ବରଗଡ଼ ଅଫିସ,୨୮।୨: କେନ୍ଦ୍ରସରକାରଙ୍କ ୩ ନୂଆ କୃଷି ଆଇନ୍କୁ ନେଇ ଦେଶବ୍ୟାପୀ ବିଭିନ୍ନ ସ୍ଥାନରେ ବିରୋଧ ଜାରି ରହିଛି। ଏହି କ୍ରମରେ ରବିବାର ବୀର ସୁରେନ୍ଦ୍ର ସାଏଙ୍କ ବଳିଦାନ ଦିବସ ଅବସରରେ ପଶ୍ଚିମ ଓଡ଼ିଶା କୃଷକ ସଂଗଠନ ସମନ୍ବୟ ସମିତିର ନେତୃତ୍ୱରେ ଚାଷୀମାନେ ଭୁବନେଶ୍ବର ଅଭିମୁଖେ ଉଲଗୁଲାନ ଶପଥ ଯାତ୍ରାରେ ବାହାରିଛନ୍ତି। ବରଗଡ଼ ଗାନ୍ଧୀଛକସ୍ଥିତ ବୀର ସୁରେନ୍ଦ୍ର ସାଏଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରି ଚାଷୀମାନେ ଯାତ୍ରାର ଶୁଭାରମ୍ଭ କରିଥିଲେ । ଚଳିତ ବିଧାନସଭାରେ ଓଡ଼ିଶା ସରକାର କେନ୍ଦ୍ର ସରକାରଙ୍କ ଦ୍ବାରା ସଂସଦରେ ପାରିତ ୩ କୃଷି ଆଇନକୁ ପ୍ରତ୍ୟାଖ୍ୟାନ କରି ରାଜ୍ୟର କୃଷକମାନଙ୍କ ସୁରକ୍ଷା ନିମନ୍ତେ ଆଇନ ପ୍ରଣୟନ କରିବା, କେନ୍ଦ୍ର ଦ୍ବାରା ଘୋଷିତ ସମସ୍ତ କୃଷିଜାତ ଦ୍ରବ୍ୟର ସର୍ବନିମ୍ନ ସହାୟକ ଦରକୁ ସୁନିଶ୍ଚିତ କରିବା ପାଇଁ ମଣ୍ଡି ଜରିଆରେ ସଂଗ୍ରହ ବ୍ୟବସ୍ଥା କରିବା, ଏମ୍ଏସ୍ପିକୁ ଆଇନଗତ ମାନ୍ୟତା ପ୍ରଦାନ, ଏମ୍ଏସ୍ପିଠାରୁ କମ ଦରରେ କ୍ରୟ କଲେ ଦଣ୍ଡ ବ୍ୟବସ୍ଥା କରିବା, ରାଜ୍ୟର ପ୍ରତି ପଞ୍ଚାୟତ ସ୍ତରରେ ସରକାରୀ ମଣ୍ଡି ବ୍ୟବସ୍ଥାକୁ ସୁଦୃଢ ଓ ବ୍ୟବସ୍ଥିତ କରିବା ଏବଂ ବର୍ତ୍ତମାନ ରାଜ୍ୟର ବିଭିନ୍ନ ମଣ୍ଡିରେ ପଡ଼ି ରହିଥିବା ଧାନକୁ ତୁରନ୍ତ କିଣାଯାଇ ଏମ୍ଏସ୍ପି ପ୍ରଦାନ ଦାବିରେ ଏହି ଶପଥ ଯାତ୍ରା କରାଯାଉଛି। ଏହି ଦାବିରେ ଆସନ୍ତା ମାର୍ଚ୍ଚ ୨ତାରିଖ ଭୁବନେଶ୍ବର ପିଏମଜି ଛକରେ ବିକ୍ଷୋଭ ସମାବେଶ କାର୍ଯ୍ୟକ୍ରମ ରହିଛି। ପଶ୍ଚିମ ଓ କୃଷକ ସଂଗଠନ ସମନ୍ବୟ ସମିତିର ଆବାହକ ଲିଙ୍ଗରାଜଙ୍କ ନେତୃତ୍ୱରେ ସୁଶିଲ କୁମାର ସାହୁ, ହର ବଣିଆଙ୍କ ସମେତ ପ୍ରାୟ ୫୦ ଜଣ ବାଇକରେ ଏହି ଯାତ୍ରା କରି ଥିବାବେଳେ ବାଟରେ ସମ୍ବଲପୁର, ରେଢ଼ାଖୋଲ, ଅନୁଗୁଳ ସମେତ ବିଭିନ୍ନ ଅଞ୍ଚଳର ଚାଷୀମାନେ ସାମିଲ ହେବାର କାର୍ଯ୍ୟକ୍ରମ ରହିଛି ବୋଲି ଚାଷୀନେତା ଲିଙ୍ଗରାଜ ସୂଚନା ଦେଇଛନ୍ତି।
