ବଲାଙ୍ଗୀର,୯ା୧(ବୀରେନ୍ଦ୍ର କୁମାର ଝାଙ୍କର):ବଲାଙ୍ଗୀର ଜିଲାରେ ଧାନକିଣାରେ ଅଚଳାବସ୍ଥା ଜାରି ରହିଛି। ଚାଷୀମାନେ ଧାନବିକ୍ରି କରି ନ ପାରି ଅଡୁଆ ସ୍ଥିତିରେ ରହିଛନ୍ତି। ମିଲରମାନଙ୍କ ଧର୍ମଘଟ ଯୋଗୁ ଚାଷୀଙ୍କ ଅଡୁଆ ଆହୁରି ବଢ଼ିଯାଇଛି। ଗତ ୪/୫ ଦିନ ହେଲା ଚାଷୀମାନେ ମଣ୍ଡିକୁ ଧାନ ଆଣି ରଖିଥିଲେ। ହେଲେ ସେମାନଙ୍କ ଧାନ କିଣା ନ ଯିବାରୁ ଅନେକ ଚାଷୀ ମଣ୍ଡିରେ ଧାନ ଜଗି କଷ୍ଟ ପାଇଛନ୍ତି। ପ୍ରବଳ ଥଣ୍ଡାରେ ଧାନ ଜଗିବାକୁ ମଣ୍ଡିରେ ରହିଥିବା ଚାଷୀମାନେ ଚଳିତ ବର୍ଷର ଧାନକିଣା ଅବ୍ୟବସ୍ଥା ସବୁ ବର୍ଷରୁ ବଳିଯାଇଛି ବୋଲି କହିଛନ୍ତି। ବୁଧବାର ମିଲରମାନଙ୍କ ଧର୍ମଘଟ ପ୍ରତ୍ୟାହାର ହେଲା ବୋଲି କୁହାଯାଇଥିଲା। ବୁଧବାର ସନ୍ଧ୍ୟାରୁ ମଣ୍ଡିରେ ଅଟକି ରହିଥିବା ଟ୍ରକ୍ଗୁଡିକରେ ଧାନ ଉଠାଣ କରାଯିବ ବୋଲି ବଲାଙ୍ଗୀର ମିଲର୍ସ ସଂଘ ପକ୍ଷରୁ ସୂଚନା ଦିଆଯାଇଥିଲା। ତେବେ ଗୁରୁବାର ସନ୍ଧ୍ୟା ପର୍ଯ୍ୟନ୍ତ ଅନେକ ମଣ୍ଡିରେ ଧାନ ଉଠି ନ ଥିବା ଜଣାପଡିଛି। ଏପରି କି ଯେଉଁ କିଛି ପାକ୍ସରେ ଧାନ ଉଠିଛି ସେଠି ନାମକୁ ମାତ୍ର ଜଣେ କି ଦୁଇଜଣ ଚାଷୀଙ୍କ ଧାନ ଉଠାଣ କରାଯାଇଛି।
ବଲାଙ୍ଗୀର ଜିଲା ପୁଇଁନ୍ତଳା ବ୍ଲକ୍ ଅନ୍ତର୍ଗତ ପୁଇଁନ୍ତଳା ପାକ୍ସରେ ଗୁରୁବାର ଅପରାହ୍ନ ୪ଟାରେ ଗୋଟିଏ ଟ୍ରକ୍ ଆସି କିଛି କୁଇଣ୍ଟାଲ ଧାନ ଉଠାଣ କରିଥିବା ଜଣାପଡିଛି। ଏହି ପାକ୍ସ ଅନ୍ତର୍ଗତ ବେହେରାପାଲିର ଚାଷୀ ଜଗବନ୍ଧୁ ସାଏ କହିଛନ୍ତି, ୫ ଦିନ ତଳେ ୧୬୧ ବସ୍ତା ଧାନ ପୁଇଁନ୍ତଳା ପାକ୍ସକୁ ଆଣିଥିଲି। ମିଲରମାନେ ଧର୍ମଘଟ କରିବାରୁ ଧାନ କିଣାଗଲା ନାହିଁ କି ଲିପ୍ଟିଂ ହେଲାନାହିଁ। ଫଳରେ ଧାନକୁ ଜଗିବା ପାଇଁ ଗତ ୪ ଦିନ ହେଲା ରାତିରେ ପାକ୍ସରେ ରହୁଛି। ଧାନ ଲୋଡିଂ, ଅନ୍ଲୋଡିଂ କରିବା ପାଇଁ ଶ୍ରମିକଙ୍କୁ ନିୟୋଜିତ କରିବାକୁ ପଡୁଛି। ଗତ ୪ ଦିନ ହେଲା ଧାନ ବିକ୍ରି ହୋଇ ନ ଥିବାରୁ ଆଜି ହେବ, କାଲି ହେବ ବୋଲି ପ୍ରତିଦିନ ଶ୍ରମିକଙ୍କୁ କହିବାକୁ ପଡୁଥିଲା। ମାତ୍ର ଗୁରୁବାର ଅପରାହ୍ନ ପର୍ଯ୍ୟନ୍ତ ଧାନ ଉଠି ନ ଥିଲା। ଏବାବଦରେ ଚାଷୀଙ୍କୁ ଖର୍ଚ୍ଚାନ୍ତ ଏବଂ ହଇରାଣ ହେବାକୁ ପଡୁଛି। ଗଇଁନ୍ତଲା ଗ୍ରାମର ଚାଷୀ ଜନ୍ମେଜୟ ଭୋଇ କହିଛନ୍ତି, ଚଳିତବର୍ଷ ଚାଷୀ ଯେଉଁ ସମସ୍ୟାର ସମ୍ମୁଖୀନ ହେଲାଣି କେବେ ହୋଇ ନ ଥିଲା। ଧାନବିକ୍ରି କରିବାକୁ ଚାଷୀକୁ ଏତେଦିନ କେବେ ବି ଲାଗି ନ ଥିଲା। ଚାଷୀଙ୍କ ପଞ୍ଜୀକରଣ, ଟୋକନ୍ ଆସିବା, ଧାନ ଲୋଡିଂ ଓ ଅନ୍ଲୋଡିଂ କରିବା ପାଇଁ ଯେତିକି ହଇରାଣ କରାଯାଉଛି ଏହା ପୂର୍ବରୁ କେବେ ହୋଇନାହିଁ ବୋଲି ସେ କହିଥିଲେ। ଏହି ପାକ୍ସର ସମ୍ପାଦକ ଅମିତ ପଟେଲ କହିଛନ୍ତି, ମିଲରଙ୍କ ଧର୍ମଘଟ ଯୋଗୁ ଧାନକିଣାରେ ଅଚଳାବସ୍ଥା ଦେଖାଦେଇଥିଲା। ଗୁରୁବାର ଠାରୁ ଧାନକିଣା ଆରମ୍ଭ ହେବ ବୋଲି କୁହାଯାଇଥିଲା। ତେବେ ଅପରାହ୍ନ ୪ଟା ସୁଦ୍ଧା ମିଲରଙ୍କ ଟ୍ରକ୍ ଆସି ନ ଥିଲା। ଏବେ ଟ୍ରକ୍ ଆସିଛି, କେତେ ଧାନ ଉଠିବାକୁ କୁହାଯାଇଛି ସେ ସମ୍ପର୍କରେ ବୁଝିକରି କହିବି। ମିଲରଙ୍କ ଧର୍ମଘଟ ଯୋଗୁ ଜିଲାରେ ଚାଷୀଙ୍କ ଧାନକିଣା ବ୍ୟାହତ ହୋଇଥିଲା। ପୂର୍ବରୁ ମୁଖ୍ୟ ଯୋଗାଣ ଅଧିକାରୀ ରଞ୍ଜନ ପଣ୍ଡା କହିଥିଲେ, ଜିଲାରେ ୧ ଲକ୍ଷ ୨୪ ହଜାର ୯୮୧ ମେଟ୍ରିକ୍ ଟନ୍ ଧାନ ମିଲକୁ ଉଠାଣ ହୋଇସାରିଥିଲା। ହେଲେ ଗୁରୁବାରର ସ୍ଥିତି ସମ୍ପର୍କରେ ପଚାରିବା ପାଇଁ ତାଙ୍କୁ ଫୋନ୍ କରିଥିଲେ ସୁଦ୍ଧା ସେ ଉଠାଇ ନ ଥିବାରୁ ତଥ୍ୟ ଜଣାପଡିନାହିଁ। ତେବେ ଜିଲାରେ ଧାନକିଣା ଅଚଳାବସ୍ଥା ଜାରି ରହିଥିବା ଜଣାପଡିଛି।
Dharitri – Odisha’s No.1 Odia Daily
