ପୁରୁଷୋତ୍ତମପୁର,୧୨।୫(ଡି.ଏନ୍.ଏ.): ମହାମାରୀ କରୋନାକୁ ନେଇ ଲକ୍ଡାଉନ୍ ଯୋଗୁ ବୁଲା ଗୋରୁଗାଈଙ୍କୁ ଖାଦ୍ୟ ଯୋଗାଣ ଲାଗି ସରକାର ନିର୍ଦ୍ଦେଶ ଦେଇଛନ୍ତି। ଏହି ପରିପ୍ରେକ୍ଷୀରେ ଗଞ୍ଜାମ ଜିଲା ପୁରୁଷୋତ୍ତମପୁର ଏନ୍ଏସି ପ୍ରଶାସନ ପକ୍ଷରୁ ଖାଦ୍ୟ ଯୋଗାଣ କାର୍ଯ୍ୟକ୍ରମ ଆରମ୍ଭ ହୋଇଛି। ଏହାକୁ ନେଇ ଜନସାଧାରଣ ଏନ୍ଏସି ପ୍ରଶାସନକୁ ତୀବ୍ର ସମାଲୋଚନା କରି ଏହା କେବଳ ଲୋକ ଦେଖାଣିଆ ବୋଲି କହିଛନ୍ତି। ଗାଈ ଗୋରୁଙ୍କୁ ଗୋ-ଖାଦ୍ୟ ଦାନା କିମ୍ବା କୁଣ୍ଡା, ଘାସ ଦେବା ବଦଳରେ କାମଚଳା ନୀତିରେ ମଣିଷଙ୍କୁ ଦିଆଯାଉଥିବା ଖାଦ୍ୟ ପୁଡ଼ିଆ ଭାତ ଡାଲମା ଟିକେ ଖାଇବାକୁ ଦେଇ କାର୍ଯ୍ୟ ତୁଲାଇ ଦେଉଛନ୍ତି। ଏହି ମଣିଷ ଖାଇବା ଖାଦ୍ୟ ପୁଡ଼ିଆ ଗୋରୁଙ୍କ ପାଇଁ ସମୁଦ୍ରକୁ ଶଙ୍ଖେ ସଦୃଶ। ଏପରିକି ଏହା ଗୋରୁଙ୍କ ଲାଗି ସମ୍ପୂର୍ଣ୍ଣ ରୂପେ ଅନୁପଯୁକ୍ତ। ଜିଲାପାଳ ଓ ବରିଷ୍ଠ ପ୍ରଶାସନିକ ଅଧିକାରୀମାନେ ଏ ଦିଗରେ ଗୁରୁତ୍ୱ ଦେବାକୁ ସାଧାରଣରେ ଦାବି ହେଉଛି।
