ନୂଆଦିଲ୍ଲୀ,୧୫।୯: ଭାରତୀୟ କ୍ରିକେଟ୍ର ନୂଆ ବିସ୍ଫୋରକ ବ୍ୟାଟର ବୈଭବ ସୂର୍ଯ୍ୟବଂଶୀଙ୍କୁ ନେଇ ଏବେ ଚାରିଆଡ଼େ ଚର୍ଚ୍ଚା। ତାଙ୍କ ଆକ୍ରମଣାତ୍ମକ ବ୍ୟାଟିଂ ଦେଖି କ୍ରିକେଟ୍ପ୍ରେମୀଙ୍କ ମନରେ ଗୋଟିଏ ପ୍ରଶ୍ନT20 ଇଣ୍ଟରନ୍ୟାଶନାଲରେ ସବୁଠୁ ଦ୍ରୁତ ଅର୍ଦ୍ଧଶତକର ବିଶ୍ୱ ରେକର୍ଡ କ’ଣ ବୈଭବ ଭାଙ୍ଗିପାରିବେ?
ବୈଭବ ଚଳିତ ବର୍ଷ ଇଂଲଣ୍ଡ ଗସ୍ତରେ ଭାରତ ପାଇଁ T20I ଡେବ୍ୟୁ କରିଥିଲେ। ତାଙ୍କ ପ୍ରଥମ ସିରିଜ ବିଶେଷ ଭଲ ନଥିଲେ ମଧ୍ୟ ଜିମ୍ବାୱେ ଗସ୍ତରେ ସେ ନିଜ ବ୍ୟାଟିଂର ଝଲକ ଦେଖାଇଥିଲେ। ସେଠାରେ ମାତ୍ର ୧୮ ବଲରେ ଅର୍ଦ୍ଧଶତକ ହାସଲ କରିଥିଲେ।
ତେବେ T20Iରେ ସବୁଠୁ ଦ୍ରୁତ ଫିଫ୍ଟି ରେକର୍ଡ ଭାଙ୍ଗିବା ପାଇଁ ବୈଭବଙ୍କୁ ଆହୁରି ଦ୍ରୁତ ଖେଳିବାକୁ ପଡ଼ିବ। କାରଣ ଏହି ରେକର୍ଡ ତାଙ୍କଠାରୁ ବହୁତ ଆଗରେ ରହିଛି।
T20 ଇଣ୍ଟରନ୍ୟାସନାଲରେ ସବୁଠୁ ଦ୍ରୁତ ଅର୍ଦ୍ଧଶତକର ରେକର୍ଡ ନେପାଳର ଦୀପେନ୍ଦ୍ର ସିଂହ ଐରୀଙ୍କ ନାଁରେ ରହିଛି। ସେ ୨୭ ସେପ୍ଟେମ୍ବର ୨୦୨୩ରେ ମଙ୍ଗୋଲିଆ ବିପକ୍ଷରେ ମାତ୍ର ୯ ବଲରେ ଅର୍ଦ୍ଧଶତକ ହାସଲ କରିଥିଲେ।
ଏପର୍ଯ୍ୟନ୍ତ ୧୦ କିମ୍ବା ତା’ଠାରୁ କମ ବଲରେ T20I ଫିଫ୍ଟି କରିଥିବା ଏକମାତ୍ର ବ୍ୟାଟର ହେଉଛନ୍ତି ଦୀପେନ୍ଦ୍ର। ସେହି ମ୍ୟାଚରେ ନେପାଳ ମଙ୍ଗୋଲିଆକୁ ୨୭୩ ରନର ବଡ଼ ବ୍ୟବଧାନରେ ପରାସ୍ତ କରିଥିଲା। ଏହି ମ୍ୟାଚ୍ରେ ନେପାଳର କୁଶାଲ ମଲ୍ଲା ମଧ୍ୟ ୫୦ ବଲରେ ୧୩୭ ରନର ବିସ୍ଫୋରକ ଇନିଂସ ଖେଳିଥିଲେ।
ଏହି ତାଲିକାରେ ଭାରତର ମହାନ ଅଲରାଉଣ୍ଡର ଯୁବରାଜ ସିଂହଙ୍କ ନାଁ ମଧ୍ୟ ରହିଛି। ୨୦୦୭ ମସିହାରେ ଇଂଲଣ୍ଡ ବିପକ୍ଷରେ ଯୁବରାଜ ମାତ୍ର ୧୨ ବଲଷର ଅର୍ଦ୍ଧଶତକ ହାସଲ କରିଥିଲେ। ଏହି ରେକର୍ଡ ତାଙ୍କୁ ସବୁଠୁ ଦ୍ରୁତ T20I ଫିଫ୍ଟି ତାଲିକାର ଶୀର୍ଷ ଭାଗରେ ରଖିଛି।
ଯୁବରାଜଙ୍କ ସହ ଅଷ୍ଟ୍ରିଆର ଅବଦୁଲ୍ଲା କୋଟୱାଲ ମଧ୍ୟ ୧୨ ବଲରେ ଅର୍ଦ୍ଧଶତକ କରିଛନ୍ତି।
ବୈଭବ ସୂର୍ଯ୍ୟବଂଶୀଙ୍କ T20I କ୍ୟାରିୟର ଏବେ ଆରମ୍ଭିକ ପର୍ଯ୍ୟାୟରେ। ମାତ୍ର ୧୮ ବଲ୍ରେ ଫିଫ୍ଟି କରି ସେ ନିଜର ବିସ୍ଫୋରକ କ୍ଷମତାର ପ୍ରମାଣ ଦେଇସାରିଛନ୍ତି। ତେଣୁ ଭବିଷ୍ୟତରେ ସେ ୧୨, ୧୦ କିମ୍ବା ତା’ଠାରୁ କମ ବଲରେ ଅର୍ଦ୍ଧଶତକ କରିପାରିବେ କି ନାହିଁ, ତା’ ଉପରେ କ୍ରିକେଟ୍ପ୍ରେମୀଙ୍କ ନଜର ରହିବ।