ଭୁବନେଶ୍ୱର, ୩।୧୨ (ବ୍ୟୁରୋ): ହକି ବିଶ୍ୱକପ୍ ପାଇଁ ସଜେଇ ହେଉଛି ରାଜଧାନୀ। ସୌନ୍ଦର୍ଯ୍ୟକରଣ ସହିତ ସହରର ପାର୍କିଂ ବ୍ୟବସ୍ଥାକୁ ସଜାଡ଼ିବାକୁ ଅଣ୍ଟା ଭିଡ଼ିଛି ବିଏମ୍ସି। ଏହି କ୍ରମରେ ନୂଆ ଏୟାରପୋର୍ଟ ଛକଠାରୁ ଫାୟାର ଷ୍ଟେଶନ ଛକ ପର୍ଯ୍ୟନ୍ତ ନୋ ପାର୍କିଂ ଏରିଆ ଚିହ୍ନଟ କରାଯାଇଛି। ଏହି ରାସ୍ତାରେ ଗାଡ଼ି ପାର୍କିଂ ବାରଣ କରାଯାଇଛି। ଏନେଇ ଶୁକ୍ରବାର ବିଏମ୍ସି ପକ୍ଷରୁ ମାଇକ ଯୋଗେ ଲୋକଙ୍କୁ ସଚେତନ କରାଯାଇଛି। ନୂଆ ଏୟାରପୋର୍ଟ ଛକଠାରୁ ଓୟୁଏଟି, ଡେଲ୍ଟା ଛକ ଦେଇ ଫାୟାର ଷ୍ଟେଶନ ପର୍ଯ୍ୟନ୍ତ ରାସ୍ତାକୁ ନୋ ପାର୍କିଂ ଏରିଆ ଭାବେ ଚିହ୍ନଟ କରାଯାଇଛି। ତେଣୁ ଏହି ସ୍ଥାନଗୁଡିକରେ ଗାଡି ପାର୍କିଂ କଲେ କମିଶନରେଟ୍ ପୋଲିସ୍ ଗାଡ଼ି ଉଠାଇନେବ ବୋଲି ବିଜ୍ଞପ୍ତି ଜାରି କରିଛି। ଏଥିସହ ଜରିମାନା ଏବଂ ଆବଶ୍ୟକ ପଡିଲେ ସମ୍ପୃକ୍ତ ଦୋକାନ, ମଲ୍, ଆପାର୍ଟମେଣ୍ଟ ଏବଂ ସରକାରୀ, ବେସରକାରୀ ଅନୁଷ୍ଠାନକୁ ସିଲ୍ ମଧ୍ୟ କରାଯିବ ବୋଲି ସୂଚନା ଦିଆଯାଇଛି। ଏହିସବୁ ଅଞ୍ଚଳରେ ଥିବା ଅନୁଷ୍ଠାନ ବା ଦୋକାନକୁ ଆସୁଥିବା ଲୋକମାନେ ରାସ୍ତା କଡ଼ରେ ଗାଡ଼ି ପାର୍କିଂ କରିପାରିବେ ନାହିଁ। ସମ୍ପୃକ୍ତ ଅନୁଷ୍ଠାନ ବା ପ୍ରତିଷ୍ଠାନର ଥିବା ପାର୍କିଂ ସ୍ଥଳରେ ହିଁ ଗାଡି ପାର୍କିଂ ହେବ। ଯେଉଁମାନଙ୍କର ପାର୍କିଂ ବ୍ୟବସ୍ଥା ନ ଥିବ ସେମାନଙ୍କ ଦୋକାନ ସିଲ୍ କରାଯିବ ବୋଲି ସୂଚନା ଦିଆଯାଇଛି। ନୋ ପାର୍କିଂ ସ୍ଥାନରେ ଗାଡ଼ି ରଖିବାରୁ ଶୁକ୍ରବାର ପ୍ରାୟ ୩୦ଟି ଗାଡ଼ିକୁ ପୋଲିସ ଉଠାଇ ନେଇଛି। ବିଏମ୍ସି ଡେପୁଟି କମିଶନର (ରେଭିନ୍ୟୁ) ସପନ କୁମାର ନନ୍ଦ, ଟୁଇନ୍ସିଟି ଟ୍ରାଫିକ୍ ଡିସିପି ଠାକୁର ପ୍ରସାଦ ପାତ୍ର ଏବଂ ଅନ୍ୟାନ୍ୟ ଅଧିକାରୀ ଉପସ୍ଥିତ ରହି ଲୋକଙ୍କୁ ସଚେତନ କରିବା ସହ ସ୍ଥିତି ପରଖିଥିଲେ।
