ଜଣେ ଗୀତିକାର ହିସାବରେ କ୍ୟାରିୟର୍ ଆରମ୍ଭ କରିବା ପୂର୍ବରୁ ବସନ୍ତ ରାଜ୍ ପ୍ରଥମେ ଭୁବନେଶ୍ୱର ଆସି ପିଲାଙ୍କୁ ଟ୍ୟୁଶନ କରିବା ଆରମ୍ଭ କରିଥିଲେ। ତା’ପରେ ପ୍ରେସ୍ ଲାଇନ୍ରେ କାମ କଲେ। ‘ଖବରକାଗଜ’ ନାମକ ଏକ ଦୈନିକ ଖବରକାଗଜ ସହିତ ‘ଟ୍ୟୁଚ୍ଜ ଡେ’ ନାମକ ଏକ ସାପ୍ତାହିକ ପତ୍ରିକାରେ ବେଶ୍ କିଛିଦିନ କାମ କରିବା ପରେ ‘ଧରିତ୍ରୀ’ ଖବରକାଗଜରେ କାମ କରିବାର ସୁଯୋଗ ପାଇଲେ। ପ୍ରୁଫ୍ ରିଡିଂରୁ ଆରମ୍ଭ କରି ଗପ, କବିତା ଲେଖିବା, ଫିଲ୍ମ ନ୍ୟୁଜ୍ କରିବା, ବ୍ୟକ୍ତିତ୍ୱ କରିବା ସହିତ କୃଷି ପୃଷ୍ଠା ପାଇଁ ଆର୍ଟିକିଲ୍ ଲେଖିବାରେ ବି ତାଙ୍କର ରହିଥିଲା ବେଶ୍ ଦକ୍ଷତା। ସଂକ୍ଷେପରେ କହିବାକୁ ଗଲେ ସେ ଥିଲେ ଜଣେ ଅଲ୍ରାଉଣ୍ଡର୍। ଗୋଟେ ପଟେ ଖବରକାଗଜ ପାଇଁ କାମ କରୁଥିଲେ ଅନ୍ୟପଟେ ଗୀତ ଲେଖାଲେଖି ବି କରୁଥିଲେ। ପିଲାବେଳୁ ରେଡ଼ିଓରେ ଗୀତ ଶୁଣିବାର ଅଭ୍ୟାସ ହିଁ ତାଙ୍କୁ ପ୍ରେରଣା ଦେଇଥିଲା ଗୀତ ଲେଖିବାକୁ। ତାଙ୍କ ଲିଖିତ ଭଜନ ହେଉ ବା ଆଧୁନିକ ଗୀତକୁ ଯିଏ ପଢ଼ୁଥିଲେ, ସିଏ ପ୍ରଶଂସା କରିବାକୁ ପଛାଉ ନଥିଲେ। ଏମିତିରେ ବିଶିଷ୍ଟ ସଙ୍ଗୀତ ନିର୍ଦ୍ଦେଶକ ମନ୍ମଥ ମିଶ୍ରଙ୍କ ସହ ତାଙ୍କର ପରିଚୟ ହେଲା। ଆଉ ସେ ହିଁ ଏକ ଶିବ ଭଜନ କ୍ୟାସେଟ୍ ପାଇଁ ୬ଟି ଗୀତ ଲେଖିବାକୁ ପ୍ରଥମେ ତାଙ୍କୁ ସୂଯୋଗ ଦେଇଥିଲେ; ଯେଉଁଥିପାଇଁ ତାଙ୍କୁ ୩୦୦ ଟଙ୍କା ପାରିଶ୍ରମିକ ବି ମିଳିଥିଲା। ଏହି ଟଙ୍କା ପୂର୍ବ ଉପାର୍ଜିତ ଟଙ୍କା ପରି ଦୈନନ୍ଦିନ ଚଳିବା, ନୂଆ ଡ୍ରେସ୍ କିଣିବା ଆଉ ସିନେମା ଦେଖିବାରେ ତାଙ୍କର ଖର୍ଚ୍ଚ ହୋଇଥିଲା। କାରଣ ସେତେବେଳେ ୩୦୦ ଟଙ୍କାର ମୂଲ୍ୟ ଢେର୍ ଥିଲା। କିନ୍ତୁ ଉକ୍ତ କ୍ୟାସେଟ୍ଟି ସେତେ ଭଲ ବିଜ୍ନେସ୍ କରି ପାରି ନଥିଲା। ତା’ପରେ ସେ ଜେଇ କ୍ୟାସେଟ୍ ପାଇଁ ଗୋଟିଏ ଭଜନ ଲେଖିଲେ; ସେଇଟା ବି