ଓ୍ବାଶିଂଟନ୍,୧୦।୬: ଆମେରିକାସରେ ହେବାକୁ ଥିବା ଫିଫା ବିଶ୍ୱକପ୍ର ୨୩ତମ ସଂସ୍କରଣ ଲାଗି ଖେଳାଳିଙ୍କୁ କଡ଼ା ଶୃଙ୍ଖଳା ମଧ୍ୟରେ ରହିବାକୁ ପଡ଼ିବ। ସମୟ ନଷ୍ଟ ଓ ଇଞ୍ଜୁରି ବାହାନା ଭଳି ସମସ୍ୟାର ସମାଧାନ ପାଇଁ ଫିଫା ପକ୍ଷରୁ ବିଶ୍ୱକପ୍ ଲାଗି କଡ଼ା ନିୟମାବଳୀ ପ୍ରସ୍ତୁତ କରାଯାଇଛି।
ସମୟ ନଷ୍ଟରୁ ବର୍ତ୍ତିବା ପାଇଁ ନିୟମ
୫ ସେକେଣ୍ଡ କାଉଣ୍ଟଡାଉନ: ପ୍ରତ୍ୟେକ ଥର ଗୋଲ କିକ୍ ଓ ଥ୍ରୋ-ଇନ୍ ବେଳେ ରେଫରି ୫ ସେକେଣ୍ଡରେ କାଉଣ୍ଟଡାଉନ ଆରମ୍ଭ କରିବେ। ଯଦି କୌଣସି ଦଳ ଥ୍ରୋ-ଇନ ବେଳେ ୫ ସେକେଣ୍ଡରୁ ଅଧିକ ସମୟ ନିଅନ୍ତି, ତେବେ ବଲକୁ ପ୍ରତିପକ୍ଷ ଦଳକୁ ଦିଆଯିବ। ସେହିଭଳି ଗୋଲ କିକ୍ କ୍ଷେତ୍ରରେ ବିଳମ୍ବ ହେଲେ ପ୍ରତିପକ୍ଷ ଦଳକୁ ଏକ କର୍ନର କିକ୍ ଦିଆଯିବ।
୮ ସେକେଣ୍ଡ ଗୋଲକିପର ନିୟମ: ମ୍ୟାଚ୍ ଚାଲିଥିବା ବେଳେ ଗୋଲକିପରଙ୍କୁ ବଲ ଧରିବାର ୮ ସେକେଣ୍ଡ ମଧ୍ୟରେ ବଲ ଛାଡ଼ିବାକୁ ପଡ଼ିବ। ଏଥିରେ ଅବହେଳା ହେଲେ ପ୍ରତିପକ୍ଷ ଦଳକୁ ଏକ କର୍ନର କିକ୍ ଦିଆଯିବ।
ସବ୍ଷ୍ଟିଟ୍ୟୁଶନ ସମୟ: ସବ୍ଷ୍ଟିଚ୍ୟୁଟ ହେବାକୁ ଯାଉଥିବା ବିଦାୟୀ ଖେଳାଳିଙ୍କୁ ପଡ଼ିଆ ଛାଡ଼ିବା ପାଇଁ ମାତ୍ର ୧୦ ସେକେଣ୍ଡ ସମୟ ମିଳିବ। ଯଦି ବିଦାୟୀ ଖେଳାଳି ପଡ଼ିଆ ଛାଡ଼ିବା ପାଇଁ ୧୦ ସେକେଣ୍ଡରୁ ଅଧିକ ସମୟ ନିଅନ୍ତି, ତେବେ ପଡ଼ିଆକୁ ଆସିବାକୁ ଥିବା ଖେଳାଳିଙ୍କୁ ପେନାଲ୍ଟି ବାବଦକୁ ୬୦ ସେକେଣ୍ଡ ଅପେକ୍ଷା କରିବାକୁ ପଡ଼ିବ। ଏହାର ଅର୍ଥ ୧ ମିନିଟ୍ ପାଇଁ ଦଳକୁ ୧୦ ଖେଳାଳିଙ୍କ ସହିତ ଖେଳିବାକୁ ପଡ଼ିବ।
ଫିଲ୍ଡରେ ମେଡିକାଲ ନିୟମ
ଇଞ୍ଜୁରି ପାଇଁ ୧ ମିନିଟ୍: ଯଦି କୌଣସି ଫିଲ୍ଡରେ ଆହତ ହୁଅନ୍ତି ଏବଂ ତାଙ୍କୁ ମେଡିକାଲ ଚିକିତ୍ସାର ଆବଶ୍ୟକତା ପଡ଼େ, ତେବେ ତାଙ୍କୁ ତୁରନ୍ତ ଫିଲ୍ଡ ଛାଡ଼ିବାକୁ ପଡ଼ିବ। ଏଥିସହିତ ପଡ଼ିଆକୁ ଫେରିବା ପାଇଁ ତାଙ୍କୁ ଏକ ମିନିଟ୍ ଅପେକ୍ଷା କରିବାକୁ ପଡ଼ିବ।
