ଚଟ୍ଟୋଗ୍ରାମ, ୮।୨: ଓ୍ବେଷ୍ଟଇଣ୍ଡିଜ ମିଡ୍ଲଅର୍ଡର ବ୍ୟାଟ୍ସମ୍ୟାନ କାଇଲ ମେୟର୍ସ ବିଶ୍ୱର ପ୍ରଥମ ବ୍ୟାଟ୍ସମ୍ୟାନ ଭାବେ ପଦାର୍ପଣ ଟେଷ୍ଟର ଚତୁର୍ଥ ଇନିଂସରେ ଅପରାଜିତ ଦ୍ୱିଶତକ ହାସଲ କରି ଦଳକୁ ଅବିଶ୍ୱସନୀୟ ବିଜୟ ପ୍ରଦାନ କରିଛନ୍ତି। ମେୟର୍ସଙ୍କ ୨୧୦ ରନର ଅପରାଜିତ ଦ୍ୱିଶତକୀୟ ଇନିଂସ ବଳରେ ଓ୍ବେଷ୍ଟଇଣ୍ଡିଜ ରବିବାର ଏଠାରେ ଅନୁଷ୍ଠିତ ପ୍ରଥମ ଟେଷ୍ଟ ମ୍ୟାଚ୍ରେ ଘରୋଇ ବାଂଲାଦେଶକୁ ୩ ଉଇକେଟରେ ପରାସ୍ତ କରିଛି। ଏଥିସହ ଦୁଇ ମ୍ୟାଚ୍ ବିଶିଷ୍ଟ ଏହି ସିରିଜରେ ଓ୍ବେଷ୍ଟଇଣ୍ଡିଜ ୧-୦ରେ ଅଗ୍ରଣୀ ହାସଲ କରିଛି। ମେୟର୍ସ ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି।
ଟସ୍ ଜିତି ବାଂଲାଦେଶ ପ୍ରଥମେ ବ୍ୟାଟିଂ କରି ୧୫୦.୨ ଓଭରରେ ୪୩୦ ରନ କରି ଅଲ୍ଆଉଟ ହୋଇଥିଲା। ଜବାବରେ ପ୍ରଥମ ଇନିଂସ ଆରମ୍ଭ କରି ଓ୍ବେଷ୍ଟଇଣ୍ଡିଜ୍ ୯୬.୧ ଓଭରରେ ୨୫୯ ରନ କରି ଅଲ୍ଆଉଟ ହେବା ସହ ୧୭୧ ରନ ପଛରେ ପଡିଥିଲା। ଏହାପରେ ଦ୍ୱିତୀୟ ଇନିଂସରେ ବାଂଲାଦେଶ ୬୭.୫ ଓଭରରେ ୮ ଉଇକେଟ ହରାଇ ୨୨୩ ରନକରି ଇନିଂସ ଘୋଷଣା କରିଥିଲା। ଫଳରେ ଓ୍ବେଷ୍ଟଇଣ୍ଡିଜ ସମ୍ମୁଖରେ ୩୯୫ ରନ୍ର ବିଜୟ ଲକ୍ଷ୍ୟ ଧାର୍ଯ୍ୟ ହୋଇଥିଲା। ଜବାବରେ ଓ୍ବେଷ୍ଟଇଣ୍ଡିଜ ରବିବାର ପଞ୍ଚମ ଦିବସରେ ୧୨୭.୩ ଓଭରରେ ୭ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରି ନେଇଥିଲା। ଟେଷ୍ଟରେ ଏହା ପଞ୍ଚମ ସର୍ବବୃହତ୍ ଓ ଏସିଆରେ ସର୍ବବୃହତ ଚେଜ୍ ସାବ୍ୟସ୍ତ ହୋଇଛି।
