ନୂଆଗାଁ,୭।୧୨(ଧନେଶ୍ୱର ସାହୁ)ନୟାଗଡ଼ ଜିଲା ନୂଆଗାଁ ବ୍ଲକରେ ଥିବା ଆଶ୍ରମ ସ୍କୁଲରେ ଅନେକ ଦୁର୍ନୀତି ହେଉଥିବା ନେଇ ବାରମ୍ବାର ଅଭିଯୋଗ ହୋଇଆସୁଛି। ଅଭିଯୋଗ ପରେ ଗଣମାଧ୍ୟମ ପ୍ରତିନିଧିମାନେ ସମ୍ପୃକ୍ତ ସ୍କୁଲକୁ ଯାଇ ସତ୍ୟାସତ୍ୟ ଜାଣିବା ପରେ ଖବର ପ୍ରକାଶ କରୁଛନ୍ତି । ଖବର ପ୍ରକାଶ ପାଇବା ପରେ ବିଭାଗ ପକ୍ଷରୁ ଘଟଣାର ତଦନ୍ତ କରାଯାଇ ୨ ଆଶ୍ରମ ସ୍କୁଲର ୩ ଶିକ୍ଷକଙ୍କୁ କାର୍ଯ୍ୟରୁ ନିଲମ୍ବନ କରାଯାଇଛି। ଅନ୍ୟ କେତେଜଣ ଶିକ୍ଷକଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି। ତେବେ ସ୍କୁଲର ଏପରି ଦୁର୍ନୀତି ଅଧିକାରୀଙ୍କ ମୁଣ୍ଡବ୍ୟଥାର କାରଣ ପାଲଟିଛି। ଏହାକୁ ଭିତ୍ତିକରି ଗୋହିରିବାଦୁ ଆଶ୍ରମ ସ୍କୁଲ ଭିତରକୁ ଗଣମାଧ୍ୟମ ପ୍ରତିନିଧିଙ୍କୁ ନ ଛାଡିବାକୁ ପ୍ରଧାନଶିକ୍ଷକଙ୍କୁ ନିର୍ଦ୍ଦେଶ ଦିଆଯାଇଥିବା ସୂଚନା ମିଳିଛି ା
ଅନୁସୂଚିତ ଜାତି ଓ ଜନଜାତିର ଛାତ୍ରୀଛାତ୍ରମାନେ ହଷ୍ଟେଲରେ ରହି ପାଠ ପଢିବା ପାଇଁ ଆନୁସଙ୍ଗିକ ସମସ୍ତ ସୁବିଧା ମାଗଣାରେ ସରକାର ଯୋଗାଇ ଦେଉଛନ୍ତି। ହେଲେ ସେସବୁ ସୁବିଧାସୁଯୋଗ ଛାତ୍ରୀଛାତ୍ରମାନେ ଯେତିକି ପାଉଛନ୍ତି ତା’ଠାରୁ ଅଧିକ ଲାଭବାନ୍ ହେଉଛନ୍ତି ଆଶ୍ରମ ସ୍କୁଲ ଶିକ୍ଷକ ଓ ବିଭାଗୀୟ ଅଧିକାରୀ । ହଷ୍ଟେଲ ଶୌଚାଳୟରେ ଫିନାଇଲ ପକାଇବାଠାରୁ ଆରମ୍ଭ କରି ଛାତ୍ରୀଛାତ୍ରମାନଙ୍କ ଖାଦ୍ୟ ପର୍ଯ୍ୟନ୍ତ ସବୁଥିରେ ଅନିୟମିତତା ହେଉଥିବା ଅଭିଯୋଗ ହେଉଛି । ତେବେ ସେସବୁ ଅଭିଯୋଗକୁ ତଦନ୍ତ କରି ସମ୍ପୃକ୍ତ ଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ବଦଳରେ ସେମାନଙ୍କୁ ସୁରକ୍ଷା ଦିଆଯାଉଛି। ଅଧିକାଂଶ ସମୟରେ ଗଣମାଧ୍ୟମ ପ୍ରତିନିଧିମାନେ ସ୍କୁଲକୁ ଯାଇ ବିଭିନ୍ନ ସମସ୍ୟା ଓ ଅନିୟମିତତା ସଂକ୍ରାନ୍ତରେ ଖବର ପ୍ରକାଶ କରୁଥିଲେ । ଏପରି କି ଖବର ପ୍ରକାଶ ପରେ ଡିମିରିପଲି ହାଇସ୍କୁଲର ୨ ଶିକ୍ଷକଙ୍କୁ ନିଲମ୍ବନ କରାଯାଇଥିବା ବେଳେ ଗୋହିରିବାଦୁ ଆଶ୍ରମ ସ୍କୁଲ ଛାତ୍ରୀ ହଷ୍ଟେଲରୁ ଖଟ ସମେତ ଅନ୍ୟାନ୍ୟ ସାମଗ୍ରୀ ନିଜ ଘରକୁ ନେବା ଓ ଛାତ୍ରୀମାନଙ୍କୁ ବିପଦପୂର୍ଣ୍ଣ କାର୍ଯ୍ୟରେ ନିୟୋଜିତ କରିବା ଘଟଣାରେ ଜଣେ ଶିକ୍ଷକ ନିଲମ୍ବିତ ହୋଇଛନ୍ତି ା ଏପରି ଘଟଣାକୁ ବିଭାଗୀୟ ଅଧିକାରୀ ଘଣ୍ଟ ଘୋଡାଇବା ଯାଇ ଖବର ପ୍ରକାଶ ନ କରିବା ପାଇଁ ଗଣମାଧ୍ୟମ ପ୍ରତିନିଧିଙ୍କୁ ତାଗିଦ୍ କରିଥିଲେ। ଅନ୍ୟପକ୍ଷେ ଗଣମାଧ୍ୟମ ପ୍ରତିନିଧିଙ୍କୁ ସ୍କୁଲ ଭିତରକୁ ନ ଛାଡିବା ପାଇଁ ନିର୍ଦ୍ଦେଶ ଦେଇଥିବା ଗୋହିରିବାଦୁ ସ୍କୁଲ ପ୍ରଧାନଶିକ୍ଷକ ସୁଧୀର ମହଲ କହିଛନ୍ତି ା ଗୋହିରିବାଦୁ ଆଶ୍ରମ ସ୍କୁଲରେ ନିମ୍ନମାନର ଖାଦ୍ୟ ଦେବା ସହ ଛାତ୍ରୀଛାତ୍ରମାନଙ୍କ ମଧ୍ୟରେ ଜାତିଆଣ ଭେଦଭାବ ସୃଷ୍ଟି କରାଯାଉଥିବା ନେଇ ସ୍କୁଲର ଛାତ୍ରୀଛାତ୍ରମାନେ ଗଣମାଧ୍ୟମ ପ୍ରତିନିଧି, ପୂର୍ବତନ ବିଡିଓ ସଚ୍ଚିଦାନନ୍ଦ ମିଶ୍ର ଓ ଡବ୍ଲ୍ୟୁଇଓ ଦାୟିତ୍ୱରେ ଥିବା ଜିପିଓ ସାଧୁଚରଣ ସାହୁଙ୍କୁ ଅଭିଯୋଗ କରିଥିଲେ। ସ୍କୁଲ ଛୁଟି ପୂର୍ବରୁ ଓ ପରେ କାର୍ଯ୍ୟ ଦିବସରେ ଅନୁପସ୍ଥିତ ଥିବା ଛାତ୍ରୀଛାତ୍ରଙ୍କ ଉପସ୍ଥାନ ପକାଇ ଖାଦ୍ୟ ଅନୁଦାନ ହଡପ ହେଉଛି । ଶିକ୍ଷକମାନଙ୍କୁ ସୁରକ୍ଷା ଦେବା ଓ ଦୁର୍ନୀତିକୁ ଘଣ୍ଟ ଘୋଡାଇବା ଉଦ୍ଦେଶ୍ୟରେ ଗଣମାଧ୍ୟମ ପ୍ରତିନିଧିଙ୍କୁ ସ୍କୁଲ ଭିତରେ ପଶିବା ମନା କରିବା ଘଟଣାକୁ ବୁଦ୍ଧିଜୀବିମାନେ ନିନ୍ଦା କରିବା ସହ ଆଶ୍ରମ ସ୍କୁଲ ଦୁର୍ନୀତି ବିଭାଗୀୟ ଅଧିକାରୀ ଓ ଶିକ୍ଷକମାନଙ୍କ ଭାଗିଦାରୀରେ ହେଉଛି ବୋଲି ନିଜ ନାମ ଗୋପନ ରଖି ଜଣେ ଜନ ପ୍ରତିନିଧି କହିଛନ୍ତି।
ଏ ବାବଦରେ ନୂଆଗାଁ ବିଡିଓ ବାସୁଦେବ ନାୟକଙ୍କୁ ଅବଗତ କରାଇବାରେ ଗଣମାଧ୍ୟମ ପ୍ରତିନିଧିମାନେ ପ୍ରଶାସନର ଦୃଷ୍ଟି ଆଢୁଆଳରେ ଥିବା ସ୍କୁଲର ସମସ୍ୟା ଓ ଦୁର୍ନୀତିକୁ ପ୍ରଶାସନର ଦୃଷ୍ଟିକୁ ଆଣୁଛନ୍ତି। ତେଣୁ ସେମାନେ ସ୍କୁଲ ଭିତରକୁ ଯିବାରେ କୌଣସି ଅସୁବିଧା ନାହିଁ ବୋଲି କହିଛନ୍ତି ା ଅନ୍ୟପକ୍ଷେ ବିଡିଓ ନାୟକ ଏହି ଅଭିଯୋଗର ତଦନ୍ତ କରିବାକୁ ବ୍ଲକ ସମାଜ ମଙ୍ଗଳ ଅଧିକାରୀ ଯଜ୍ଞେଶ୍ୱର ନାୟକଙ୍କୁ ଦାୟିତ୍ୱ ଦେଇଛନ୍ତି ା
