ଭୁବନେଶ୍ୱର,୧୧।୮(ବ୍ୟୁରୋ): ରାଜ୍ୟସ୍ତରୀୟ ଜାତୀୟ ହସ୍ତତନ୍ତ ଦିବସ ଉପଲକ୍ଷେ ବୟନିକା ଓ ବୟନ ଶିଳ୍ପ ନିର୍ଦ୍ଦେଶାଳୟ, ହସ୍ତତନ୍ତ, ବୟନ ଓ ହସ୍ତଶିଳ୍ପ ବିଭାଗ ପକ୍ଷରୁ ସପ୍ତାହେ ବ୍ୟାପୀ ବିଭିନ୍ନ କାର୍ଯ୍ୟକ୍ରମ ଆୟୋଜନ କରାଯାଉଛି। ବୁଧବାର ମାର୍କେଟ ବିଲ୍ଡିଂଠାରେ ସମ୍ପ୍ରସାରିତ ବୟନିକାର ଉଦ୍ଘାଟନ ସହ ବୟନ ଭବନରେ ବୟନିକା ଅନନ୍ୟର ଉଦ୍ଘାଟନ ମଧ୍ୟ ହୋଇଯାଇଛି। ଏକାମ୍ର ହାଟଠାରେ ବୟନିକା ପକ୍ଷରୁ ଓଡ଼ିଶା ହସ୍ତତନ୍ତର ଅନନ୍ୟ ଫ୍ୟାଶନ୍ ଶୋ’ ଅନୁଷ୍ଠିତ ହୋଇଯାଇଛି। ଏହି ଫ୍ୟାଶନ୍ ଶୋ’ରେ ୧୦ଟି ସେଗ୍ମେଣ୍ଟରେ ଓଡ଼ିଶା ହସ୍ତତନ୍ତର ବିଭିନ୍ନ ଡିଜାଇନ୍ ଓ କଲେକ୍ସନ୍କୁ ମଡେଲ୍ମାନେ ପ୍ରଦର୍ଶନ କରିଥିଲେ। ଏହି ଫ୍ୟାଶନ୍ ଶୋ’କୁ ଭୁବନେଶ୍ୱର ମହାନଗର ନିଗମ କମିଶନର ବିଜୟ ଅମୃତା କୁଲାଙ୍ଗେ ଉଦ୍ଘାଟନ କରିଥିଲେ।
ଉତ୍ସବରେ ନ୍ୟାଶନାଲ୍ ଇନ୍ଷ୍ଟିଚ୍ୟୁଟ୍ ଅଫ୍ ଫ୍ୟାଶନ୍ ଟେକ୍ନୋଲୋଜିର ନିର୍ଦ୍ଦେଶକ ଶୋଭନ୍ କ୍ରିଷ୍ଣା ସାହୁ, ସୋନପୁରର କଲେକ୍ଟର ତଥା ଜିଲା ମାଜିଷ୍ଟ୍ରେଟ୍ ଅବୋଲି ସୁନୀଲ ନରୱାଣେ, ବୟନ, ହସ୍ତତନ୍ତ ଓ ହସ୍ତଶିଳ୍ପ ନିର୍ଦ୍ଦେଶାଳୟର ନିର୍ଦ୍ଦେଶକ ସୁଶାନ୍ତ କୁମାର ଦାଶ, ଡେପୁଟି ଡାଇରେକ୍ଟର, ଇଣ୍ଟେଲିଜେନ୍ସ କୁନାଲ କୁମାର, ବୟନିକାର ପରିଚାଳନା ନିର୍ଦ୍ଦେଶକ ଶ୍ୟାମଭକ୍ତ ମିଶ୍ର ପ୍ରମୁଖ ଉପସ୍ଥିତ ଥିଲେ। ହସ୍ତତନ୍ତ ଶିଳ୍ପର ଗୁରୁତ୍ୱ ଉପରେ ଜନସଚେତନତା ସୃଷ୍ଟି କରିବା ଏବଂ ଦେଶର ସାମାଜିକ, ଅର୍ଥନୈତିକ ଅଭିବୃଦ୍ଧିରେ ଏହାର ଅବଦାନକୁ ସ୍ବୀକୃତି ଦେବା ଏହି ଦିବସର ଉଦ୍ଦେଶ୍ୟ ଓ ଲକ୍ଷ୍ୟ। ଶାଢ଼ି ଓ ଅନ୍ୟାନ୍ୟ ହସ୍ତତନ୍ତ ଉତ୍ପାଦ ବ୍ୟତୀତ ରାଜ୍ୟର ଅଗଣିତ ପୁରୁଷ ଓ ମହିଳାଙ୍କ ପାଇଁ କାର୍ଯ୍ୟାଳୟ ପୋଷାକ, ଯୁବପିଢ଼ିଙ୍କ ପାଇଁ ଯୁଗୋପଯୋଗୀ ବସ୍ତ୍ର ବିକ୍ରୟ କରିବାରେ ବୟନିକା ପ୍ରମୁଖ ଭୂମିକା ଗ୍ରହଣ କରିଛି।
