ଭଞ୍ଜନଗର,୮ା୨(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ବସଷ୍ଟାଣ୍ଡରେ ରବିବାର ଅପରାହ୍ନରେ ଏକ ଘରୋଇ ବସ୍ରେ ହଠାତ୍ ଇଞ୍ଜିନରେ ନିଆଁ ଲାଗିଯାଇଥିଲା। ଫଳରେ ବସ୍ରେ ବସିଥିବା ଯାତ୍ରୀମାନେ ଭୟଭୀତ ହୋଇ ବସ୍ରୁ ଏଣେ ତେଣେ ବାହାରିବା ପାଇଁ ଚେଷ୍ଟା କରୁଥିଲେ। ସେଠାରେ ଉପସ୍ଥିତ ଲୋକେ ମଧ୍ୟ ଯାତ୍ରୀମାନଙ୍କୁ ଉଦ୍ଧାର କରିବାରେ ସାହାଯ୍ୟ କରିଥିଲେ।
ଏହି ସମୟରେ ଗାଡ଼ିଚାଳକ ଉପସ୍ଥିତ ବୁଦ୍ଧି ଖଟାଇ ତୁରନ୍ତ ଗାଡ଼ିରେ ଥିବା କାର୍ବନ ଡାଇଅକ୍ସାଇଡ୍ ଗ୍ୟାସ ସିଲିଣ୍ଡର୍ ବ୍ୟବହାର କରିବା ଦ୍ୱାରା ନିଆଁକୁ ନିୟନ୍ତ୍ରଣ କରାଯାଇଥିଲା। ଡ୍ରାଇଭର ଜଣଙ୍କ ନିଜର ଉପସ୍ଥିତି ବୁଦ୍ଧି ଖଟାଇବା ଦ୍ବାରା ଏକ ବଡ଼ ଧରଣର ବିପଦକୁ ରୋକାଯାଇପାରିଛି। ଏହି ଘଟଣା ବସ୍ଷ୍ଟାଣ୍ଡରେ କିଛି ଆତଙ୍କ ଖେଳାଇ ଦେଇଥିଲା।
ଘଟଣାରୁ ପ୍ରକାଶ ଯେ, ଘରୋଇ ବସ୍ଟି ଫୁଲବାଣୀରୁ ଆଜି ବ୍ରହ୍ମପୁର ଯାଉଥିଲା। ବାଟରେ ଭଞ୍ଜନଗର ବସ୍ଷ୍ଟାଣ୍ଡରେ ବସ୍ଟି କିଛି ସମୟ ଅଟକି ଥିଲା। ଏହି ସମୟରେ ବସର ଇଞ୍ଜିନ ତଳୁ ନିଆଁ ବାହାରୁଥିବା ବସଷ୍ଟାଣ୍ଡରେ ଉପସ୍ଥିତ ଥିବା ଅନ୍ୟ ଯାତ୍ରୀମାନେ ଦେଖି ପାଟି କରିଥିଲେ। ଏହାପରେ ଚାଳକ ତୁରନ୍ତ ନିଜ ସିଟରୁ ଓହ୍ଲାଇ କାର୍ବନ ଡାଇଅକ୍ସାଇଡ ଗ୍ୟାସ ପ୍ରୟୋଗ କରି ନିଆଁକୁ ନିୟନ୍ତ୍ରଣ କରିଥିଲେ। ବସ୍ରେ ଥିବା କାର୍ବନ ଡାଇଅକ୍ସାଇଡ୍ ଏବଂ ଚାଳକଙ୍କ ଉପସ୍ଥିତି ବୁଦ୍ଧି ହିଁ ଏକ ବଡ଼ଧରଣର ବିପଦକୁ ରୋକାଯାଇପାରିଛି। ଏହାପରେ ବସ ଯାତ୍ରୀମାନଙ୍କୁ ଅନ୍ୟ ଗାଡିରେ ବ୍ରହ୍ମପୁର ପଠାଇବା ବ୍ୟବସ୍ଥା କରାଯାଇଥିଲା। ଗରମ ଯୋଗୁ ଇଞ୍ଜିନରେ ନିଆଁ ଲାଗିଥିବା ଆଶଙ୍କା କରାଯାଉଛି।