ଟାକ୍ଟିକାଲ ଟାଇମଆଉଟ୍ସ ବ୍ୟାନ: ଗୋଲକିପର ଆହତ ହେବାର ବାହାନ କଲା ବେଳେ ଦଳୀୟ ଖେଳାଳି କୋଚ୍ଙ୍କ ନିର୍ଦ୍ଦେଶ ଲାଗି ଟଚ୍ଲାଇନ ପର୍ଯ୍ୟନ୍ତ ଯାଇପାରିବେ ନାହିଁ। ଏଭଳି କାର୍ଯ୍ୟ ଉପରେ ପ୍ରତିବନ୍ଧକ ଲଗାଯାଇଛି। ଯଦି କୌଣସି ଦଳ ଏହାର ଉଲ୍ଲଂଘନ କରେ, ତେବେ କଡ଼ା କାର୍ଯ୍ୟାନୁଷ୍ଠାନ ହେବ।
ଶୃଙ୍ଖଳାଗତ କାର୍ଯ୍ୟାନୁଷ୍ଠାନ
ପାଟି ଲୁଚାଇବା ବ୍ୟାନ: ଖେଳାଳିମାନେ ପଡ଼ିଆରେ ପ୍ରତିପକ୍ଷ ଖେଳାଳିଙ୍କ ସହ ଯୁକ୍ତିତର୍କ କିମ୍ବା ହାତାହାତି ଭଳି ପରିସ୍ଥିତିରେ ହାତ କିମ୍ବା ବାହୁ କିମ୍ବା ଶାର୍ଟ ଜରିଆରେ ପାଟି ଲୁଚେଇ ପାରିବେ ନାହିଁ। ଏଭଳି କଲେ ଖେଳାଳିଙ୍କୁ ସିଧାସଳଖ ରେଡ୍ କାର୍ଡ ଦିଆଯିବ।
ଶାର୍ଟ ଖୋଲିଲେ ୟେଲୋ କାର୍ଡ: ଯଦି କୌଣସି ଖେଳାଳି ସେଲିବ୍ରେଶନ ବେଳେ ସମ୍ପୂର୍ଣ୍ଣ ରୂପେ ଶାର୍ଟ ଖୋଲନ୍ତି, ତେବେ ତାଙ୍କୁ ଅତ୍ୟଧିକ ସେଲିବ୍ରେଶନ କରିବା ପାଇଁ ଗୋଟିଏ ୟେଲୋ କାର୍ଡ ଦିଆଯିବ। ଯଦି ଗୋଟିଏ ୟେଲୋ କାର୍ଡ ପାଇଥିବା ଖେଳାଳି ଶାର୍ଟ ଖୋଲନ୍ତି, ତେବେ ତାଙ୍କୁ ଦ୍ୱିତୀୟ ୟେଲୋ ଓ ରେଡ କାର୍ଡ ଦିଆଯିବ।
ଭାର ପରିସୀମାରେ ବୃଦ୍ଧି
କର୍ନର କିକ୍ ଓ ଫାଉଲ ରିଭ୍ୟୁ: ଭୁଲ ବଶତଃ ଦିଆଯାଇଥିବା କର୍ନର କିକ୍ସ ଓ ଆଟାକିଂ ଫାଉଲକୁ ଭାର ଜରିଆରେ ରିଭ୍ୟୁ ଏବଂ ଠିକ୍ କରାଯାଇପାରିବ।
ଦ୍ୱିତୀୟ ୟେଲୋ: ଭାର ମାଧ୍ୟମରେ ଅନୁଚିତ ଟାକେଲ ବେଳେ ଦିଆଯାଇଥିବା ୟେଲୋ କାର୍ଡକୁ ରେଡ୍ କାର୍ଡ ପରିଣତ କରାଯାଇପାରିବ।
ୟେଲୋ କାର୍ଡ ରିସେଟ୍: କୌଣସି ଖେଳାଳିଙ୍କୁ ଗୋଟିଏ ୟେଲୋ କାର୍ଡ ମିଳିଥିଲେ, ତାହା ୩ ମ୍ୟାଚ୍ ବିଶିଷ୍ଟ ଗ୍ରୁପ୍ ପର୍ଯାୟ ଶେଷରେ ବାତିଲ ହୋଇଯିବ। ଫଳରେ ରାଉଣ୍ଡ-୩୨କୁ ଉନ୍ନୀତ ହୋଇଥିବା ପ୍ରତ୍ୟେକ ଦଳର ସମସ୍ତ ଖେଳାଳି କ୍ଲିନ ସ୍ଲେଟ୍ ସହ ଖେଳିବେ।
ଦ୍ୱିତୀୟ ରିସେଟ୍: କ୍ୱାର୍ଟର ଫାଇନାଲ ପରେ ଦ୍ୱିତୀୟ ଥର ପାଇଁ ଖେଳାଳିଙ୍କ ଶୃଙ୍ଖଳାଗତ ସ୍ଲେଟ୍କୁ କ୍ଲିନ କରାଯିବ। ଯାହା ଫଳରେ ରାଉଣ୍ଡ ଅଫ୍-୩୨ କିମ୍ବା ରାଉଣ୍ଡ ଅଫ୍-୧୬ରେ ଗୋଟିଏ ୟେଲୋ କାର୍ଡ ପାଇଥିବା ଖେଳାଳି ଫାଇନାଲରୁ ବଞ୍ଚିତ ହେବେ ନାହିଁ।