ନୂଆଦିଲ୍ଲୀ,୯।୧୧: ଏବେ ଦୀପାବଳି ପାଇଁ ଆଉ ଦୁଇ ଦିନ ବାକି ଅଛି। ଏହି ପର୍ବ ସମଗ୍ର ଦେଶରେ ଖୁବ ଧୁମଧାମରେ ପାଳନ କରାଯାଏ। ଆଲୋକର ଏହି ପର୍ବରେ ଲୋକମାନେ ଫାୟାର୍ କ୍ରାକର ଜାଳି ବା ବାଣ ଫୁଟାଇ ଉତ୍ସବ ପାଳନ କରିଥାଆନ୍ତି। ତେବେ ଦିଲ୍ଲୀ ଏନସିଆର, ମୁମ୍ବାଇ ପରି ଅନେକ ଅଞ୍ଚଳରେ ପ୍ରଦୂଷଣ ବୃଦ୍ଧି ହେତୁ ଏଥର ଦୀପାବଳି ବାଣ ଫୁଟାଇବା ଉପରେ ପ୍ରତିବନ୍ଧକ ଲଗାଯାଇଛି। ସୁପ୍ରିମକୋର୍ଟଙ୍କ ନିକଟରେ ହୋଇଥିବା ନିଷ୍ପତ୍ତିରେ ଫାୟାରଫ୍ରାକର ଜାଳିବା ଉପରେ ନିଷେଧାଦେଶ ଦିଆଯାଇଛି।
ଗତ ମଙ୍ଗଳବାର ଦିନ ସୁପ୍ରିମକୋର୍ଟ ବାରିୟମ ଯୁକ୍ତ ଫାୟାରକ୍ରାକର ଉପରେ ନିଷେଧାଦେଶ ଜାରି କରିଛନ୍ତି। ବାରିୟମ ଧାରଣ କରିଥିବା ଫାୟାରକ୍ରାକର ଉପରେ ନିଷେଧାଦେଶ ଦେଇଥିବା ଆଦେଶ ପ୍ରତ୍ୟେକ ରାଜ୍ୟ ପାଇଁ ପ୍ରଯୁଜ୍ୟ ବୋଲି ସର୍ବୋଚ୍ଚ ନ୍ୟାୟାଳୟ କହିଛନ୍ତି। ଏହା କେବଳ ଦିଲ୍ଲୀ-ଏନସିଆର ଅଞ୍ଚଳରେ ସୀମିତ ନୁହେଁ।
ବାଣ ଫୁଟାଇବା ଉପରେ ପ୍ରତିବନ୍ଧକ ଲଗାଇବାକୁ ବିଚାରାଧୀନଥିବା ଆବେଦନପତ୍ରରେ ଦାଖଲ ହୋଇଥିବା ଏକ ହସ୍ତକ୍ଷେପ ଆବେଦନ ଉପରେ ସର୍ବୋଚ୍ଚ ନ୍ୟାୟାଳୟ ଶୁଣାଣି କରିଥିଲେ। ଦୀପାବଳି ଏବଂ ବିବାହ ସମୟରେ ଉଦୟପୁର ସହରରେ ବାୟୁ ଏବଂ ଶବ୍ଦ ପ୍ରଦୂଷଣକୁ ଯାଞ୍ଚ କରିବା ପାଇଁ ପଦକ୍ଷେପ ଗ୍ରହଣ କରିବାକୁ ରାଜସ୍ଥାନ ସରକାରଙ୍କୁ ଆବେଦନ କରାଯାଇଥିଲା। ଏହା ଶୁଣି ଜଷ୍ଟିସ ଏସ ବୋପାନ୍ନା ଏବଂ ଜଷ୍ଟିସ ଏମ ସୁନ୍ଦରେଶଙ୍କ ଏକ ବେଞ୍ଚ ରାଜସ୍ଥାନ ସରକାରଙ୍କୁ ଦୀପାବଳି ସମୟରେ ବାଣ ଫୁଟାଇବାର ପୂର୍ବ ନିର୍ଦ୍ଦେଶ ପାଳନ କରିବାକୁ କହିଥିଲେ।
ବାଣ ଫୁଟିବାର କ୍ଷତିକାରକ ପ୍ରଭାବ ବିଷୟରେ ସାଧାରଣ ଲୋକଙ୍କୁ ସଚେତନ କରିବା ଜରୁରୀ ବୋଲି ସର୍ବୋଚ୍ଚ ନ୍ୟାୟାଳୟ କହିଛନ୍ତି। ବିଡମ୍ବନାର ବିଷୟ ଯେ ଆଜିକାଲି ପିଲାମାନେ ଅଧିକ ବାଣ ଫୁଟାଉ ନ ଥିବା ବେଳେ ବରଂ ବୟସ୍କମାନେ ଅଧିକ ବାଣ ଫୁଟାଉଥିବା ଦେଖାଯାଇଛି। ଏକ ଭୁଲ ଧାରଣା ଅଛି ଯେ ପ୍ରଦୂଷଣ ଏବଂ ପରିବେଶ ସୁରକ୍ଷା ବିଷୟରେ ଏହା କେବଳ କୋର୍ଟର କର୍ତ୍ତବ୍ୟ। ଏଥିରେ ଜନତାଙ୍କୁ ଆଗକୁ ଆସିବାକୁ ପଡିବ। ବାୟୁ ଏବଂ ଶବ୍ଦ ପ୍ରଦୂଷଣକୁ ପରିଚାଳନା କରିବା ସମସ୍ତଙ୍କ କାମ।
ଅକ୍ଟୋବର ୨୦୨୧ର ନିର୍ଦ୍ଦେଶରେ କୋର୍ଟ ସବୁଜ କ୍ରାକର ଫୁଟାଇବାକୁ ଅନୁମତି ଦେଇଥିଲେ। ସବୁଜ କ୍ରାକରଗୁଡିକ ଏପରି କ୍ରାକର ଯାହା କ୍ଷତିକାରକ ରାସାୟନିକ ପଦାର୍ଥ ଧାରଣ କରେ ନାହିଁ। ବିପଜ୍ଜନକ ଉପାଦାନ ବଦଳରେ, ସବୁଜ କ୍ରାକରଗୁଡ଼ିକରେ ଉପାଦାନ ଥାଏ ଯାହାକି କମ ବିପଜ୍ଜନକ ଏବଂ ପରିବେଶ ପାଇଁ କମ କ୍ଷତିକାରକ। ଏହି କ୍ରାକରଗୁଡିକ କମ କ୍ଷତିକାରକ ରାସାୟନିକ ପଦାର୍ଥ ନିର୍ଗତ କରେ ଏବଂ ଜଳୀୟ ବାଷ୍ପ ମଧ୍ୟ ଛାଡିଥାଏ, ଯାହା ଧୂଳି ଦମନ କରିଥାଏ।
