ଓ୍ବାଶିଂଟନ୍,୨୪।୧: ଫିନଲାଣ୍ଡ ଏବଂ ସ୍ବିଡେନ ନାଟୋରେ ଯୋଗଦେବାକୁ ପ୍ରସ୍ତୁତ ବୋଲି ଆମେରିକାର ବୈଦେଶିକ ବିଭାଗ ଏକ ବିବୃତ୍ତିରେ କହିଛି। ସ୍ବରାଷ୍ଟ୍ର ବିଭାଗର ମୁଖପାତ୍ର ନେଡ ପ୍ରାଇସ କହିଛନ୍ତି, ଏକ ପବିତ୍ର ଗନ୍ଥ ଜାଳିବା, ଯେଉଁଥିରେ ଅନେକ ଲୋକଙ୍କର ବିଶ୍ୱାସ ରହିଛି ତାହା ଅତ୍ୟନ୍ତ ଅପମାନଜନକ କାର୍ଯ୍ୟ। ଆଇନଗତ ଭାବରେ କିଛି ଠିକ ହୋଇପାରେ କିନ୍ତୁ ସ୍ବିଡେନ ନାଟୋରେ ଯୋଗଦେବାକୁ ଏବେ ବି ପ୍ରସ୍ତୁତ। ଆମେରିକାର ଏହି ବିବୃତ୍ତି ତୁର୍କୀ ରାଷ୍ଟ୍ରପତି ରିସେପ ତାଇପ ଏରଦୋଗାନଙ୍କ ବିବୃତ୍ତି ପରେ ଆସିଛି। ରିସେପ କହିଥିଲେ ଯେ, ତୁର୍କୀ ଦୂତାବାସ ନିକଟରେ ବିରୋଧ ପ୍ରଦର୍ଶନ ପରେ ତୁର୍କୀ ସମର୍ଥନରେ ସ୍ବିଡେନ ନାଟୋରେ ସାମିଲ ଆଶା କରିବା ବୃଥା।
ସ୍ବିଡେନରେ ଥିବା ତୁର୍କୀ ଦୂତାବାସ ବାହାରେ ହୋଇଥିବା ବିରୋଧ ସମୟରେ ସ୍ବିଡେନର ଦକ୍ଷିଣପନ୍ଥୀ ନେତା ରସମୁସ ପାଲୁଦାନ ପବିତ୍ର କୋରାନର ଏକ କପି ପୋଡି ଦେଇଛନ୍ତି। ତୁର୍କୀ ଏବଂ ଅନ୍ୟାନ୍ୟ ମୁସଲମାନ ଦେଶ ଏହାକୁ ତୀବ୍ର ବିରୋଧ କରିଛନ୍ତି। ଏହା ପରେ ତୁର୍କୀ ସ୍ବିଡେନର ପ୍ରତିରକ୍ଷା ମନ୍ତ୍ରୀଙ୍କ ଗସ୍ତକୁ ମଧ୍ୟ ବାତିଲ କରିଦେଇଛି। ଏହି ଗସ୍ତରେ ନାଟୋରେ ଯୋଗଦେବା ପାଇଁ ତୁର୍କୀ ଏବଂ ସ୍ବିଡେନ ମଧ୍ୟରେ ଗୁରୁତ୍ୱପୂର୍ଣ୍ଣ ଆଲୋଚନା ହେବାର ଥିଲା। ସ୍ବିଡେନର ପ୍ରତିରକ୍ଷା ମନ୍ତ୍ରୀଙ୍କ ଗସ୍ତ ବାତିଲ ହେବା ପରେ ନାଟୋରେ ସ୍ବିଡେନର ଯୋଗଦାନ ବିପଦରେ ପଡ଼ିଥିଲା। ତେବେ ତୁର୍କୀର ବିରୋଧକୁ ଅତିକ୍ରମ କରି ସ୍ବିଡେନ ଏବଂ ଫିନଲାଣ୍ଡକୁ ଶୀଘ୍ର ନାଟୋରେ ସାମିଲ କରାଯାଇପାରିବ ବୋଲି ଆମେରିକା କହିଛି।
ସୂଚନାଯୋଗ୍ୟ, ସ୍ବିଡେନ ଏବଂ ଫିନଲାଣ୍ଡ ଦୀର୍ଘ ଦିନ ଧରି ନାଟୋର ସଦସ୍ୟ ହେବାକୁ ଚେଷ୍ଟା କରିଆସୁଛନ୍ତି। ତେବେ ତୁର୍କୀର ଆପତ୍ତି ଯୋଗୁ ସ୍ବିଡେନର ଏହି ସ୍ବପ୍ନ ପୂରଣ ହେଉନାହିଁ। ନାଟୋର ସଦସ୍ୟ ହେବାକୁ ଏହାର ସମସ୍ତ ସଦସ୍ୟ ଦେଶର ଅନୁମୋଦନ ଆବଶ୍ୟକ। ଏହି କାରଣରୁ ତୁର୍କୀର ବିନା ସମର୍ଥନରେ ସ୍ବିଡେନ ନାଟୋର ସଦସ୍ୟ ହୋଇପାରିବ ନାହିଁ। ଏକ ଅଲଗା ଦେଶର ଚାହିଦା ପାଇଁ ତୁର୍କୀ ବିରୋଧରେ କୁର୍ଦ୍ଦିସ୍ତାନ ୱାର୍କିଂ ପାର୍ଟି ସଂଗ୍ରାମ କରୁଛି। ତୁର୍କୀ ଅଭିଯୋଗ କରିଛି, ସ୍ବିଡେନ ସରକାର କୁର୍ଦ୍ଦିସ୍ତାନ ୱାର୍କିଂ ପାର୍ଟିକୁ ସମର୍ଥନ କରୁଛନ୍ତି। ଏଥି ସହ ତୁର୍କୀ ଦାବି କରୁଛି ଯେ ସ୍ବିଡେନ ସରକାର ରାଷ୍ଟ୍ରପତି ରିସେପ ତାଇପ ଏରଡାନଙ୍କ ସମାଲୋଚକମାନଙ୍କୁ ଦେଶରୁ ବିତାଡିତ କରନ୍ତୁ। ତେବେ, ସାର୍ବଭୌମତ୍ୱ ତଥା ବାକ ସ୍ବାଧୀନତାର ଅଧିକାର ହେତୁ ସ୍ବିଡେନ ତୁର୍କୀର ଏହି ଦାବିକୁ ଗ୍ରହଣ କରୁନାହିଁ।
