ଚୌଦ୍ୱାର,୨୯।୧(ଡି.ଏନ୍.ଏ.): ଚୌଦ୍ୱାର ଚାରବାଟିଆ ସ୍ଥିତ ଆଭିଏସନ ରିସର୍ଚ୍ଚ ସେଣ୍ଟର(ଏଆର୍ସି) ପରିସରରେ ଭୟାବହ ଅଗ୍ନିକାଣ୍ଡ ଘଟିଛି। ଅପରାହ୍ନ ୨ଟା ଠାରୁ ନିଆଁ ଲାଗିଥିବାବେଳେ ଖବର ଲେଖା ହେବା ପର୍ଯ୍ୟନ୍ତ ନିଆଁ ଲିଭା କାର୍ଯ୍ୟ ଜାରି ରହିଥିବା ଜଣାପଡିଛି। କଟକ, ଚୌଦ୍ୱାର ଓ ଏଆର୍ସିର ନିଜସ୍ବ ମୋଟ୍ ୫ଟି ଦମକଳ ଗାଡି ନିଆଁ ଲିଭାରେ ନିୟୋଜିତ ହୋଇଛି। ମିଳିଥିବା ସୂଚନା ଅନୁଯାୟୀ, ଏଆର୍ସି ପରିସରରେ ଥିବା ଅନାବନା ଗଛ ଓ ଶୁଖିଲା କାଜୁ ଜଙ୍ଗଲରେ କୌଣସି କାରଣରୁ ନିଆଁ ଲାଗିଯାଇଥିଲା। ପବନ ହେବାରୁ ଧୀରେଧୀରେ ଏହି ନିଆଁ ପ୍ରାୟ ୧୨ ଏକର ଅଞ୍ଚଳକୁ ବ୍ୟାପି ଯାଇଥିଲା। ଏଥି ସହିତ କର୍ମଚାରୀ ରହୁଥିବା କ୍ୱାର୍ଟର୍ସ ଆଡକୁ ମଧ୍ୟ ନିଆଁ ବ୍ୟାପିଥିବା ଜଣାପଡିଛି। ଅଗ୍ନିକାଣ୍ଡର କାରଣ ଅସ୍ପଷ୍ଟ ଥିବାବେଳେ ଏଥିରେ ଜୀବନ ହାନି ହୋଇ ନ ଥିବା ଜଣାପଡିଛି।
