ବ୍ରହ୍ମପୁର ଅଫିସ,୮ା୧୧-ଗୋପାଳପୁର ଏନ୍ଏସିର ଉନ୍ନତୀ ପାଇଁ ଯୋଜନା ପରେ ଯୋଜନା ହେଉଛି। ଏଥିପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି ରାଜ୍ୟ ସରକାର। ଆଲୋକ ସଜା, ଶିଶୁଉଦ୍ୟାନ, ରାସ୍ତାଘାଟ ନିର୍ମାଣରେ ବହୁ ଟଙ୍କା ବ୍ୟୟ ହେଉଛି। ଗୋପାଳପୁର ବେଳାଭୂମିକୁ ବହୁ ପର୍ଯ୍ୟଟକଙ୍କର ଆଗମନ ହେଉଥିବାରୁ ସେମାନଙ୍କ ସୁବିଧା ଲାଗି ସମସ୍ତ ବ୍ୟବସ୍ତା କରାଯାଉଛି। ହେଲେ ବସ୍ଷ୍ଟାଣ୍ଡକୁ ନେଇ ଉଠିଛି ପ୍ରଶ୍ନ। ଗୋପାଳପୁରେ ବସ୍ ରହଣି ପାଇଁ ୨୦୧୫ ମସିହାରେ ପ୍ରାୟ ୫କୋଟି ଟଙ୍କାରେ ୭ ଏକର ପରିମିତ ଅଞ୍ଚଳରେ ବସ୍ଷ୍ଟାଣ୍ଡ ନିର୍ମାଣ କରାଗଲା। ବସ୍ ରହିବାଠାରୁ ଆରମ୍ଭ କରି ବିଶ୍ରାମଗୃହ, ଶୌଚାଳୟ, ଟିକେଟ କାଉଣ୍ଟର ଆଦି କରାଗଲା। ହେଲେ ଏ ଯାଏ ବି ସେଠାକୁ ବସ୍ ଗଡିଲାନି। ଏନ୍ଏସି ମୁଖ୍ୟ ରାସ୍ତାରେ ବସ୍ ରହୁଥିବାରୁ ଟ୍ରାଫିକ ସମସ୍ୟା ଦେଖାଦେଉଛି। ଏହାକୁ ନେଇ ଅଞ୍ଚଳବାସୀ ଅସନ୍ତୋଷ ବ୍ୟକ୍ତ କରିଛନ୍ତି। ଏ ନେଇ ଏନ୍ଏସି କାର୍ଯ୍ୟନିର୍ବାହୀ ଅଧିକାରୀଙ୍କୁ ପଚାରିବାରେ ସେ କହିଛନ୍ତି, ବ୍ରହ୍ମପୁର ଉନ୍ନୟନ କର୍ତ୍ତୃପକ୍ଷ (ବିଡିଏ) ପକ୍ଷରୁ ବସଷ୍ଟାଣ୍ଡ ହେଲା। ବିଡିଏ କିଛି ବର୍ଷ ଏହାର ରକ୍ଷାଣାବେକ୍ଷଣା କରିବା ପରେ ଖର୍ଚ୍ଚ ଅଧିକ ବଢିଯିବାରୁ ବର୍ଷେ ହେବ ଏନ୍ଏସିକୁ ଏହା ହସ୍ତାନ୍ତର ହୋଇଛି। ଅନ୍ୟପକ୍ଷରେ ବସଷ୍ଟାଣ୍ଡକୁ ବସ୍ ଆସିବ କି ନାହିଁ ସେ ଉତ୍ତର ବିଡିଏ ପାଖରେ ନାହିଁ। ଆଞ୍ଚଳିକ ପରିବହନ ଅଧିକାରୀକହିଛନ୍ତି, ବର୍ତ୍ତମାନ ୮ରୁ ୧୦ଟି ବସ୍ ଚଳାଚଳ କରୁଛି। କରୋନା ପାଇଁ ଖୁବ୍ କମ୍ ସଂଖ୍ୟକ ଲୋକ ଯିବାଆସିବା କରୁଛନ୍ତି। ଆଗକୁ ବିଭାଗ ତରଫରୁ ଯାହା କରାଯାଇପାରିବ ତାହା କରାଯିବ ବୋଲି କହିଛନ୍ତି।
