ମୁମ୍ବାଇ, ୨୬।୮: ସ୍ବାମୀଙ୍କ ସମ୍ପତ୍ତି ଉପରେ ପ୍ରଥମ ସ୍ତ୍ରୀଙ୍କର ହିଁ ଅଧିକାର ରହିବ। ଏନେଇ ସେ ଆଇନଗତ ଆଶ୍ରୟ ନେଇ ପାରିବେ ବୋଲି ବମ୍ବେ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ଯଦି କୌଣସି ବ୍ୟକ୍ତିଙ୍କ ଏକାଧିକ ସ୍ତ୍ରୀ ଅଛନ୍ତି। ଏପରିସ୍ଥଳେ ପ୍ରଥମ ସ୍ତ୍ରୀ କେବଳ ସମ୍ପତ୍ତି ଉପରେ ଦାବୀ କରିପାରିବେ। କିନ୍ତୁ ସ୍ତ୍ରୀମାନଙ୍କର ସନ୍ତାନମାନଙ୍କୁ ପିତାଙ୍କ ସମ୍ପତ୍ତିରୁ ଭାଗ ମିଳିବ। ବିଚାରପତି ଏସ୍.ଜେ. କଥାଓ୍ବାଲା ଏବଂ ମାଧବ ଜାମଦାରଙ୍କ ଦ୍ୱାରା ଗଠିତ ଖଣ୍ଡପୀଠ ଏଭଳି ରାୟ ଦେଇଛନ୍ତି। ଏହା ପୂର୍ବରୁ ବମ୍ବେ ହାଇକୋର୍ଟର ଔରଙ୍ଗାବାଦ ଖଣ୍ଡପୀଠ ମଧ୍ୟ ସମାନ ରାୟ ଦେଇଥିଲେ। ମହାରାଷ୍ଟ୍ର ରେଲଓ୍ବେ ପୋଲିସ ସବ୍ ଇନସ୍ପେକ୍ଟର ସୁରେଶ ହଟାନକରଙ୍କ ଦ୍ୱିତୀୟ ସ୍ତ୍ରୀଙ୍କ ପକ୍ଷରୁ ସ୍ବାମୀଙ୍କ ସମ୍ପତ୍ତି ପାଇଁ କରାଯାଇଥିବା ଏକ ଆବେଦନର ବିଚାର କରି ଏଭଳି ରାୟ ଦେଇଛନ୍ତି। ମେ ୩୦ରେ ଡ୍ୟୁଟିରେ ଥିବା ସମୟରେ ସୁରେଶଙ୍କର କରୋନା ସଂକ୍ରମଣ ଯୋଗୁ ମୃତ୍ୟୁ ଘଟିଥିଲା। ରାଜ୍ୟ ସରକାର ଏଭଳି କରୋନା ଯୋଦ୍ଧାଙ୍କ ପାଇଁ ୬୫ ଲକ୍ଷ ଟଙ୍କାର ଆର୍ଥିକ ସହାୟତା ଘୋଷଣା କରିଛନ୍ତି। ଆର୍ଥିକ ସହାୟତା ପାଇବା ପାଇଁ ଦ୍ୱିତୀୟ ସ୍ତ୍ରୀ ଆବେଦନ କରିଥିଲେ। ଦ୍ୱିତୀୟସ୍ତ୍ରୀଙ୍କ ଝିଅ ଶ୍ରଦ୍ଧା ଏନେଇ କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି।
