ଜାମନଗର, ୮।୧୦: ଗୁଜରାଟ ଜାମନଗର ଜିଲାରୁ ଏକ ଦୁଃଖଦ ଖବର ସାମ୍ନାକୁ ଆସିଛି। ଜାମ ଯୋଦ୍ଧପୁର ତହସିଲ ଅନ୍ତର୍ଗତ ବରବାଲା ଗ୍ରାମରେ ଝିଅ ବଳାତ୍କାର ଶିକାର ହୋଇଥିବା ଖବର ଶୁଣି ବାପା ବିଷ ଖାଇ ଆତ୍ମହତ୍ୟା କରିଛନ୍ତି। ନାବାଳିକାଙ୍କ ବାପା ବିଷ ଖାଇ ଆତ୍ମହତ୍ୟା କରିବା ପରେ ସଂପୂର୍ଣ୍ଣ ଖବର ସାମ୍ନାକୁ ଆସିଥିଲା। ନାବାଳିକାଜଣଙ୍କ ପୋଲିସକୁ ଦେଇଥିବା ବୟାନରେ କହିଛନ୍ତି, ‘ଅଭିଯୁକ୍ତମାନେ ବାପାଙ୍କୁ ହତ୍ୟା କରିବା ଧମକ ଦେଇ ତାଙ୍କ ସହ ୨ଥର ବଳାତ୍କାର କରିଥିଲେ। ଯେତେବେଳେ ସେ ଏହି କଥା ଘରେ ଜଣାଇଥିଲେ ଏଥିରେ ମ୍ରିୟମାଣ ହୋଇ ତାଙ୍କ ବାପା ବିଷ ଖାଇ ଦେଇଥିଲେ।’ ପୋଲିସ ଏହି ଘଟଣାରେ ଏକ ମାମଲା ରୁଜୁ କରି ଅଭିଯୁକ୍ତଙ୍କୁ ଖୋଜିବା ଆରମ୍ଭ କରିଛି।
ଜଣାପଡ଼ିଛି ଯେ, ସେହି ଗ୍ରାମର ଅଶ୍ୱିନୀ ଭିମ୍ସିଭାଇ ଓ୍ବାଡିଆ ଏକ ମାସ ତଳେ ନାବାଳିକାଙ୍କ ଘରେ ପଶି ତାଙ୍କୁ ବଳାତ୍କାର କରିଥିଲେ। ଏହି କଥା ଘରେ ଜଣାଇଲେ ତାଙ୍କ ବାପାଙ୍କୁ ହତ୍ୟା କରିବେ ବୋଲି ଅଶ୍ୱିନୀ ନାବାଳିକାଙ୍କୁ ଧମକ ଦେଇଥିଲେ। ଏହାପରେ ନିକଟରେ ଅଶ୍ୱିନୀ ପୁନର୍ବାର ନାବାଳିକାଙ୍କ ଘରେ ପଶି ତାଙ୍କୁ ବଳାତ୍କାର କରିଥିଲେ। ଏଥର କିନ୍ତୁ ନାବାଳିକାଜଣଙ୍କ ଘରେ ସମସ୍ତ କଥା କହି ଦେଇଥିଲେ। କିନ୍ତୁ ଅପବାଦ ଭୟରେ ନାବାଳିକାଙ୍କ ପରିବାର ଚୁପ୍ ରହିଥିଲେ ମଧ୍ୟ ତାଙ୍କ ବାପା ମାନସିକ ଭାରସାମ୍ୟ ହରାଇ ଶେଷରେ ଆତ୍ମହତ୍ୟା କରିଛନ୍ତି।
