକ୍ରମରେ ଏହାର ପରିମାଣ ହ୍ରାସ ପାଇଥିଲା। ଫଳରେ କେନ୍ଦ୍ରୀୟ ବ୍ୟାଙ୍କ ଭାରତୀୟ ମୁଦ୍ରା (ଟଙ୍କା)ର ବିନିମୟ ମୂଲ୍ୟ ହ୍ରାସର ନିୟନ୍ତ୍ରଣ ନିମନ୍ତେ ବ୍ୟାପକ ପଦକ୍ଷେପ ଗ୍ରହଣ କରିଥିଲା। ବିଶେଷକରି ବୈଦେଶିକ ମୁଦ୍ରାଭଣ୍ଡାରର ବ୍ୟବହାର କରିବା ଯୋଗୁ ଏଥିରେ ହ୍ରାସ ଦେଖାଯାଇଥିଲା।
ସେହିପରି କେନ୍ଦ୍ରୀୟ ବ୍ୟାଙ୍କର ସାପ୍ତାହିକ ତଥ୍ୟ ଅନୁସାରେ ମୁଦ୍ରାଭଣ୍ଡାରର ଗୁରୁତ୍ୱପୂର୍ଣ୍ଣ ଅଂଶ ମନେକରାଯାଉଥିବା ବୈଦେଶିକ ପରିସମ୍ପତ୍ତି (ଆସେଟ୍) ଚଳିତ ବର୍ଷ ଡିସେମ୍ବର ୯ରେ ଶେଷ ହୋଇଥିବା ସପ୍ତାହରେ ୩.୧୪୧ ବିଲିୟନ ଡଲାର ବୃଦ୍ଧି ହୋଇ ୫୦୦.୧୨୫ ବିଲିୟନ ଡଲାରରେ ରହିଛି। ଉକ୍ତ ସପ୍ତାହରେ ଭାରତର ସ୍ବର୍ଣ୍ଣ ଭଣ୍ଡାରର ମୂଲ୍ୟ ୨୯.୬ କୋଟି ଡଲାର ହ୍ରାସ ହୋଇ ୪୦.୭୯୨ ଡଲାର ହୋଇଯାଇଛି।
ଅପରପକ୍ଷରେ ଆର୍ବିଆଇର ତଥ୍ୟ ଅନୁସାରେ ବିଶେଷ ଆହରଣ ଅଧିକାର (ଏସ୍ଡିଆର୍) ୬.୧ କୋଟି ଡଲାର ବଢ଼ି ୪୦.୭୨୯ ବିଲିୟନ ଡଲାର ହୋଇଯାଇଛି। ଏପରିକି ସମୀକ୍ଷାଧୀନ ସପ୍ତାହରେ ଅନ୍ତର୍ଜାତୀୟ ମୁଦ୍ରାପାଣ୍ଠି (ଆଇଏମ୍ଏଫ୍)ରେ ମଧ୍ୟ ସଂରକ୍ଷିତ ଦେଶର ମୁଦ୍ରାଭଣ୍ଡାର ୨୦ ଲକ୍ଷ ଡଲାର ବଢ଼ି ୫.୧୧ ବିଲିୟନରେ ପହଞ୍ଚତ୍ଛି।