ଅପରପକ୍ଷେ ଭୁବନେଶ୍ୱର ସ୍ମାର୍ଟସିଟି ଲିମିଟେଡ (ବିଏସ୍ସିଏଲ୍) ପକ୍ଷରୁ ମଧ୍ୟ ଶହୀଦନଗରର ବିଭିନ୍ନ ସ୍ଥାନରେ ରାସ୍ତା କଡ଼ରେ ଗାଡ଼ି ପାର୍କିଂ ପାଇଁ ବାରଣ କରାଯାଇଛି। ଆଇଡିବିଆଇ ବ୍ୟାଙ୍କ ଛକରୁ ଭେଟେନାରୀ କଲେଜ୍, ଏମ୍ଫାୟର୍ସ ହୋଟେଲ ଦେଇ ଜାତୀୟ ରାଜପଥ ପର୍ଯ୍ୟନ୍ତ ଯାଇଥିବା ରାସ୍ତାକଡ଼, ଆଲୋକ ଭାରତୀ ବିଲ୍ଡିଂଠାରୁ ଶହୀଦନଗର ଦୁର୍ଗାପୂଜା ମଣ୍ଡପ ଦେଇ ଯାଇଥିବା ରାସ୍ତାକଡ଼, ଜନପଥ କଡ଼ରେ ଥିବା କଲ୍ୟାଣ ଜୁଏଲର୍ସରୁ ସ୍ପର୍ଶ ହସ୍ପିଟାଲ, ତୃପ୍ତି ସର୍ଭିସ ଷ୍ଟେଶନଠାରୁ ଶହୀଦନଗର ପ୍ରବେଶ ପଥ ପର୍ଯ୍ୟନ୍ତ ରାସ୍ତାକୁ ନୋ ପାର୍କିଂ ଚିହ୍ନଟ କରାଯାଇଛି। ଏନେଇ ବିଏସ୍ସିଏଲ୍ ପକ୍ଷରୁ ବିଏମ୍ସିକୁ ଚିଠି କରାଯାଇଥିବାବେଳେ ଆସନ୍ତା ୨/୩ ଦିନ ମଧ୍ୟରେ ଏହାକୁ କାର୍ଯ୍ୟକାରୀ କରାଯିବ ବୋଲି ସୂଚନା ଦିଆଯାଇଛି। ଅନ୍ୟପକ୍ଷରେ ଭୁବନେଶ୍ୱର ସ୍ମାର୍ଟସିଟି ଲିମିଟେଡ୍ (ବିଏସ୍ସିଏଲ) ପରିଚାଳନା ନିର୍ଦ୍ଦେଶକ ବଲଓ୍ବନ୍ତ ସିଂହ, ଅତିରିକ୍ତ ପୋଲିସ୍ କମିଶନର ଉମାଶଙ୍କର ଦାସଙ୍କ ସମେତ ବିଏସସିିଏଲ୍ ଅନ୍ୟ ବରିଷ୍ଠ ଅଧିକାରୀମାନେ ଶୁକ୍ରବାର ରାଜଧାନୀର ଦୁଇଟି ବହୁତଳ ପାର୍କିଂସ୍ଥଳ ପରିଦର୍ଶନ କରିଛନ୍ତି। ଶହୀଦନଗର ଓ ରାଜମହଲ ସ୍ଥିତ ଉଭୟ ପାର୍କିଂ ସ୍ଥଳ ପୂର୍ଣ୍ଣ କାର୍ଯ୍ୟକ୍ଷମ ହେବା ପୂର୍ବରୁ ଅଧିକାରୀମାନେ ଏଠାରେ ପହଞ୍ଚତ୍ ବିଭିନ୍ନ ଦିଗରୁ ସମୀକ୍ଷା କରିଛନ୍ତି।
