ଭବାନୀପାଟଣା,୪ା୧୦(ଉତ୍ତମ କୁମାର ଦାଶ):କଳାହାଣ୍ଡି ଜିଲାରେ ବର୍ଷା ବିତ୍ପାତ ଦେଖାଦେଇଛି। ଗୁରୁବାର ଦିନତମାମ ପ୍ରବଳ ବର୍ଷା ଯୋଗୁ ଜିଲାର ବିଭିନ୍ନ ସ୍ଥାନରେ ବେହାଲ ପରିସ୍ଥିତି ସୃଷ୍ଟି ହୋଇଛି। ଜିଲାର ଥୁଆମୂଳ ରାମପୁର ବ୍ଲକରେ ସର୍ବାଧିକ ୩୫୨ମି.ମି. ବର୍ଷା ହୋଇଥିଲା। ସେହିପରି ଜୁନାଗଡ଼ ବ୍ଲକରେ ୨୧୦.୪ମି.ମି., କଲମପୁରରେ ୧୦୮.୩ ମି.ମି., ଏମ୍. ରାମପୁରରେ ୧୦୯ମି.ମି., ନର୍ଲାରେ ୧୩୬ ମି.ମି., ଲାଞ୍ଜିଗଡ଼ ୧୧୦.୪ ମି.ମି., ଭବାନୀପାଟଣା ୬୮.୫ ମି.ମି., ଧର୍ମଗଡ଼ ୬୪.୨ମି.ମି., ଜୟପାଟଣା ୭୬ ମି.ମି., ଗୋଲାମୁଣ୍ଡା ବ୍ଲକରେ ୮୧ ମି.ମି. ବର୍ଷା ରେକର୍ଡ ହୋଇଛି। ପ୍ରବଳ ବର୍ଷା ଯୋଗୁ ଭବାନୀପାଟଣା-ଥୁଆମୂଳ ୪୪ନଂ. ରାଜ୍ୟ ରାଜପଥରେ ଅନେକ ଗଛ ଉପୁଡି ପଡିଥିଲା। ଫଳରେ ଯାନବାହନ ଚଳାଚଳ କିଛି ଘଣ୍ଟା ଧରି ବାଧାପ୍ରାପ୍ତ ହୋଇଥିଲା। ଯୁଦ୍ଧକାଳୀନ ଭିତ୍ତିରେ ସ୍ଥାନୀୟ ବନ ବିଭାଗ କର୍ମଚାରୀ ଗଛକୁ ହଟେଇବା ପରେ ଯାତାୟାତ ସ୍ବାଭାବିକ ହୋଇଥିଲା। ସେହିପରି ମୁଖୀଗୁଡ଼ା-ମହୁଲପାଟଣା ଘାଟି ରାସ୍ତା ବର୍ଷା ଯୋଗୁ ଧୋଇନେବା ସହ ମାଟି ଅତଡା ରାସ୍ତାରେ ପଡ଼ିଥିବାରୁ ଯାତାୟାତରେ ବାଧା ସୃଷ୍ଟି ହୋଇଛି। ରାମଚନ୍ଦ୍ରପୁର ଅଣ୍ଡର ବ୍ରିଜରେ ପାଣି ଜମିବା ଫଳରେ ଯାତାୟାତ ଠପ୍ ହୋଇଯାଇଛି। ଗୋବର୍ଦ୍ଧନପୁର ପଞ୍ଚାୟତ ମୁଖ୍ୟାଳୟର ମଧୁପୁର ଓ ରାମଚନ୍ଦ୍ରପୁର ସହିତ ଗୋପାଳପୁର, ଭାଲୁଚଞ୍ଚରା ଆଦି ଗାଁକୁ ଏକପ୍ରକାର ଯୋଗାଯୋଗ ବିଚ୍ଛିନ୍ନ ହୋଇପଡିଛି। ଜୁନାଗଡ଼ ସହରରେ ଡ୍ରେନେଜ ବ୍ୟବସ୍ଥା ନ ଥିବାରୁ ସହରର ତାଲବନ୍ଦପଡା, ଲକ୍ଷ୍ମୀସାଗର ପଡା, ଫତେନଗର ପଡାରେ ଥିବା ଲୋକଙ୍କ ଘରକୁ ପାଣି ପଶିଯାଇଛି। ସେହିପରି ସାହୁପଡା ଓ ଫତେନଗର ପଡା ମୁଖ୍ୟ ରାସ୍ତାରେ କେନାଲ ଭଳି ପାଣି ଚାଲୁଥିବା ଦେଖିବାକୁ ମିଳିଥିଲା। ଜୁନାଗଡ଼ ସହର ଉପକଣ୍ଠ ତାଳବନ୍ଦପଡାର ପଦନାଭ ମାଝୀ ଓ ତାଙ୍କ ସ୍ତ୍ରୀ ଘରେ ଶୋଇଥିବାବେଳେ ବର୍ଷା ଯୋଗୁ ହଠାତ ମାଟିଛପର ଘରର ଛାତ ଭୁଶୁଡି ପଡିଥିଲା। ତେବେ ଅଳ୍ପକେ ସେମାନେ ବର୍ତ୍ତିଯାଇଥିବାବେଳେ ଆସବାବପତ୍ର ମାଟିରେ ପୋତି ହୋଇଯାଇଥିବା ଦେଖିବାକୁ ମିଳିଛି। ଉପରମୁଣ୍ଡରେ ପ୍ରବଳ ବର୍ଷା ଓ ମଙ୍ଗଳବାର ବ୍ୟାରେଜ ଗେଟ ଖୋଲାଯିବା ପରେ ଜୁନାଗଡ଼ ହାତୀ ନଦୀରେ ବନ୍ୟା ପରିସ୍ଥିତ ସୃଷ୍ଟି ହୋଇଛି। ହାତୀନଦୀ କୂଳରେ ଥିବା ଜୁନାଗଡ଼ ବ୍ଲକ ତଲମଲା ପଞ୍ଚାୟତର ମସିଗାଁ, ସାହଜକନା, ଆଟିଗାଁ ପଞ୍ଚାୟତର ବାଗଡୁଙ୍ଗରି, ମିଚାଗାଁ ଆଦି ଗ୍ରାମର ଶତାଧିକ ଏକର ଚାଷ ଜମି ଜଳମଗ୍ନ ହୋଇଛି। ଫଳରେ ସେଠାରେ ଧାନ ଫସଲ ନଷ୍ଟ ହେବା ସମ୍ଭାବନା ଦେଖାଦେଇଛି।
