ରାୟଗଡ଼ା ଅଫିସ,୨୧ା୧୦: ବହୁ ବିରୋଧ ପରେ ବି ରାୟଗଡ଼ା ଜିଲା କଲ୍ୟାଣସିଂହପୁର ବ୍ଲକ ସୁନାଖଣ୍ଡି ପଞ୍ଚାୟତର ପ୍ରଧାନୀଗୁଡ଼ା ନିକଟରେ ପ୍ରଶାସନ ପକ୍ଷରୁ ଏକଲବ୍ୟ ଆଧୁନିକ ବିଦ୍ୟାଳୟ ନିମନ୍ତେ ଗୁରୁବାର ଜମି ଚିହ୍ନଟ ହୋଇଛି। ପୋଲିସ ଫୋର୍ସ ଉପସ୍ଥିତିରେ ଜିଲା ଓ ବ୍ଲକ ପ୍ରଶାସନ ପକ୍ଷରୁ ପ୍ରଧାନୀଗୁଡ଼ା ଏବଂ ମନେଇଗୁଡ଼ା ମୌଜାରେ ଏକଲବ୍ୟ ଆଧୁନିକ ବିଦ୍ୟାଳୟ ପାଇଁ ସରକାରୀ ଜମି ଚିହ୍ନଟ କରାଯାଇଛି। ତେବେ ଉକ୍ତ ସରକାରୀ ଜମିରେ ଚାଷ କରୁଥିବା ଚାଷୀଙ୍କ ବିରୋଧ ଜାରି ରହିଛି। ଜୀବନ ଦେଇଦେବୁ ପଛେ ଜମି ଛଡ଼ିବୁ ନାହିଁ ବୋଲି ସେମାନେ କହିଛନ୍ତି।
ଏକଲବ୍ୟ ମଡେଲ ବିଦ୍ୟାଳୟ ପାଇଁ ବୁଧବାର ତହସିଲଦାର ରଇତ, ରାଜସ୍ବ ଅଧିକାରୀ, ଅମିନ ଓ ସ୍ଥାନୀୟ ଥାନା ଅଧିକାରୀଙ୍କ ଉପସ୍ଥିତିରେ ଜମି ଚିହ୍ନଟ ଚାଲିଥିବାବେଳେ ଚାଷୀ ଏହାକୁ ବିରୋଧ କରିଥିଲେ। ଫଳରେ ବ୍ଲକ ପ୍ରଶାସନକୁ ନିରାଶ ହୋଇ ଫେରିବାକୁ ପଡ଼ିଥିଲା। ଗୁରୁବାର ପ୍ରଶାସନ ପକ୍ଷରୁ ଏକ ପ୍ଲାଟୁନ ପୋଲିସ ଫୋର୍ସ ନିଆଯାଇ ରାଜସ୍ବ ଅଧିକାରୀ ଓ ଅମିନ ପ୍ରମୁଖ ଜମି ଚିହ୍ନଟ କରୁଥିବା ବେଳେ ଚାଷୀମାନେ ଜମି ଚିହ୍ନଟ ନ କରିବା ପାଇଁ ଅଡି ବସିଥିଲେ। ଅନ୍ୟପକ୍ଷରେ ଗ୍ରାମର କେତେଜଣ ବ୍ୟକ୍ତି ଉକ୍ତ ସ୍ଥାନରେ ଏକଲବ୍ୟ ଆଧୁନିକ ବିଦ୍ୟାଳୟ କରାଯାଉ ବୋଲି ଦାବି କରିଥିଲେ।
ସୂଚନାଯୋଗ୍ୟ, ୨୦୨୧ ନଭେମ୍ବର ୧୫ରେ ପ୍ରଧାନୀଗୁଡ଼ାଠାରେ ଏକଲବ୍ୟ ଆଧୁନିକ(ମଡେଲ) ବିଦ୍ୟାଳୟର ସୂଚନା ଫଳକକୁ ଭିଡିଓ କନ୍ଫରେନ୍ସ ମାଧ୍ୟମରେ ପ୍ରଧାନମନ୍ତ୍ରୀ ଉଦ୍ଘାଟନ କରିଥିଲେ। ଗରିବ ପିଲାଙ୍କ ଉଚ୍ଚଶିକ୍ଷା ପାଇଁ ଏହି ବ୍ୟବସ୍ଥା କରାଯାଇଛି। ଏହାକୁ ନେଇ ଗତ ୧୩ ତାରିଖରେ ରାୟଗଡ଼ା ଜିଲାପାଳ ସ୍ବଧାଦେବ ସିଂ ପରିଦର୍ଶନ କରି ତୁରନ୍ତ ଜମି ଚିହ୍ନଟ କରିବା ପାଇଁ ସ୍ଥାନୀୟ ତହସିଲଦାରଙ୍କୁ ନିର୍ଦ୍ଦେଶ ଦେଇଥିଲେ। ଏ ବିଷୟରେ ତହସିଲଦାର ସୁଧାକର ରଇତଙ୍କୁ ପଚାରିବାରୁ ସେ କହିଛନ୍ତି, ସରକାରଙ୍କ ନିର୍ଦ୍ଦେଶକ୍ରମେ ଏହି ସ୍ଥାନରେ ବିଦ୍ୟାଳୟ ନିର୍ମାଣ ହେବାକୁ ଯାଉଛି। ଏଥିପାଇଁ ଜମି ମାପଚୁପ ସରିଛି। ତେଣୁ ଏହାକୁ କେହି ରୋକିପାରିବେ ନାହିଁ ବୋଲି ସେ କହିଛନ୍ତି। ଏସ୍ଡିପିଓ ଦେବଜ୍ୟୋତି ଦାସଙ୍କ ପ୍ରତିକ୍ରିୟା ନେବାରୁ ସେ କହିଛନ୍ତି, ବିଦ୍ୟାଳୟ ପାଇଁ ବହୁ ଲୋକଙ୍କ ସମର୍ଥନ ରହିଛି। ତେଣୁ ଏହିଠାରେ ହିଁ ବିଦ୍ୟାଳୟ ହେବ।
