ଆର୍ଲିଂଟନ,୧୫ା୭:୨୦୧୦ ସଂସ୍କରଣ ଚାମ୍ପିୟନ ସ୍ପେନ ୧୬ ବର୍ଷର ବ୍ୟବଧାନ ପରେ ଫାଇନାଲରେ ପ୍ରବେଶ କରିଛି। ମଙ୍ଗଳବାର ଚଳିତ ଫିଫା ବିଶ୍ୱକପ୍ର ପ୍ରଥମ ସେମିଫାଇନାଲରେ ସ୍ପେନ ୨-୦ ଗୋଲରେ ଫ୍ରାନ୍ସକୁ ପରାସ୍ତ କରିଛି। ଅନ୍ୟପକ୍ଷରେ ଫ୍ରାନ୍ସ ତୃତୀୟ ଥର ସେମିଫାଇନାଲରୁ ବିଦାୟ ନେଇଛି। ୧୯୯୮ ଓ ୨୦୧୮ ସଂସ୍କରଣର ଚାମ୍ପିୟନ ଫ୍ରାନ୍ସ ୧୯୮୨ ଓ ୧୯୮୬ ସଂସ୍କରଣରେ ସେମିଫାଇନାଲରେ ପରାଜିତ ହୋଇଥିଲା। ଆସନ୍ତା ରବିବାର ହେବାକୁ ଥିବା ଫାଇନାଲରେ ସ୍ପେନ କାହାକୁ ଭେଟିବ, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।
ଫିଫା ମୁଖ୍ୟ ଜିଆନି ଇନ୍ଫାଣ୍ଟିନୋଙ୍କ ସମେତ ୭୦,୧୭୬ ଦର୍ଶକଙ୍କ ଉପସ୍ଥିତିରେ ଡାଲାସ ଷ୍ଟାଡିୟମରେ ଅନୁଷ୍ଠିତ ପ୍ରଥମ ସେମିଫାଇନାଲ ମ୍ୟାଚ୍ର ୨୧ତମ ମିନିଟ୍ରେ ବକ୍ସ ମଧ୍ୟରେ ସ୍ପେନର ଲାମିନେ ୟାମାଲଙ୍କୁ ଫ୍ରାନ୍ସର ଲୁକାସ ଡିଗନେ ଫାଉଲ ମାରିଥିଲେ। ଏଥିଯୋଗୁ ପେନାଲ୍ଟି ଜରିଆରେ ସ୍ପେନକୁ ମିଳିଥିବା ସୁବର୍ଣ୍ଣ ସୁଯୋଗକୁ ମିକେଲ ଓୟାରଜାବାଲ ଗୋଲରେ କନଭର୍ଟ କରିଥିଲେ। ଚଳିତ ବିଶ୍ୱକପ୍ରେ ଏହା ତାଙ୍କର ପଞ୍ଚମ ଗୋଲ ଥିଲା। ୩୮ତମ ମିନିଟ୍ରେ ସ୍ପେନର ଫାବିଆନ ରୁଇଜଙ୍କୁ ଏକ ଭଲ ସୁଯୋଗ ମିଳିଥିଲେ ସୁଦ୍ଧା ଫାଇଦା ଉଠାଇ ପାରି ନ ଥିଲେ। ଏଥିଯୋଗୁ ସ୍ପେନ ପ୍ରଥମାର୍ଦ୍ଧ ସୁଦ୍ଧା ୧-୦ ଗୋଲରେ ଆଗରେ ରହିଥିଲା। ଦ୍ୱିତୀୟାର୍ଦ୍ଧର ୫୮ତମ ମିନିଟ୍ରେ ପେଡ୍ରୋ ପୋରୋ ବକ୍ସ ପାଖରେ ଥିବା ଡାନି ଓଲମୋଙ୍କୁ ପାସ ଦେଇ ବକ୍ସ ମଧ୍ୟକୁ ଦୌଡ଼ି ଯାଇଥିଲେ। ପରେ ଓଲମୋଙ୍କଠାରୁ ବଲ ନେଇ ପୋରୋ ଗୋଲ ସ୍କୋର କରିଥିଲେ। ୬୧ତମ ମିନିଟ୍ରେ ୟାମାଲ ଏକ ଗୋଲ କରିଥିଲେ, ହେଲେ ତାହାକୁ ରେଫରି ଅଫ୍ ସାଇଡ୍ ଦର୍ଶାଇଥିଲେ।
Dharitri – Odisha’s No.1 Odia Daily