ଚତୁର୍ଥ ଦିବସର ଅସମାପ୍ତ ଦ୍ୱିତୀୟ ଇନିଂସ ସ୍କୋର ୧୧୦/୩ରୁ ଓ୍ବେଷ୍ଟଇଣ୍ଡିଜ ଖେଳ ଆରମ୍ଭ କରିଥିଲା। ଓଭରନାଇଟ୍ ବ୍ୟାଟ୍ସମ୍ୟାନ କାଇଲ ମେୟର୍ସ ୩୭ ରନରୁ ଖେଳ ଆରମ୍ଭ କରି ୨୧୦ ରନ କରି ଅପରାଜିତ ରହିବା ସହ ଦଳକୁ ବିଜୟୀ କରାଇଥିଲେ। ସେହିପରି ଏନକ୍ରୁମା ବୋନର ୧୫ ରନରୁ ଖେଳ ଆରମ୍ଭ କରି ୮୬ ରନର ଅର୍ଦ୍ଧଶତକୀୟ ଇନିଂସ ଖେଳି ଆଉଟ ହୋଇଥିଲେ। ମେୟର୍ସ ପାଖାପାଖି ୭ ଘଣ୍ଟା କ୍ରିଜ୍ରେ ରହି ୩୧୦ଟି ବଲ୍ର ସମ୍ମୁଖୀନ ହୋଇ ୨୦ ଚୌକା ଓ ୭ ଛକା ମାରିଥିଲେ। ପ୍ରଥମ ଇନିଂସରେ ମେୟର୍ସ ୪୦ ରନ ସଂଗ୍ରହ କରିଥିଲେ। ଫଳରେ ସେ ମ୍ୟାଚ୍ରେ ମୋଟ ଉପରେ ୨୫୦ ରନ ସଂଗ୍ରହ କରିଛନ୍ତି। ପଦାର୍ପଣରେ ଏହା ଓ୍ବେଷ୍ଟଇଣ୍ଡିଜ ପାଇଁ ଦ୍ୱିତୀୟ ସର୍ବାଧିକ ସ୍କୋର ସାବ୍ୟସ୍ତ ହୋଇଛି। ଚତୁର୍ଥ ଉଇକେଟରେ ମେୟର୍ସ ଓ ଏନ୍କ୍ରୁମା ୨୧୬ ରନ ସଂଗ୍ରହ କରି ବାଂଲାଦେଶ ବୋଲରଙ୍କୁ ନିରାଶ କରିଥିଲେ। ଦଳ ତରଫରୁ ଅନ୍ୟମାନଙ୍କ ମଧ୍ୟରେ ଜେର୍ମାଇନ୍ ବ୍ଲାକଉଡ୍ ୯, ଉଇକେଟକିପର ବ୍ୟାଟ୍ସମ୍ୟାନ ଜୋଶୁଆ ଡା ସିଲ୍ଭା ୨୦ ରନ କରି ଆଉଟ ହୋଇଥିଲେ। କେମର ରୋଚ ଖାତା ଖୋଲିପାରି ନ ଥିଲେ। ରାହକିମ କର୍ନଓ୍ବାଲ ବିନା ସ୍କୋରରେ ଅପରାଜିତ ରହିଥିଲେ। ଶନିବାର ଓପନର ତଥା ଅଧିନାୟକ କ୍ରେଗ୍ ବ୍ରାଥ୍ଓ୍ବେଟ ୨୦, ଜନ୍ କ୍ୟାମ୍ପ୍ବେଲ ୨୩ ଓ ଶାନେ ମୋସ୍ଲି ୧୨ ରନ କରି ଆଉଟ ହୋଇଥିଲେ। ବୋଲିଂରେ ବାଂଲାଦେଶ ତରଫରୁ ମେହିଦୀ ହାସନ ମିରାଜ ସର୍ବାଧିକ ୪, ତାଇଜୁଲ ଇସ୍ଲାମ ୨ ଓ ନୟିମ ହାସନ ଗୋଟିଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ବାଂଲାଦେଶ ପ୍ରଥମ ଇନିଂସ- ୧୫୦.୨ ଓଭରରେ ୪୩୦ ଅଲଆଉଟ୍
ଓ୍ବେଷ୍ଟଇଣ୍ଡିଜ ପ୍ରଥମ ଇନିଂସ- ୯୬.୧ ଓଭରରେ ୨୫୯ ଆଲଆଉଟ୍
ବାଂଲାଦେଶ ଦ୍ୱିତୀୟ ଇନିଂସ- ୬୭.୫ ଓଭରରେ ୨୨୩/୮ (ଇନିଂସ ଘୋଷଣା)
ଓ୍ବେଷ୍ଟଇଣ୍ଡିଜ ଦ୍ୱିତୀୟ ଇନିଂସ- ୧୨୭.୩ ଓଭରରେ ୩୯୫/୭
(ବୋନର- ୮୬, ମେୟର୍ସ- ୨୧୦*, ମିରାଜ- ୪/୧୧୩, ତାଇଜୁଲ- ୨/୯୧, ନୟିମ- ୧/୧୦୫)।
