ଗହୀରମଥା ନିଷିଦ୍ଧାଞ୍ଚଳରେ ମାଛଧରା
11:25 amDecember 12, 2020December 12, 2020 / 43

ରାଜନଗର,୧୨ା୧୨(ଡି.ଏନ.ଏ.): ବିରଳ ଅଲିଭ ରିଡଲେ କଇଁଛଙ୍କ ଏନ୍ତୁଡିଶାଳ ଗହୀରମଥା ନିଷିଦ୍ଧାଞ୍ଚଳରେ ବେଆଇନ ଭାବେ ମାଛ ଧରା ଚାଲିଛି। ଏପରି ଅଭିଯୋଗ ହେବା ପରେ ଶୁକ୍ରବାର ରାଜନଗର ବନ ବିଭାଗ ୫ ଟ୍ରଲରକୁ ଧରିଛି। ସେଥିରେ ଥିବା ୨୯ କୁଇଣ୍ଟାଲ ମାଛ, ମୃତ ବିରଳ ଅଲିଭ ରିଡଲେ କଇଁଛକୁ ଜବତ କରିଛି। ଏହି ଘଟଣାରେ ୩୬ଜଣ ମତ୍ସ୍ୟଜୀବୀଙ୍କୁ ଗିରଫ କରାଯାଇଛି ବୋଲି ବନ ବିଭାଗ ଅଧିକାରୀ କହିଛନ୍ତି।
ଏବେ ଅଲିଭ ରିଡଲେ କଇଁଛଙ୍କ ମିଳନ ଋତୁ। ସେଥିପାଇଁ ଟ୍ରଲର ଚଳାଚଳକୁ ନିଷିଦ୍ଧ କରାଯାଇଛି। ହେଲେ ବନବିଭାଗର ଏହି ଆଇନକୁ ବେଖାତିର କରି ଟ୍ରଲରଗୁଡିକ ନିଷିଦ୍ଧାଞ୍ଚଳକୁ ପ୍ରବେଶ କରି ମାଛ ଧରୁଛନ୍ତି। ରାଜନଗର ଡିଏଫ୍‌ଓ ବିକାଶ ରଞ୍ଜନ ଦାଶଙ୍କ ନିର୍ଦ୍ଦେଶ କ୍ରମେ ଗହୀରମଥା ରେଞ୍ଜ ଅଫିସର ଦେବାଶିଷ ଭୋଇ ଓ ଫରେଷ୍ଟର ନିର୍ମଳ ଚରଣ ନାୟକଙ୍କ ନେତୃତ୍ୱରେ ପାଟ୍ରୋଲିଂ ଟିମ୍‌ ଗହୀରମଥା ସାମୁଦ୍ରିକ ଅଭୟାରଣ୍ୟ ଅଞ୍ଚଳରେ ଚଢ଼ାଉ ଆରମ୍ଭ କରିଛନ୍ତି। ଶୁକ୍ରବାର ଏହି ପାଟ୍ରେଲିଂ ଟିମ୍‌ ୫ଟି ଟ୍ରଲର ଜବତ କରିଛି। ଆକବରୀ-୨ ଟ୍ରଲରରୁ ୭ଜଣ ମସତ୍‌ୟଜିବୀଙ୍କୁ ଗିରଫ କରାଯାଇଥିବାବେଳେ ୮ କୁଇଣ୍ଟାଲ ମାଛ, ୮ଟି ଟ୍ରଲିଂନେଟ ଓ ୫୫କେଜି ଓଜନର ମୃତ ଅଲିଭ ରିଡଲେ କଇଁଛ ଜବତ କରାଯାଇଛି। ଗଙ୍ଗାପୁତ୍ର ଟ୍ରଲରରୁ ୬ ମତ୍ସ୍ୟଜିବୀଙ୍କୁ ଗିରଫ କରାଯାଇଛି ଓ ସେହି ଟ୍ରଲରରୁ ଅଢେଇ କୁଇଣ୍ଟାଲ ମାଛ ଓ ୯ ଟ୍ରଲିଂନେଟ ଜବତ କରାଯାଇଛି। ଦେବୀ ପାର୍ବତୀ ଟ୍ରଲରରୁ ୬ଜଣ ମତ୍ସ୍ୟଜିବୀଙ୍କୁ ଗିରଫ କରାଯାଇଥିବା ବେଳେ ୧୫ କୁଇଣ୍ଟାଲ ମାଛ, ୧୦ଟି ଟ୍ରଲିଂ ନେଟ ଜବତ କରାଯାଇଛି। ଆକବରୀ-୩ ଟ୍ରଲରରୁ ୮ ମତ୍ସ୍ୟଜିବୀଙ୍କୁ ଗିରଫ କରାଯାଇଥିବାବେଳେ ଅଢେଇ କୁଇଣ୍ଟାଲ ମାଛ ଓ ୯ ଟ୍ରଲିଂ ନେଟ ଜବତ କରାଯାଇଛି। ଓଁ ଗାଦିବ୍ରହ୍ମ ଟ୍ରଲରରୁ ଦେଢ କୁଇଣ୍ଟାଲ ମାଛ ଓ ୧୧ ଟ୍ରଲିଂ ନେଟ ଜବତ କରାଯାଇଛି। ଗିରଫ ମତ୍ସ୍ୟଜୀବୀଙ୍କୁ ଶୁକ୍ରବାର କୋର୍ଟ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ସେମାନଙ୍କୁ ଜେଲ ହାଜତକୁ ପଠାଇ ଦିଆଯାଇଛି। ନଭେମ୍ବର ୧ରୁ ଆଜି ପର୍ଯ୍ୟନ୍ତ ଗହୀରମଥା ନିଷିଦ୍ଧାଞ୍ଚଳରୁ ୧୦ ଟ୍ରଲରକୁ ଜବତ କରାଯିବା ସହିତ ୬୦ଜଣ ମତ୍ସ୍ୟଜିବୀଙ୍କୁ ଗିରଫ କରାଯାଇଛି।