ପଣଜୀ, ୨୫।୯ : ଅସୁସ୍ଥ ସ୍ତ୍ରୀଙ୍କ ଦ୍ୱାରା ଦିବ୍ୟାଙ୍ଗ ଝିଅଙ୍କୁ ଖାଇବାକୁ ଦେବାରେ ସମସ୍ୟା ଉପୁଜିବାରୁ ଗୋଆର ବିପିନ କଦାମ ନାମକ ଜଣେ ବ୍ୟକ୍ତି ମା’ ରୋବୋଟ ବିକଶିତ କରିଛନ୍ତି। ରୋବୋଟ ତାଙ୍କ ଝିଅଙ୍କୁ ଖାଦ୍ୟ ଖୁଆଇ ଦେଉଛି। ଗୋଆ ଷ୍ଟେଟ ଇନୋଭେଶନ କାଉନସିଲ ବିପିନ କଦାମଙ୍କୁ ତାଙ୍କର ଏଭଳି କାର୍ଯ୍ୟ ପାଇଁ ପ୍ରଶଂସା କରିଛି। ମେସିନରେ ଅଧିକ କାର୍ଯ୍ୟ କରିବା ଏବଂ ଏହାର ବ୍ୟବସାୟିକ କାର୍ଯ୍ୟକ୍ଷମତା ଅନୁସନ୍ଧାନ ପାଇଁ ତାଙ୍କୁ ଆର୍ଥିକ ସହାୟତା ପ୍ରଦାନ କରାଯାଇଛି।
ଖାଦ୍ୟ ଏକ ପ୍ଲେଟରେ ରଖାଯାଏ ଯାହା ରୋବୋଟର ଏକ ଅଂଶ । ମା’ ରୋବୋଟ ଭଏସ କମାଣ୍ଡରେ ଝିଅ କଣ ଖାଇବାକୁ ଚାହୁଁଛି ତାହା ଜାଣି ଖୁଆଇ ଦେଇଥାଏ। କଦମ ଦକ୍ଷିଣ ଗୋଆର ପୋଣ୍ଡା ତାଲୁକା ଅନ୍ତର୍ଗତ ବେଥୋରା ଗ୍ରାମର ବାସିନ୍ଦା। ସେ ଜଣେ ଦିନ ମଜୁରିଆ ଭାବରେ କାର୍ଯ୍ୟ କରୁଛନ୍ତି। ତାଙ୍କର ୧୪ ବର୍ଷର ଝିଅ ଦିବ୍ୟାଙ୍ଗ। ସେ ନିଜେ ଖାଦ୍ୟ ଖାଇ ପାରିବେ ନାହିଁ। ସେ ଖାଦ୍ୟ ପାଇଁ ତାଙ୍କ ମା ଉପରେ ସମ୍ପୂର୍ଣ୍ଣ ନିର୍ଭରଶୀଳ ଥିଲେ।
ତେବେ ପ୍ରାୟ ଦୁଇ ବର୍ଷ ହେଲା ସ୍ତ୍ରୀ ଶଯ୍ୟାରେ ଅଛନ୍ତି। ତେଣୁ ଝିଅକୁ ଖାଇବାକୁ ଦେବା ପାଇଁ ତାଙ୍କୁ କାମରୁ ବାରମ୍ବାର ଘରକୁ ଆସିବାକୁ ପଡୁଥିଲା । ଶେଷରେ ସେ ଏହାର ଉପାୟ ଚିନ୍ତା କରି ମା’ ରେବୋଟ ବିକଶିତ କରିଥିବା କହିଛନ୍ତି। ସେ କାମ କରି ଘରକୁ ଫେରି ରୋବୋଟ ତିଆରି କାମ କରୁଥିଲେ। ଚାରିମାସ ସେ ରୋବୋଟ ଡିଜାଇନ କଲେ। ସେ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏକ ଆତ୍ମନିର୍ଭରଶୀଳ ଭାରତ ଗଠନ ପାଇଁ ପ୍ରୋତ୍ସାହିତ କରୁଛନ୍ତି। ସେହିଭଳି, ମୁଁ ମୋ ପିଲାକୁ ଆତ୍ମନିର୍ଭରଶୀଳ କରିବାକୁ ଚାହୁଁଥିଲି। ଏବେ ତାହା ସମ୍ଭବ ହୋଇଛି। କଦମ କହିଛନ୍ତି ଯେ ସେ ଅନ୍ୟ ପିଲାମାନଙ୍କ ପାଇଁ ମଧ୍ୟ ସମାନ ରୋବଟ ତିଆରି କରିବାକୁ ଚାହୁଁଛନ୍ତି। ସେ କହିଛନ୍ତି, ମୁଁ ଏହି ରୋବଟକୁ ସାରା ବିଶ୍ୱରେ ପହଞ୍ଚାଇବାକୁ ଚାହୁଁଛି।
ଗୋଆ ଷ୍ଟେଟ ଇନୋଭେଶନ କାଉନସିଲ କାଦାମଙ୍କ କାର୍ଯ୍ୟକୁ ପ୍ରଶଂସା କରିଛି ଏବଂ ରାଷ୍ଟ୍ରାୟତ୍ତ ସଂସ୍ଥା ତାଙ୍କୁ ତାଙ୍କ ରୋବଟକୁ ଆହୁରି ଉନ୍ନତ କରିବା ପାଇଁ ଆର୍ଥିକ ସହାୟତା ପ୍ରଦାନ କରୁଛି। ଏହା ସହିତ ଉତ୍ପାଦ ବିକ୍ରି ଲାଗି ବଜାର ଖୋଜିବାରେ ମଧ୍ୟ କାର୍ଯ୍ୟ କରୁଛି। ପରିଷଦର ପ୍ରକଳ୍ପ ନିର୍ଦ୍ଦେଶକ ସୁଦୀପ ଫାଲଦେସାଇ କହିଛନ୍ତି ଯେ କଦମ ଏକ ଅନନ୍ୟ ଉତ୍ପାଦ ସୃଷ୍ଟି କରିଛନ୍ତି ଯାହା ସମାନ ପରିସ୍ଥିତିର ସମ୍ମୁଖୀନ ହେଉଥିବା ଅନେକ ଲୋକଙ୍କୁ ସାହାଯ୍ୟ କରିପାରିବ। ଏହି ଉତ୍ପାଦର ମୂଲ୍ୟ ସ୍ଥିର ହୋଇ ନାହିଁ। କାରଣ ଏହାର ବ୍ୟବସାୟିକ ମୂଲ୍ୟାଙ୍କନ କରାଯିବା ବାକି ରହିଛି।
