କେସିଙ୍ଗା,୧୦।୧୦(ତୁମେଶ୍ବର ସାହୁ): କୃଷକମାନଙ୍କ କଲ୍ୟାଣ ନିମନ୍ତେ ରାଜ୍ୟ ସରକାର ବିଭିନ୍ନ ଯୋଜନା ଉପରେ ଯୋଜନା କରୁଛନ୍ତି। କିନ୍ତୁ ଅନେକ ଯୋଜନା କେବଳ କାଗଜ ପତ୍ରରେ ରହି ଯାଉଥିବା ବେଳେ ଆଉ କିଛି ଯୋଜନା ଦଲାଲମାନଙ୍କ ଆର୍ଥିକ ସ୍ଥିତି ସୁଦୃଢ କରୁଛି । ପ୍ରକୃତ ଚାଷୀ ସବୁବେଳେ ହଇରାଣର ଶିକାର ହେଉଛି। ଏହାର ଏକ ସତ୍ୟଘଟଣା ଦେଖିବାକୁ ମିଳିଛି କଳାହାଣ୍ଡି ଜିଲା କେସିଙ୍ଗା ବ୍ଳକରେ । ଡିପ ବୋରୱେଲ ଯୋଜନା ଦୀର୍ଘ ଦୁଇ ବର୍ଷ ତଳେ ବର୍ଷ ୨୦୨୨-୨୩ ରେ ଉଠା ଜଳସେଚନ ନିଗମ OLIC ଭବାନୀପାଟଣାଙ୍କ ନିର୍ଦ୍ଦେଶ କ୍ରମେ କେସିଙ୍ଗା ବ୍ଲକର ବହୁ ଚାଷୀ ନିଜ ଜମିରେ ଡିପ ବୋରୱେଲ ପାଇଁ ଆବେଦନ କରିଥିଲେ । ସୋଲାର ବୋରୱେଲ ବ୍ୟକ୍ତିଗତ ଭାବେ ଜଣେ ଚାଷୀ ଆବେଦନ କରିବାରର ବ୍ୟବସ୍ଥା ଥିବା ବେଳେ ଇଲେକ୍ଟ୍ରି ବୋରୱେଲ କରିବାକୁ ହେଲେ କ୍ଲଷ୍ଟର ଭାବେ ଚାରି କିମ୍ବା ପାଞ୍ଚ ଜଣ ଚାଷୀ ଆବେଦନ କରିବାର ବ୍ୟବସ୍ଥା ଥିଲା। ଏହି ବାବଦକୁ ଚାଷୀମାନେ କୋଡିଏ ହଜାର ଲେଖାଏଁ ବିଭିନ୍ନ ବ୍ୟାଙ୍କରେ ଡ୍ରାଫ୍ଟ କରିଛନ୍ତି। କିନ୍ତୁ ଦୀର୍ଘ ଦୁଇ ବର୍ଷ ବିତି ଯାଇଥିଲେ ମଧ୍ୟ ସମ୍ପୃକ୍ତ ବିଭାଗ କୌଣସି ଚାଷୀଙ୍କ ଜମିରେ ବୋରୱେଲ ଆଜି ପର୍ଯ୍ୟନ୍ତ ଖୋଲି ନାହାନ୍ତି କିମ୍ବା କେବେ ପର୍ଯ୍ୟନ୍ତ ଖୋଲା ଯିବ ତାହାର ମଧ୍ୟ ସନ୍ତୋଷଜନକ ଉତ୍ତର ଦେଉନାହାନ୍ତି । ଯେଉଁଥି ପାଇଁ ଏହି ଯୋଜନାରେ ଆବେଦନ କରିଥିବା ଚାଷୀ ଆଶଙ୍କାରେ ପଡିଛନ୍ତି। ତେଣୁ କେସିଙ୍ଗା ବ୍ଲକର ପ୍ରାୟ ୨୦୦ରୁ ଉଦ୍ଧର୍ବ ଚାଷୀ ବିଭାଗୀୟ ଅଫିସରେ ଅର୍ନିଦ୍ଦିଷ୍ଟ କାଳ ପାଇଁ ଧାରଣା ଦେବା ପାଇଁ ଚେତାବନୀ ଦେଇଥିବାର ଜଣାପଡିଛି।
ଏହି ପ୍ରସଙ୍ଗକୁ କେସିଙ୍ଗା ଅଂଚଳର ଯୁବ ଚାଷୀ ଭବାନୀ ସାହୁ ଲିଖିତ ଭାବରେ କଳାହାଣ୍ଡି ସାଂସଦଙ୍କୁ ଅଭିଯୋଗ କରିଛନ୍ତି। ସାଂସଦ ମାଲବିକା ଦେବୀ ଯଥାଶୀଘ୍ର ସମ୍ପୃକ୍ତ ବିଭାଗକୁ ନିର୍ଦେଶ ଦେଇ ସମସ୍ୟାର ସମଧାନ ପାଇଁ ଆଶ୍ୱାସନା ଦେଇ ଥିବାରୁ ଏହି ଯୋଜନାରେ ଆବେଦନ କରିଥିବା ଚାଷୀମାନେ ଖୁସି ବ୍ୟକ୍ତ କରିଛନ୍ତି। ଏ ସଂକ୍ରାନ୍ତରେ ଉଠା ଜଳସେଚନ ବିଭାଗର କନିଷ୍ଠ ଯନ୍ତ୍ରୀ ଶାନ୍ତନୁ ମାଝୀଙ୍କୁ ପଚାରିବାରୁ ଟେଣ୍ଡର ହୋଇଛି, କିଛି ଦିନ ମଧ୍ୟରେ ବୋରୱେଲ ଖୋଲାଯିବ ବୋଲି ପ୍ରକାଶ କରିଛନ୍ତି।
Dharitri – The Largest & Most Trusted Odia Daily
