ନୂଆଦିଲ୍ଲୀ,୨୨।୧୦(ପି.ଟି.): ଜଣାଶୁଣା କ୍ରୀଡ଼ା ପ୍ରଶାସକ ଆଦିଲେ ସୁମରିଓ୍ବାଲା ତୃତୀୟଥର ପାଇଁ ଆଥଲେଟିକ୍ସ ଫେଡେରେଶନ ଅଫ୍ ଇଣ୍ଡିଆ (ଏଏଫ୍ଆଇ) ଅଧ୍ୟକ୍ଷ ଭାବେ ବିନା ପ୍ରତିଦ୍ୱନ୍ଦ୍ୱିତାରେ ନିର୍ବାଚିତ ହେବା ସ୍ପଷ୍ଟ ହୋଇଛି। ସେହିପରି ପୂର୍ବତନ ମହିଳା ଲଙ୍ଗ୍ଜମ୍ପର ଅଞ୍ଜୁ ବବି ଜର୍ଜ ସିନିୟର ଭାଇସ୍ ପ୍ରେସିଡେଣ୍ଟ ଭାବେ ନିର୍ବାଚିତ ହେବା ନିଶ୍ଚିତ ହୋଇଛି। ଆସନ୍ତା ୩୧ ତାରିଖରେ ଏଏଫ୍ଆଇର ଜାତୀୟ ଗଭର୍ନିଂ ବଡି ନିର୍ବାଚନ ଆୟୋଜନ ହେବ।
ବୁଧବାର ଅପରାହ୍ନ ୪ଟା ସୁଦ୍ଧା ନାମାଙ୍କନ ଦାଖଲର ଶେଷ ତାରିଖ ଥିଲା। ସୁମରିଓ୍ବାଲା ଓ ଅଞ୍ଜୁ ଏହି ଦୁଇ ହାଇପ୍ରୋଫାଇଲ ପଦ ପାଇଁ ନାମାଙ୍କନ ଦାଖାଲ କରିଛନ୍ତି। ଅନ୍ୟ କେହି ନାମାଙ୍କନ ଦାଖଲ କରି ନ ଥିବାରୁ ଏହି ଦୁଇଜଣ ନିର୍ବାଚିତ ହେବା ସ୍ପଷ୍ଟ ହୋଇଛି। ସେହିପରି ସନ୍ଦୀପ ମେହେଟା ଓ ରବିନ୍ଦର ଚୌଧୁରୀ ସମ୍ପାଦକ ପଦ ପାଇଁ ନାମାଙ୍କନ ଦାଖଲ କରିଛନ୍ତି। ମେହେଟା ମଧ୍ୟ ସିନିୟର ଯୁଗ୍ମ ସମ୍ପାଦକ ପଦ ପାଇଁ ନାମାଙ୍କନ ଦାଖଲ କରିଛନ୍ତି। ତେବେ ସେ ସମ୍ପାଦକ ପଦ ପାଇଁ ନାମାଙ୍କନ ପ୍ରତ୍ୟାହର କରିବାର ଯଥେଷ୍ଟ ସମ୍ଭାବନା ରହିଛି। ଶୁକ୍ରବାର ୬ଟା ସୁଦ୍ଧା ନାମାଙ୍କନ ପତ୍ର ପ୍ରତ୍ୟାହାରର ଡେଡ୍ଲାଇନ ବୋଲି ଘୋଷଣା କରାଯାଇଛି। କୋଷାଧ୍ୟକ୍ଷ ପଦ ପାଇଁ ମଧୁକାନ୍ତ ପାଠକ ବିନା ପ୍ରତିଦ୍ୱନ୍ଦ୍ୱିତାରେ ନିର୍ବାଚିତ ହେବେ। ତେବେ ୫ ଯୁଗ୍ମ ସମ୍ପାଦକ ପଦ ପାଇଁ ୬ଜଣ ନାମାଙ୍କନ ଦାଖଲ କରିଛନ୍ତି। ୮ଟି କାର୍ଯ୍ୟକାରୀ କମିଟି ସଦସ୍ୟ ପଦ ପାଇଁ ୮ ଜଣ ପ୍ରାର୍ଥୀ ନାମାଙ୍କନ ଦାଖଲ କରିଛନ୍ତି।
