ପାଟନା,୪।୬: ବିହାରର ରାଜଧାନୀ ପାଟନାରେ ଜୁନ ୨ ତାରିଖ ବିଳମ୍ୱିତ ସଂଧ୍ୟାରେ ଖାନ ସାରଙ୍କ କୋଚିଂ ସେଣ୍ଟର ଉପରେ ହୋଇଥିବା ଆକ୍ରମଣ ମାମଲାରେ ଏକ ନୂଆ ମୋଡ଼ ଆସିଛି। ସୋସିଆଲ ମିଡିଆରେ ଗୁଳିବିନିମୟର ଏକ ଭିଡିଓ ବେଶ ଭାଇରାଲ ହେବାରେ ଲାଗିଛି, ଯାହାକି ଏହି ବିବାଦ ସମୟର ବୋଲି କୁହାଯାଉଛି। ଭିଡିଓରେ ସ୍ପଷ୍ଟ ଦେଖିବାକୁ ମିଳୁଛି ଯେ ଦୁଇ ଜଣ ବ୍ୟକ୍ତି ବନ୍ଧୁକରେ ଗୁଳି ଲୋଡ କରି ବ୍ଲ୍ାଙ୍କ୍ ଫାୟାରିଂ କରୁଛନ୍ତି। ଏହି ବ୍ୟକ୍ତିମାନେ ଖାନ ସାରଙ୍କ ବଡିଗାର୍ଡ (ସୁରକ୍ଷାକର୍ମୀ) ବୋଲି କୁହାଯାଉଛି। ଏହି ଭିଡିଓ ସାମ୍ନାକୁ ଆସିବା ପରେ ସମ୍ପୂର୍ଣ୍ଣ ମାମଲା ଏବେ ଭିନ୍ନ ଆଡ଼କୁ ଗତି କରିଛି।
ଖାନ ସାରଙ୍କ କୋଚିଂ ସେଣ୍ଟର ଉପରେ ହୋଇଥିବା ଆକ୍ରମଣ ଘଟଣାରେ ପୋଲିସ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ପୋଲିସ ‘ଜ୍ଞାନ ବିନ୍ଦୁ’ କୋଚିଂ ସେଣ୍ଟରର ନିର୍ଦ୍ଦେଶକ ରୌଶନ ଆନନ୍ଦ ଏବଂ ତାଙ୍କର ଦୁଇ ସହଯୋଗୀ ଅଭିଷେକ ଓ ଗୌରବଙ୍କୁ ଗିରଫ କରିଛି। ବୁଧବାର ସଂଧ୍ୟାରେ ତିନିଜଣଙ୍କୁ ପାଟନା ସିଭିଲ କୋର୍ଟରେ ହାଜର କରାଯାଇଥିଲା, ଯେଉଁଠାରୁ ଅଦାଲତ ସେମାନଙ୍କୁ ବିଚାର ବିଭାଗୀୟ ହାଜତକୁ ବେଉର ଜେଲ୍କୁ ପଠାଇ ଦେଇଛନ୍ତି। କୋର୍ଟରେ ହାଜର ହେବା ପୂର୍ୱରୁ ଏଲଏନ୍ଜେପି (LNJP) ହସ୍ପିଟାଲରେ ତିନିଜଣଙ୍କର ମେଡିକାଲ ଚେକଅପ ମଧ୍ୟ କରାଯାଇଥିଲା।
ନିଜ ଗିରଫଦାରୀ ଉପରେ ପ୍ରତିକ୍ରିୟା ପ୍ରକାଶ କରି ରୌଶନ ଆନନ୍ଦ କହିଛନ୍ତି, ପୋଲିସ ଏହା ସ୍ପଷ୍ଟ କରିସାରିଛି ଯେ ସେଠାରେ କୌଣସି ଗୁଳି ଚାଲିନଥିଲା। ଏହା ମୋତେ ଏବଂ ମୋର ଅନୁଷ୍ଠାନକୁ ବଦନାମ କରିବା ପାଇଁ ଏକ ସୁଚିନ୍ତିତ ଚକ୍ରାନ୍ତ। ମୋତେ ଏହି ଘଟଣା ବିଷୟରେ କୌଣସି ସୂଚନା ସୁଦ୍ଧା ନଥିଲା। ମୁଁ ଅସୁସ୍ଥ ଅଛି, କିଡନୀ ରୋଗରେ ପୀଡ଼ିତ ଏବଂ ଗତବର୍ଷ ହିଁ ମୋର ଅପରେସନ ହୋଇଥିଲା।
ଏହି ସମ୍ପୂର୍ଣ୍ଣ ବିବାଦର ସୂତ୍ରପାତ ଖାନ ସାରଙ୍କ କୋଚିଂ ସେଣ୍ଟରର ସୁରକ୍ଷାକର୍ମୀ (ଗାର୍ଡ) ଙ୍କ ସହ ହୋଇଥିବା ମାଡ଼ପଟରୁ ଆରମ୍ଭ ହୋଇଥିବା କୁହାଯାଉଛି। ଅଭିଯୋଗ ହୋଇଛି ଯେ କିଛି ଦୁର୍ୱୃତ୍ତ କୋଚିଂ ପରିସର ମଧ୍ୟକୁ ପଶି ଖାନ ସାରଙ୍କ ଗାର୍ଡଙ୍କୁ ର୍ନିଦ୍ଦୟ ଭାବେ ମାଡ଼ ମାରିଥିଲେ, ଯାହା ପରେ ପରିସ୍ଥିତି ବେଶ ଉତ୍ତେଜନାପୂର୍ଣ୍ଣ ହୋଇପଡ଼ିଥିଲା। ଏହି ଆକ୍ରମଣ ଏବଂ ମାଡ଼ପିଟର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ପୋଲିସ ତତ୍ପରତା ପ୍ରକାଶ କରି ଗିରଫଦାରୀ କରିଛି। ବର୍ତ୍ତମାନ ପୋଲିସ ଏହି ମାମଲାର ସମସ୍ତ ଦିଗ ଏବଂ ଏହି ଚକ୍ରାନ୍ତ ପଛର ପ୍ରକୃତ କାରଣର ଗହନ ତଦନ୍ତ କରୁଛି।