ଜେନିଭା,୨୦।୧୧(ଏପି): ମହିଳା ଖେଳାଳିଙ୍କ ମାତୃତ୍ୱ ଅଧିକାରର ସୁରକ୍ଷା ପାଇଁ ନୂଆ ନିୟମ ଜାରି କରାଯିବ ବୋଲି ବିଶ୍ୱ ଫୁଟବଲର ସର୍ବୋଚ୍ଚ ପ୍ରଶାସନିକ ସଂସ୍ଥା ଫିଫା ଘୋଷଣା କରିଛି। ଏହି ନିୟମ ଅନୁସାରେ ମହିଳା ଖେଳାଳିଙ୍କୁ କ୍ଲବଗୁଡିକ ଅତିକମ୍ରେ ୧୪ ସପ୍ତାହର ମାତୃତ୍ୱ ଛୁଟି ଦେବେ ଓ ଖେଳାଳିଙ୍କ ପୂରା ପାଉଣାର ଦୁଇ ତୃତୀୟାଂଶ ଦେବେ। ଏ ନେଇ ଫିଫା କ୍ଲବଗୁଡିକୁ ନିର୍ଦ୍ଦେଶ ଦେବେ। କେବେଳ ସେତିକ ନୁହେଁ କ୍ଲବ୍ଗୁଡିକ ମା’ ହେବା ପରେ ମହିଳା ଖେଳାଳିଙ୍କୁ ଫୁବବଲ କାର୍ଯ୍ୟକଳାପରେ ପୁଣି ସାମିଲ କରିବାକୁ ଯତ୍ନବାନ ହେବା ସହ ସେମାନଙ୍କୁ ମେଡିକାଲ ସପୋର୍ଟ ଦେବାକୁ ଫିଫା କହିଛି।
ମା’ ହେବାକୁ ଯାଉଥିବା ଖେଳାଳିଙ୍କ ଚୁକ୍ତି ଶେଷ କଲେ କ୍ଲବଗୁଡକ ଉପରେ ବଡ଼ ଆକାରରେ ଜରିମାନା ଧାର୍ଯ୍ୟ କରାଯିବ। କେବଳ ସେତିକି ନୁହେଁ ଏହି କ୍ଲବ୍ଗୁଡିକୁ ଟ୍ରାନ୍ସଫର ମାର୍କେଟରୁ ଗୋଟିଏ ବର୍ଷ ବାସନ୍ଦ କରାଯିବ। ପିଲା ଜନ୍ମ ହେବା ପୂର୍ବରୁ ଓ ପରେ ଖେଳାଳିଙ୍କ ସୁରକ୍ଷା ପାଇଁ ଏଭଳି ନିୟମର ଆବଶ୍ୟକତା ରହିଛି ବୋଲି ଫିଫା ମୁଖ୍ୟ ଲିଗାଲ ଅଫିସର ଏମିଲିଓ ଗାର୍ସିଆ କହିଛନ୍ତି। ୨୦୧୯ ମହିଳା ଫିଫା ବିଶ୍ୱକପ୍ର ସଫଳତା ପରେ ଆଗଧାଡିର କ୍ଲବଗୁଡିକ ମହିଳା ଦଳଗୁଡକ ଉପରେ ପ୍ରଧାନ୍ୟ ଦେଉଛନ୍ତି।
ଗତବର୍ଷ ବିଶ୍ୱକପ୍ ଜିତିଥିବା ଆମେରିକା ଫରଓ୍ବାର୍ଡ ଆଲେକ୍ସ ମୋର୍ଗାନ ମା’ ହେବାର ୪ ମାସ ପରେ ଗତ ସେପ୍ଟେମ୍ବରରେ ଟୋଟେନହାମ ସହିତ ଚୁକ୍ତି କରିଥିଲେ। ସେ ଚଳିତ ମାସ ତାଙ୍କର ପ୍ରଥମ ମ୍ୟାଚ୍ ଖେଳିଛନ୍ତି। ଆସନ୍ତା ମାସରେ ଫିଫା କାଉନସିଲ ଏହି ନିୟମକୁ ଅନୁମୋଦନ କରିବ ଓ ଏହା ଜାନୁୟାରୀ ପହିଲାରୁ କାର୍ଯ୍ୟକାରୀ ହେବ। ପିଲା ଜନ୍ମ ହେବାପରେ ଅତି କମ୍ରେ ୮ ସପ୍ତାହ ଛୁଟି ଦେବା ଉପରେ ଗୁରୁତ୍ୱ ଦିଆଯାଇଛି।
