ଭୁବନେଶ୍ୱର, ୨୪।୫ (ବ୍ୟୁରୋ):ରାଜ୍ୟରେ ଥିବା ଲୋକକଳା ଦଳଗୁଡ଼ିକୁ ନେଇ ୩୦ ଜିଲାରେ ଗଠନ ହେବ ‘ଲୋକକଳା ଦଳ’। କଳାକାରଙ୍କ ସଶକ୍ତୀକରଣ ଓ ସେମାନଙ୍କ ଜୀବନ ଜୀବିକାର ଉନ୍ନତି ପାଇଁ ଏହି ସ୍ବୟଂ ସହାୟକ ଦଳ କାର୍ଯ୍ୟ କରିବ। ଏଥିପାଇଁ କଳାକାର ପାଣ୍ଠିରୁ ଅର୍ଥ ପ୍ରଦାନ କରାଯିବ। ଏହାଦ୍ୱାରା ଲୁପ୍ତପ୍ରାୟ ଲୋକକଳାର ପୁନରୁଦ୍ଧାର ସହ କଳାକାର ଓ ଦଳଗୁଡିକୁ ସଶକ୍ତ କରାଯାଇ ପାରିବ। ରାଜ୍ୟ କଳା ସଂସ୍କୃତି ସଂଘ ଉପସଭାପତି ଓ ରାଜ୍ୟ ପ୍ରକଳ୍ପ ସଂଯୋଜକ ଏନେଇ ବ୍ଲ୍ୟୁପ୍ରିଣ୍ଟ ପ୍ରସ୍ତୁତ କରିବେ। ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ନିର୍ଦ୍ଦେଶକ ରଞ୍ଜନ କୁମାର ଦାସଙ୍କ ଅଧ୍ୟକ୍ଷତାରେ ଜିଲା କଳା ସଂସ୍କୃତି ସଂଘ ଉପସଭାପତିଙ୍କୁ ନେଇ ରବିବାର ଅନୁଷ୍ଠିତ ଭର୍ଚୁଆଲ ବୈଠକରେ ଏହି ସୂଚନା ଦିଆଯାଇଛି।
କରୋନାର ଦ୍ୱିତୀୟ ଲହରରେ ଲୋକକଳା କଳାକାରଙ୍କ ବିଭିନ୍ନ ସମସ୍ୟା ସମାଧାନର ବାଟ ବାହାର କରିବା ପାଇଁ ଏହି ବୈଠକ ବସି ୩୦ ଜିଲାର କଳା ସଂସ୍କୃତି ସଂଘ ଉପସଭାପତିଙ୍କ ମତାମତ ନିଆଯାଇଥିଲା। ବୈଠକରେ ମୁଖ୍ୟମନ୍ତ୍ରୀ କଳାକାର ସହାୟତା ଯୋଜନାରେ ଭତ୍ତା ପାଇବାକୁ ଥିବା ୧୬ ହଜାର କଳାକାରଙ୍କୁ ଜିଲାସ୍ତରରେ ଅଡିଶନ ମାଧ୍ୟମରେ ଚୟନ କରିବାକୁ ମତ ପ୍ରକାଶ ପାଇଥିଲା। ଏହାସହିତ ମହାମାରୀ ଯୋଗୁ ମଞ୍ଚ ବନ୍ଦ ଥିବାରୁ ଅଳ୍ପଦିନ ମଧ୍ୟରେ ‘ଷ୍ଟେଜ୍ ଅନ୍ ଓ୍ବେବ୍’ ଓ ‘ଷ୍ଟେଜ୍ ଅନ୍ ସୋସିଆଲ୍ ମିଡିଆ’ କରାଯିବ। ଏହା ମାଧ୍ୟମରେ ଛୋଟ ଛୋଟ ସଚେତନ ବାର୍ତ୍ତା ଦେବାରେ କଳାକାରଙ୍କୁ ସାମିଲ କରାଯାଇ ଆର୍ଥିକ ସହାୟତା ଯୋଗାଇ ଦିଆଯିବ। ଅନ୍ଲକ୍ରେ କଳାକାରଙ୍କୁ ‘ଷ୍ଟେଜ୍ ଅନ୍ ହୁଇଲ୍’ ମାଧ୍ୟମରେ ଅଧିକ ସକ୍ରିୟ କରାଯିବ ବୋଲି ନିର୍ଦ୍ଦେଶକ ଦାସ ସୂଚନା ଦେଇଥିଲେ। ଏଥିପାଇଁ ଅନ୍ତର୍ଜାତୀୟ ସଂସ୍ଥା ୟୁନିସେଫ୍ ଓ ଅନ୍ୟ ସରକାରୀ ଅନୁଷ୍ଠାନର ବୈଷୟିକ ପରାମର୍ଶ ନିଆଯିବ ବୋଲି ସ୍ଥିର କରାଯାଇଛି। ବୈଠକରେ ରାଜ୍ୟ ପ୍ରକଳ୍ପ ସଂଯୋଜକ ବାସୁଦେବ ମାଳବିଶୋଇ, ରାଜ୍ୟ କଳା ସଂସ୍କୃତି ସଂଘ ଉପସଭାପତି ଅବନୀ ମିଶ୍ର ପ୍ରମୁଖ ଯୋଗଦେଇଥିଲେ।