ସେତେ ମାଇଲେଜ୍ ନେଲାନାହିଁ। ତଥାପି ତାଙ୍କର ମନୋବଳ ସେମିତି ଦୃଢ଼ ଥାଏ। ତା’ପରେ ତାଙ୍କ ପାଖକୁ ଆଉ ଦୁଇଟି ଭଜନର ଅଫର୍ ଆସିଲା। ଗୋଟିଏ ଥିଲା ‘ମାଠିଆ ମୋ ଭାଙ୍ଗିଦେଲା କଳାକାହ୍ନୁ ବଡ଼ ଦଗାଦିଆ…’ ଏବଂ ଅନ୍ୟଟି ‘ମୋତେ ଚନ୍ଦନ ପାଣିରେ ଗୋଧୋଇ ଦିଅଲୋ ମୁଁ କାଳିଆ ପାଖକୁ ଯାଉଛି…’। ଏହି ଦୁଇଟି ଭଜନ ଏତେ ହିଟ୍ ହେଲା ଯେ, ତା’ ପରଠୁ ତାଙ୍କୁ ଲଗାତାର ଅଫର୍ ମିଳିଚାଲିଲା ଆଉ ସିଏ ଗୋଟିଏ ପରେ ଗୋଟିଏ ହିଟ୍ ଭଜନ ଶ୍ରୋତାଙ୍କୁ ଭେଟି ଦେଇ ଚାଲିଲେ। କାମର ଚାପ ବଢ଼ିବାରୁ ସିଏ ବାଧ୍ୟ ହୋଇ ପ୍ରେସ୍ ଲାଇନ୍ ଛାଡ଼ି ଗୀତିକାର ଜୀବନକୁ ଉଭୟ ନିଶା ଓ ପେସା କରିଦେଲେ। ଭଜନ ସହିତ ଆଧୁନିକ ଗୀତ ବି ଲେଖିଲେ। ‘ଏ ଗଉରା ଆଜିକାଲି କ’ଣ ଖାଉଛୁ…’ ହେଉଛି ତାଙ୍କ ଲିଖିତ ଏକ ସୁପର୍ହିଟ୍ ଆଲବମ୍ ଗୀତ। ତା’ପରେ ଫିଲ୍ମ ପାଇଁ କାମ କଲେ। ‘ସୁହାଗ ସିନ୍ଦୂର’ ଚଳଚ୍ଚିତ୍ରର ‘ନାଲି ଟୋପିବାଲା ତୋର ଚାଲି ଇଂଲିଶି…’ ଗୀତଟି ସେତେବେଳେ ବେଶ୍ ମାଇଲେଜ୍ ନେଇଥିଲା। ତା’ପରଠୁ ଆଜିଯାଏ ପ୍ରତିବର୍ଷ ଅତି କମ୍ରେ ୨/୩ଟି ଫିଲ୍ ଗୀତ ତାଙ୍କର ହିଟ୍ ତାଲିକାରେ ରହିଆସୁଛି। ଯେମିତିକି ଏବେ ହିଟ୍ ତାଲିକାରେ ରହିଛି ‘ସୁନ୍ଜରା ସୁନ୍ଜରା…’, ‘ହାଏ ତୋ ପ୍ରେମ ଗଜଲ୍ ଗଜଲ୍…’, ‘ହାଏ ତୋ ପ୍ରେମର ରଙ୍ଗୋଲି…’ ଇତ୍ୟାଦି। ତେବେ କେବଳ ଗୀତିକାର ନୁହେଁ, ସଂଳାପକାର ଭାବେ ବି ତାଙ୍କର ଆଉ ଏକ ପରିଚୟ ରହିଛି। ‘ଚାନ୍ଦିନୀ ଆଇ ମିସ୍ ୟୁ’, ‘ମୋ ଦୁନିଆ ତୁ ହି ତୁ’, ‘ଛାତି ତଳେ ଡିଂ ଡଂଗ୍’ ପରି କେତେକ ଚଳଚ୍ଚିତ୍ର ପାଇଁ ସେ ସ୍କ୍ରିପ୍ଟ ମଧ୍ୟ ଲେଖିଛନ୍ତି। ତା’ଛଡ଼ା ଏଇ ୩/୪ ବର୍ଷ ହେବ ସଙ୍ଗୀତ ନିର୍ଦ୍ଦେଶନା କ୍ଷେତ୍ରରେ ସିଏ ପାଦ ଥାପିଛନ୍ତି। ‘ଇ-ଟାଇମ୍’ ନାମରେ ତାଙ୍କର ଏକ ୟୁଟ୍ୟୁବ୍ ଚ୍ୟାନେଲ୍ ମଧ୍ୟ ରହିଛି। -ଅମ୍ବ୍ରିତା
