ଦାରିଙ୍ଗବାଡ଼ି, ୨୫।୯ (ଅରୁଣ ସାହୁ): ଲଘୁଚାପଜନିତ ଲଗାଣ ବର୍ଷା ଯୋଗୁ ଗତ କିଛି ଦିନ ହେଲା କନ୍ଧମାଳ ଜିଲାରେ ବିଦ୍ୟୁତ ସେବା ବାରମ୍ବାର ବାଧାପ୍ରାପ୍ତ ହେଉଛି। ଗୁରୁବାର ସନ୍ଧ୍ୟାଠାରୁ ଗଞ୍ଜାମ ଜିଲା ଭଞ୍ଜନଗର ଉପଖଣ୍ଡର କଣ୍ଟେଇପଲ୍ଲୀରୁ ଫୁଲବାଣୀକୁ ସଂଯୋଗ କରୁଥିବା ୧୩୨ କେଭି ବିଦ୍ୟୁତ ଲାଇନ ଅଚଳ ହୋଇଯିବାରୁ ସମଗ୍ର କନ୍ଧମାଳ ଜିଲାରେ ବିଦ୍ୟୁତ ସେବା ଠପ ହୋଇପଡ଼ିଥିଲା।
ତେବେ ବିଦ୍ୟୁତ ବିଭାଗର ବରିଷ୍ଠ ଅଧିକାରୀ ଓ କର୍ମଚାରୀଙ୍କ ଜୋରଦାର ପାଟ୍ରୋଲିଂ ପରେ ଲାଇନ୍ରେ ଫଲ୍ଟର କାରଣ ଜଣାପଡ଼ିଛି। ଚକାପାଦ ବ୍ଲକ ଅନ୍ତର୍ଗତ ବେହେରାଗାଁ ପଞ୍ଚାୟତର ଲଦା ପାହାଡ଼ ଉପରେ ୧୩୨ କେଭି ଟାୱାର ଲାଇନ୍ରେ ଏକ ବିରାଟକାୟ ଗଛ ଲାଗିଯିବାରୁ ଏହି ଫଲ୍ଟ ସୃଷ୍ଟି ହୋଇଥିବା ଜଣାପଡ଼ିଛି।
ଫଲ୍ଟ ତ୍ରୁଟି ଜଣାପଡ଼ିବା ପରେ ବିଦ୍ୟୁତ ବିଭାଗର କର୍ମଚାରୀମାନେ ଘଟଣାସ୍ଥଳରେ ଗଛ କାଟି ସଫା କରିବା ସହ ଲାଇନର ମରାମତି କାର୍ଯ୍ୟ ଆରମ୍ଭ କରିଛନ୍ତି। ମରାମତି କାମ ଏବେ ଶେଷ ପର୍ଯ୍ୟାୟରେ ପହଞ୍ଚିଥିବା ଜଣାପଡ଼ିଛି। ମରାମତି କାର୍ଯ୍ୟ ସମ୍ପୂର୍ଣ୍ଣ ହେବା ପରେ ଆଉ କିଛି ସମୟ ମଧ୍ୟରେ କନ୍ଧମାଳ ଜିଲ୍ଲାରେ ବିିଦ୍ୟୁତ ସେବା ସ୍ବାଭାବିକ ହୋଇଯିବ ବୋଲି ବିଭାଗ ପକ୍ଷରୁ ଆଶା ପ୍ରକାଶ କରାଯାଇଛି।
ଲଗାଣ ବର୍ଷା ମଧ୍ୟରେ ବିିଦ୍ୟୁତ ବିଭାଗର କର୍ମଚାରୀମାନେ ଦୀର୍ଘ ସମୟ ଧରି ପାଟ୍ରୋଲିଂ କରି ଫଲ୍ଟ ଖୋଜିବା ସହ ମରାମତି କାର୍ଯ୍ୟରେ ନିୟୋଜିତ ଥିବାରୁ ଶୀଘ୍ର ବିିଦ୍ୟୁତ ସେବା ସ୍ବାଭାବିକ ହେବା ନେଇ ଆଶା ସୃଷ୍ଟି ହୋଇଛି।