ଗ୍ରାହକଙ୍କୁ ଆକୃଷ୍ଟ କରିବା ପାଇଁ ଭିନ୍ନ ଭିନ୍ନ ରେଷ୍ଟୁରାଣ୍ଟ ଭିନ୍ନ ଭିନ୍ନ ଉପାୟ ଆପଣାଏ। ରେଷ୍ଟୁରାଣ୍ଟର ମେନ୍ୟୁ ହେଉ ଅବା ସାଜସଜ୍ଜା ଅବା ହେଉ ଅଜବ ନାଁ। କିଛି ନା କିଛି ସ୍ବତନ୍ତ୍ର ଓ ନିଆରା କରାଯାଏ ବ୍ୟବସାୟ ବଢାଇବା ପାଇଁ। ଗୁଜରାଟର ଅହମଦାବାଦରେ ଅଛି ସେମିତି ଏକ ରେଷ୍ଟୁରାଣ୍ଟ; ଯେଉଁଠି ଗ୍ରାହକଙ୍କୁ ୫ ଫୁଟ ଲମ୍ବା ଥାଳିରେ ସୁସ୍ବାଦୁ ଖାଦ୍ୟ ପରଷାଯାଏ। ଖାଲି ସେତିକି ନୁହେଁ, ଉକ୍ତ ରେଷ୍ଟୁରାଣ୍ଟରେ ଖେଳାଳିମାନଙ୍କ ନାମାନୁସାରେ ଖାଦ୍ୟର ନାମ ରଖାଯାଇଛି। ଏଠାରେ ଖାସ୍ ଅନ୍ଦାଜରେ କ୍ରିକେଟ ଥିମ୍ବାଲା ମେନୁ ମିଳିଥାଏ। ଯେମିତି କି ମେନୁରେ କୋହଲି ଖମନ, ପାଣ୍ଡ୍ୟା ପାତ୍ର, ଧୋନୀ ଖିଚ୍ଡି, ଭୁବନେଶ୍ୱର ଭର୍ତ୍ତା, ରୋହିତ ଆଲୁ ରଶିଲା, ଶାର୍ଦୁଲ ଶ୍ରୀଖଣ୍ଡ, ବାଉନ୍ସର ବାନ୍ସୁଦୀ, ହ୍ୟାଟିକ ଗୁଜରାଟୀ ଦାଲ, ବୁମରା ଭିଣ୍ଡୀ, ହରଭଜନ ହାଣ୍ଡୱା ଆଦି ପାଇବେ। ଏହାବାଦ୍ ବିଭିନ୍ନ ସୁସ୍ବାଦୁ ଗୁଜରାଟୀ ବ୍ୟଞ୍ଜନ ମଧ୍ୟ ଉପଲବ୍ଧ ହୁଏ। ଏହା ସହ ସ୍ନାକ୍ସ, ବ୍ରେଡ, ଏପେଟାଇଜର୍ ଓ ଡିଜର୍ଟ ବି ରହିଛି। ୫ ଫୁଟ୍ ବିଶିଷ୍ଟ ଥାଳିରେ ନାନା ପ୍ରକାରର ବ୍ୟଞ୍ଜନ ବେଶ୍ ସୁ୍ନ୍ଦରଭାବେ ପରଷାଯାଏ। ହେଲେ ଏତେସବୁ ଖାଦ୍ୟ ଜଣେ ଖାଇବା ସମ୍ଭବ ନୁହେଁ।
