ଶ୍ରୀନଗର,୨୪।୧: ନ୍ୟାଶନାଲ କନଫରେନ୍ସ ମୁଖ୍ୟ ଏବଂ ଜମ୍ମୁ-କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଫାରୁକ ଅବଦୁଲ୍ଲା ଜଣେ ଦମ୍ଦାର ରାଜନେତା। ରାଜନୀତି ସହିତ, ଧାର୍ମିକ ପ୍ରସଙ୍ଗରେ ତାଙ୍କର ଭିନ୍ନ ଭିନ୍ନ ଦୃଷ୍ଟିକୋଣ ସମୟ ସମୟରେ ଦେଖିବାକୁ ମିଳେ। ପୁଣିଥରେ ଫାରୁକ ଅବଦୁଲ୍ଲାଙ୍କୁ ବୈଷ୍ଣୋ ଦେବୀ ମନ୍ଦିର ନିକଟସ୍ଥ କଟରାସ୍ଥିତ ଏକ ଆଶ୍ରମରେ ମାତା ବୈଷ୍ଣୋ ଦେବୀଙ୍କ ଭକ୍ତିରେ ବୁଡ଼ି ରହିଥିବାର ଦେଖାଯାଇଥିଲା। ସେ କଟରା ଆଶ୍ରମରେ ‘ତୁ ନେ ମୁଝେ ବୁଲାୟା ଶେରାୱାଲିୟେ’ ଭଜନ ଗାଇ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲେ।
ଏବେ ଏ ସମ୍ପର୍କିତ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ପୂର୍ବରୁ ୨୦୨୪ ଏପ୍ରିଲରେ ମଧ୍ୟ ତାଙ୍କର ରାମଧୂନ ଗାଇବାର ଏକ ଭିଡିଓ ଭାଇରାଲ ହୋଇଥିଲା।
ଫାରୁକ କଟରାର ଏକ ଆଶ୍ରମରେ ଏକ ‘ଭଜନ’ କାର୍ଯ୍ୟକ୍ରମରେ ଯୋଗ ଦେଇ ପିଲାମାନଙ୍କ ସହିତ ‘ତୁନେ ମୁଝେ ବୁଲାୟା ଶେରାୱାଲିୟେ, ମୈଁ ଆୟା, ମୈଁ ଆୟା ଶେରାୱାଲିୟେ’ ଗାଇଥିଲେ। ଏହି ଅବସରରେ ଭାଷଣ ଦେଇ, ସେ ରୋପେୱ ପ୍ରକଳ୍ପ ବିରୋଧରେ କଟରାର ଲୋକଙ୍କ ସମର୍ଥନ ଜଣାଇଥିଲେ। ସେ କହିଥିଲେ, ଯେଉଁମାନେ ମନ୍ଦିର ପରିଚାଳନା କରୁଛନ୍ତି ସେମାନେ ଏପରି କିଛି କରିବା ଉଚିତ୍ ନୁହେଁ, ଯାହା ସ୍ଥାନୀୟ ଲୋକଙ୍କ ସ୍ବାର୍ଥକୁ କ୍ଷତି ପହଞ୍ଚାଏ କିମ୍ବା ସେମାନଙ୍କ ପାଇଁ ସମସ୍ୟା ସୃଷ୍ଟି କରେ।ସ୍
ସେ କହିଥିଲେ, ଲୋକମାନେ ବୁଝିପାରିଛନ୍ତି ଯେ କ୍ଷମତା ସରକାରଙ୍କ ପାଖରେ ନୁହେଁ ବରଂ ଲୋକଙ୍କ ପାଖରେ ଅଛି। ଅବଦୁଲ୍ଲା ଜୋର ଦେଇ କହିଥିଲେ ଯେ ଲୋକଙ୍କ ପାଖରେ ସରକାର ଗଢ଼ିବା କିମ୍ବା ଭାଙ୍ଗିବାର କ୍ଷମତା ଅଛି ଏବଂ ଏବେ ଅଧିକାରୀମାନେ ତାଙ୍କ ପାଖକୁ ରୋପୱେ କେଉଁଠାରେ ନିର୍ମାଣ କରାଯିବା ଉଚିତ ସେ ବିଷୟରେ କଥାବାର୍ତ୍ତା କରିବାକୁ ଆସୁଛନ୍ତି।
