ଦଶମନ୍ତପୁର,୨୪ା୨ (ଡି.ଏନ.ଏ.): କୋରାପୁଟ ଜିଲା ଦଶମନ୍ତପୁର ବ୍ଲକ ସଦର ମହକୁମାସ୍ଥିତ ଲ୍ୟାମ୍ପ ପକ୍ଷରୁ ମାଣ୍ଡିଆ ଚାଷୀଙ୍କୁ ଅଣଦେଖା କରାଯାଉଥିବା ଅଭିଯୋଗ ହେଉଛି। ଏନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଖବରରୁ ଜଣାପଡିଛି, ମାଣ୍ଡିଆ ବ୍ୟବସାୟୀ ଏବଂ ଲ୍ୟାମ୍ପସ କର୍ତ୍ତୃପକ୍ଷଙ୍କ ସଲାସୁତୁରାରେ ମଣ୍ଡିରେ ହିତାଧିକାରୀଙ୍କୁ ଅବହେଳା କରାଯାଉଛି। ଏହାର ଉଦାହରଣ ନିକଟରେ ଦଶମନ୍ତପୁରରେ ଦେଖିବାକୁ ମିଳିଛି। ଦଶମନ୍ତପୁର ବ୍ଲକ ଅନ୍ତର୍ଗତ ପିଣ୍ଡାପଦର ପଞ୍ଚାୟତ ର ଯୋଡ଼ାପୁଟ ଗ୍ରାମର ସନ୍ୟାସୀ ଜାନୀ ତାଙ୍କର ୨୭ କୁଇଣ୍ଟାଲ ଏବଂ ଚିକାମ୍ବ ପଞ୍ଚାୟତ ତୁନଖାଲ ଗ୍ରାମର ଗୁରୁ ଜାନିଙ୍କ ୨୭ କୁଇଣ୍ଟାଲ ୫୦ କେଜି ମାଣ୍ଡିଆ ବିକ୍ରୟ ପାଇଁ ଦଶମନ୍ତପୁର ଲ୍ୟାମ୍ପକୁ ଆସିଥିଲେ। ମାତ୍ର ଏହି ଦୁଇ ଚାଷୀଙ୍କୁ ମାଣ୍ଡିଆକୁ ମିଲ୍ରେ ସଫା କରି ଆଣିବାକୁ କହି ଲ୍ୟାମ୍ପ ପକ୍ଷରୁ ଫେରାଇ ଦିଆଯାଇଥିଲା। ଶେଷରେ ସେମାନେ କିଲୋ ପିଛା ୪ ଟଙ୍କା ଦେଇ ମାଣ୍ଡିଆ ସଫା କରି ଲ୍ୟାମ୍ପରେ ନ ଦେଇ ବ୍ୟବସାୟୀଙ୍କ ମାଧ୍ୟମରେ ଅନ୍ୟତ୍ର ବିକ୍ରି କରିଥିଲେ। ଚାଷୀମାନଙ୍କ ପ୍ରତି ଲ୍ୟାମ୍ପ କର୍ତ୍ତୃପକ୍ଷଙ୍କ ଏଭଳି ମନୋଭାବକୁ ଚାଷୀ ଏବଂ କେତେଜଣ ସମାଜିକ କର୍ମୀ ବିରୋଧ କରିଥିଲେ। ବନମାଳୀ ବିଶୋୟୀ, ମୋହନ ଚନ୍ଦ୍ର ପାତ୍ର, ବାବୁଲା ବିଶୋୟୀ, କାହ୍ନୁ ଚରଣ ବିଶୋୟୀ, ଟଙ୍କଧର ବିଶୋୟୀ ପ୍ରମୁଖ ଚାଷୀଙ୍କ ଠାରୁ ମାଣ୍ଡିଆ କିଣୁଥିବା ବ୍ୟବସାୟୀଙ୍କୁ ଘେରାଉ କରିଥିଲେ। ଏନେଇ ଘଟଣା ସ୍ଥଳରେ ଚାପା ଉତ୍ତେଜନା ପ୍ରକାଶ ପାଇଥିଲା। ଲ୍ୟାମ୍ପ କର୍ତ୍ତୃପକ୍ଷଙ୍କ ଅସହଯୋଗ ହେତୁ ଚାଷୀ ମଣ୍ଡିରୁ ଲାଭ ପାଇପାରୁ ନାହାନ୍ତି ବୋଲି ବନମାଳୀ ବିଶୋୟୀ ଅଭିଯୋଗ କରିଛନ୍ତି। ଏହି ସମୟରେ ମାଣ୍ଡିଆ କିଣିବାକୁ ଘାନଟରାଗୁଡ଼ାରୁ ଆସିଥିବା ବ୍ୟବସାୟୀ ସୁବିଧା ଦେଖି ଘଟଣା ସ୍ଥଳରୁ ମାଣ୍ଡିଆ ମିଲ୍କୁ ନେଇ ଚାଲି ଯାଇଥିଲେ ।
ଏସଂପର୍କରେ ଲ୍ୟାମ୍ପସ କର୍ତ୍ତୃପକ୍ଷ ପ୍ରଫୁଲ୍ଲ ମିଶ୍ରଙ୍କୁ ପଚାରିବାରୁ ସେ କହିଲେ, ମାଣ୍ଡିଆ ସଫା ନ ଥିବାରୁ ସଫା କରି ଆଣିବାକୁ ଆମେ ପଠେଇଲୁ ବୋଲି କହିଛନ୍ତି। ସରକାର କୁଇଣ୍ଟାଲ ପିଛା ମାଣ୍ଡିଆ ୩୫୭୮ ଟଙ୍କାରେ ଦେଉଛନ୍ତି। ଆମେ ସଫା ମାଣ୍ଡିଆ ହିଁ କିଣିବୁ ନଚେତ ନାହିଁ ବୋଲି ମିଶ୍ର କହିଥିଲେ।
