ରାୟଗଡ଼ା ଅଫିସ,୨୫ା୮: ରାୟଗଡ଼ା ଜିଲା ଚେକାଗୁଡ଼ାଠାରେ ରହିଥିବା ଓଡ଼ିଶାର ଦ୍ୱିତୀୟ ଝୁଲାପୋଲ ନିକଟ ନାଗାବଳୀ ନଦୀରେ ଗୁରୁବାର ଏକ ବଡ଼ ଦୁର୍ଘଟଣା ଘଟିଛି। ଆନ୍ଧ୍ରପ୍ରଦେଶରୁ ଆସିଥିବା ଏକ ପରିବାର ଝୁଲାପୋଲରେ ବୁଲିବା ସହ ନାଗାବଳୀ ନଦୀ ନିକଟକୁ ଯାଇଥିବାବେଳେ ପ୍ରଖର ସ୍ରୋତରେ ୩ ପୁଅ ଭାସିଯାଇଥିଲେ। ବାପା ନିଜ ଜୀବନକୁ ବାଜି ଲଗାଇ ୨ପୁଅଙ୍କୁ ସୁରକ୍ଷିତ ଉଦ୍ଧାର କରିଥିଲେ ମଧ୍ୟ ୬ ବର୍ଷର ପୁଅ ଏ ପର୍ଯ୍ୟନ୍ତ ନିଖୋଜ ଅଛନ୍ତି।
ସୂଚନା ଅନୁଯାୟୀ, ଆନ୍ଧ୍ର ପ୍ରଦେଶର ଏଲୁରୁ ଅଞ୍ଚଳର ଗୋପାଳକ୍ରିଷ୍ଣା ରାଓ ସ୍ତ୍ରୀ ଏବଂ ୩ ପୁଅଙ୍କ ସହ ଜିଲାର ଅଧିଷ୍ଠାତ୍ରୀ ଦେବୀ ମଝିଘରିଆଣୀଙ୍କ ଦର୍ଶନ କରିଥିଲେ। ଏହାପରେ ସମସ୍ତେ ଝୁଲାପୋଲରେ ବୁଲି ନାଗାବଳୀ ନଦୀକୁ ଗାଧୋଇବାକୁ ଯାଇଥିଲେ। ଏହି ସମୟରେ ନଦୀପାଣିର ମଜା ଉଠାଇବା ସମୟରେ ବିଦ୍ୟୁତ୍ ପ୍ରବାହ ୩ ପୁଅଙ୍କୁ ଟାଣି ନେଇଥିଲା। ଏହା ଦେଖି ଗୋପାଳକ୍ରିଷ୍ଣା ସାହସର ସହ ନଦୀର ପ୍ରଖର ସ୍ରୋତ ମଧ୍ୟରୁ ୨ ପୁଅଙ୍କୁ ବଞ୍ଚାଇ ଆଣିଥିଲେ। ହେଲେ ସାନପୁଅ ଅମରେଶଙ୍କୁ ଖୋଜିବା ସମୟରେ ସେ ନିଜେ ଭାସିଯାଇଥିଲେ। ନଦୀ ମଧ୍ୟରେ ଥିବା ଏକ ପଥରକୁ ଧରି ସେ ଅଟକିଥିବାବେଳେ ଅଗ୍ନିଶମ ବାହିନୀ ପହଞ୍ଚି ତାଙ୍କୁ ଉଦ୍ଧାର କରିବାରେ ସଫଳ ହୋଇଥିଲା।
