କେନ୍ଦୁଝର,୨୭ା୩(ସ୍ବ.ପ୍ର.):ଦେଶର ରାଜଧାନୀ ନୂଆଦିଲ୍ଲୀରେ କେନ୍ଦୁଝର ଜିଲାର ଆଦିବାସୀ ଝିଅ କୃତିତ୍ୱ ଅର୍ଜନ କରିଛନ୍ତି। କେନ୍ଦୁଝର ଜିଲା ସଦର ବ୍ଲକ୍ର ରାଜବନ୍ଧ ଗ୍ରାମର ଝିଅ ତୁହିନା ମାର୍ଡି ଦିଲ୍ଲୀ ଜୁଡିସିଆଲ ସର୍ଭିସ (ଡିଜେଏସ) ପରୀକ୍ଷାରେ ଅନୁସୂଚିତ ଜାତି ବର୍ଗରେ ପ୍ରଥମ ସ୍ଥାନ ଗ୍ରହଣ କରି ଜିଲା ପାଇଁ ଗୌରବ ଆଣିଛନ୍ତି। ସେ ଦିଲ୍ଲୀ ଉଚ୍ଚ ନ୍ୟାୟାଳୟ ପକ୍ଷରୁ କରାଯାଇଥିବା ଡିଜେଏସ ପରୀକ୍ଷା ୨୦୨୨ ରେ ପରୀକ୍ଷା ଦେଇଥିଲେ।
ଜିଲା ନାଲକୋ ନଗରରେ ଥିବା ଦିଲ୍ଲୀ ପବ୍ଲିକ ସ୍କୁଲରୁ ୨୦୦୯ରେ ପାସ କରିଥିବା ବେଳେ ନ୍ୟାସନାଲ ଲ କଲେଜ କଟକରେ ବିବିଏ-ଏଲଏଲବିରେ ୨୦୧୪ରେ ପାସ କରିଥିଲେ। ପରେ ଇନସୋଲଭେନ୍ସି ଆଣ୍ଡ ବ୍ୟାଙ୍କରପ୍ଟସି ବୋର୍ଡ ଅଫ ଇଣ୍ଡିଆରେ ଗ୍ରୁପ ବି ମ୍ୟାନେଜର ଭାବରେ ଚାକିରି ଆରମ୍ଭ କରିଥିଲେ। ତାଙ୍କ ବାପା ସୁନାରାମ ମାର୍ଡି ଜଣେ ଅବସରପ୍ରାପ୍ତ ପବ୍ଲିକ ସେକ୍ଟର କମ୍ପାନୀର ଅଧିକାରୀ ହୋଇଥିବା ବେଳେ ସେ ଛଅ ବର୍ଷ ବୟସରେ ମା’ଙ୍କୁ ହରାଇଥିଲେ। ସୁନାରାମଙ୍କ ଦୁଇ ପୁଅ ଥିବା ବେଳେ ତୁହିନା ଏକ ମାତ୍ର ଝିଅ ଅଟନ୍ତି। କୃତକାର୍ଯ୍ୟ ଖବର ପାଇବା ପରେ ଅତ୍ୟନ୍ତ ଖୁସି ଥିବା ତୁହିନା କହିଛନ୍ତି। ଗତ ୬ ମାସ ହେଲା ପରିଶ୍ରମ କରି ପାଠ ପଡ଼ିବା ପରେ ଏହି ସଫଳତା ପାଇଲି। ପ୍ରଥମ ଥର ପରୀକ୍ଷା ଦେଇ କୃତକାର୍ଯ୍ୟ ହୋଇଛି। ଦିଲ୍ଲୀ କର୍ମସ୍ଥଳ ହେଲେ ମଧ୍ୟ ମୋର ବାପା ଓ ଓଡ଼ିଶାକୁ ଛାଡ଼ିପାରିବି ନାହିଁ। ପରିବାର ଲୋକ, ଶୁଭେଛୁମାନଙ୍କ ଆଶୀର୍ବାଦ ଯୋଗୁ ସଫଳତା ପାଇଛି ବୋଲି କହିଥିଲେ।
