ଭୁବନେଶ୍ୱର,୧୪।୨: ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ)ର ଆଞ୍ଚଳିକ କାର୍ଯ୍ୟାଳୟ ଭୁବନେଶ୍ୱର ପକ୍ଷରୁ ସୋମବାର ଆର୍ଥିକ ସାକ୍ଷରତା ସପ୍ତାହ-୨୦୨୩ର ଆୟୋଜନ କରାଯାଇଥିଲା। ଏପରିକି ଚଳିତ ବର୍ଷର ଆର୍ଥିକ ସାକ୍ଷରତା ସପ୍ତାହର ଉଦ୍ଘାଟନ ଉତ୍ସବ ଆରବିଆଇର ଭୁବନେଶ୍ୱର ଆଞ୍ଚଳିକ କାର୍ଯ୍ୟାଳୟଠାରେ ଅନୁଷ୍ଠିତ ହୋଇଯାଇଛି। ଏହି ପରିପ୍ରେକ୍ଷୀରେ ଆରବିଆଇ, ରାଜ୍ୟ ସରକାର, ନାବାର୍ଡ, ଏସ୍ବିଆଇ ସମେତ ଅନ୍ୟାନ୍ୟ ବ୍ୟାଙ୍କଗୁଡିକର ବରିଷ୍ଠ ଅଧିକାରୀମାନେ ମଧ୍ୟ ଯୋଗ ଦେଇଥିଲେ। ବିଶେଷ କରି ଉକ୍ତ ଉତ୍ସବ ଜରିଆରେ ବରିଷ୍ଠ ଅଧିକାରୀମାନେ ଜନସାଧାରଣଙ୍କ ମଧ୍ୟରେ ଆର୍ଥିକ ସଚେତନତା ବିସ୍ତାର କରିବାର ଉପାୟଗୁଡିକ ବିଷୟରେ ବିସ୍ତୃତ ଭାବେ ଆଲୋଚନା କରାଯାଇଥିଲା। ଉଲ୍ଲେଖଯୋଗ୍ୟ ଆର୍ବିଆଇର ଆର୍ଓ ଭୁବନେଶ୍ୱର ପକ୍ଷରୁ ସାରା ରାଜ୍ୟରେ ବିଭିନ୍ନ ଆର୍ଥିକ ସଚେତନତା ସମ୍ବନ୍ଧୀୟ କାର୍ଯ୍ୟକ୍ରମ ଆୟୋଜନ କରିବ।
ସୂଚନାଯୋଗ୍ୟ ୨୦୧୬ରୁ ଆରବିଆଇ ଗୁରୁତ୍ୱପୂର୍ଣ୍ଣ ଆର୍ଥତ୍କ ବାର୍ତ୍ତାଗୁଡିକର ପ୍ରସାର ପାଇଁ ପ୍ରତି ବର୍ଷ ଆର୍ଥତ୍କ ସାକ୍ଷରତା ସପ୍ତାହ ଆୟୋଜନ କରିଆସୁଛି। ଚଳିତ ବର୍ଷର ଆର୍ଥିକ ସାକ୍ଷରତା ସପ୍ତାହ ପାଇଁ ‘ସଠିକ୍ ଆର୍ଥିକ ଆଚରଣ,ରଖେ ଆପଣଙ୍କ ସୁରକ୍ଷାର ଧ୍ୟାନ’ ଶୀର୍ଷକ ବିଷୟବସ୍ତୁର ଆୟୋଜନ କରାଯାଇଥିଲା। ଯେଉଁଥିରେ ସଞ୍ଚୟ, ଯୋଜନା, ବଜେଟ ଏବଂ ଡିଜିଟାଲ୍ ଆର୍ଥିକ ସେବାଗୁଡିକର ବୁଝିବିଚାରି ବ୍ୟବହାର ଉପରେ ଗୁରୁତ୍ୱ ଦିଆଯାଇଛି, ଯାହାକି ଆର୍ଥିକ ଶିକ୍ଷା ଜାତୀୟ ରଣନୀତି ୨୦୨୦-୨୫ର ମୁଖ୍ୟ ଉଦ୍ଦେଶ୍ୟ ସହ ମେଳ ଖାଉଛି। ଉକ୍ତ ବିଷୟବସ୍ତୁ ଉପରେ ଅତ୍ୟାବଶ୍ୟକ ଆର୍ଥିକ ସଚେତନତା ବାର୍ତ୍ତା ପ୍ରସାରଣ କରିବା ପାଇଁ ଆରବିଆଇ ଚଳିତ ବର୍ଷ ଫେବୃୟାରୀ ଶେଷ ସୁଦ୍ଧା ଏକ କେନ୍ଦ୍ରୀୟ ଗଣମାଧ୍ୟମ ଅଭିଯାନ କରିବ। ଏପରିକି ଆରବିଆଇର ଆଞ୍ଚଳିକ କାର୍ଯ୍ୟାଳୟଗୁଡିକ ମଧ୍ୟ ବିଭିନ୍ନ ଆର୍ଥିକ ସାକ୍ଷରତା ଶିବିରର ଆୟୋଜନ କରିବ ବୋଲି ମୁଖ୍ୟାଳୟ ପକ୍ଷରୁ କୁହାଯାଇଛି। ଏହି ଉଦ୍ଦେଶ୍ୟରେ ବିଷୟବସ୍ତୁ ଏବଂ ବାର୍ତ୍ତା ପ୍ରଚାରକୁ ଉତ୍ସାହିତ କରିବାରେ ବିଭିନ୍ନ ହିତାଧିକାରୀଙ୍କ ଉଦ୍ୟମ ପାଇଁ ଅନୁରୋଧ କରାଯାଉଛି।
