ନୂଆଦିଲ୍ଲୀ/ଚଣ୍ଡିଗଡ଼,୨୭।୧୧ (ପି.ଟି./ଆଇଏଏନ୍ଏସ୍):କେନ୍ଦ୍ର ସରକାରଙ୍କ ୩ ବିବାଦୀୟ କୃଷି ଆଇନ ବିରୋଧରେ ଯୁଦ୍ଧଂଦେହି ଡାକରା ଦେଇଛନ୍ତି ପଞ୍ଜବୀ କୃଷକ। ପଞ୍ଜାବର ହଜାର ହଜାର ଚାଷୀ ଗୁରୁବାର ‘ଦିଲ୍ଲୀ ଚଲୋ’ ଶୋଭାଯାତ୍ରାରେ ସାମିଲ ହୋଇ ଟ୍ରାକ୍ଟରରେ ନୂଆଦିଲ୍ଲୀ ଯାଉଥିବାବେଳେ ହରିୟାଣାରେ ସେମାନଙ୍କୁ ରୋକାଯାଇଛି। ପଞ୍ଜାବ-ହରିୟାଣା ସୀମାରେ ପୋଲିସ କୃଷକମାନଙ୍କୁ ଅଟକାଇବା ପାଇଁ ବ୍ୟାରିକେଡ୍ କରିଥିବାବେଳେ ସେମାନେ ତାକୁ ହଟାଇ ଘାଗର ନଦୀକୁ ଫିଙ୍ଗି ଦେଇଛନ୍ତି। ଫଳରେ ପୋଲିସ କୃଷକଙ୍କୁ ଘଉଡ଼ାଇବା ପାଇଁ ଓ୍ବାଟର କ୍ୟାନନ ଯୋଗେ ପାଣିବର୍ଷା ଓ ଲୁହବୁହା ବାଷ୍ପ ପ୍ରୟୋଗ କରିଛି। କେତେକ ସ୍ଥାନରେ ପୋଲିସ ବଳ ପ୍ରୟୋଗ କରିବାର କୃଷକଙ୍କ ସହ ମୁହଁାମୁହିଁ ସ୍ଥିତି ସୃଷ୍ଟି ହୋଇଛି। ଏହାକୁ ନେଇ ଶୀତରେ ରାଜନୈତିକ ତାପମାତ୍ରା ବୃଦ୍ଧି ପାଇଛି।
କେନ୍ଦ୍ର ସରକାର ଗତ ସେପ୍ଟେମ୍ବରରେ ପାର୍ଲାମେଣ୍ଟରେ ତିନୋଟି କୃଷି ବିଲ୍ ଆଗତ କରିଥିଲେ। କୃଷିଜାତ ସାମଗ୍ରୀର ବିକ୍ରି, ମୂଲ୍ୟ ଓ ସଂରକ୍ଷଣ ସମ୍ପର୍କିତ ଏହି ୩ ବିଲ୍ ଉଭୟ ସଦନରେ ଗୃହୀତ ହେବା ପରେ ସେହି ମାସ ୨୭ ତାରିଖରେ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅନୁମୋଦନ ସହ ଆଇନରେ ପରିଣତ ହେଲା। ନୂଆ ଆଇନ କୃଷକଙ୍କୁ ଉତ୍ପାଦିତ ଶସ୍ୟକୁ ଖୋଲା ବଜାରରେ ବିକ୍ରି ପାଇଁ ସ୍ବାଧୀନତା ଦେବ ବୋଲି ସରକାର ଦାବି କରୁଛନ୍ତି। ଅନ୍ୟପକ୍ଷେ ଏହି ଆଇନ ସର୍ବନିମ୍ନ ସହାୟକ ମୂଲ୍ୟ (ଏମ୍ଏସ୍ପି) ବ୍ୟବସ୍ଥାକୁ ଦୁର୍ବଳ କରିବ ଓ ସେମାନେ ଘରୋଇ ପକ୍ଷ ବା ବଡ଼ ବ୍ୟବସାୟୀଙ୍କ ଦୟାରେ ଚଳିବାକୁ ବାଧ୍ୟ ହେବେ ବୋଲି ଚାଷୀମାନେ ଏହାକୁ ବିରୋଧ କରୁଛନ୍ତି। ଇତିମଧ୍ୟରେ ଦୁଇମାସର ବିରୋଧ ଭିତରେ ପଞ୍ଜାବର ୧୩ କୃଷକଙ୍କ ମୃତ୍ୟୁ ଘଟିଲାଣି। ୟୁନାଇଟେଡ୍ ଫାର୍ମର୍ସ ଫ୍ରଣ୍ଟ ବ୍ୟାନରରେ ୩୩ କୃଷକ ସଙ୍ଗଠନ ଏକାଠି ହୋଇ ନଭେମ୍ବର ୨୬ ଓ ୨୭ରେ ‘ଦିଲ୍ଲୀ ଚଲୋ’ ଡାକରା ଦେଇଛନ୍ତି। ସେଗୁଡ଼ିକ ମଧ୍ୟରୁ ୧୩ କୃଷକ ଟ୍ରେଡ୍ ୟୁନିୟନ୍ ପ୍ରତ୍ୟକ୍ଷ ବା ପରୋକ୍ଷ ଭାବେ କମ୍ୟୁନିଷ୍ଟ ପାର୍ଟି ସହ ଜଡ଼ିତ, ଯେଉଁ ଦଳ କି ଭାଜପା ବିରୋଧୀ। ଏହି ଆନ୍ଦୋଳନକୁ ପଞ୍ଜାବର ଶାସକ କଂଗ୍ରେସ ଓ ବିରୋଧୀ ଶିରୋମଣି ଅକାଳୀ ଦଳ (ଏସ୍ଏଡି) ସମର୍ଥନ କରୁଛନ୍ତି।
ଗୁରୁବାର ପଞ୍ଜାବର ହଜାର ହଜାର କୃଷକ ଦିଲ୍ଲୀ ଅଭିମୁଖେ ଯାଉଥିବାବେଳେ ପଞ୍ଜାବ-ହରିୟାଣା ସୀମାର ଅମ୍ବାଲା ନିକଟ ଶମ୍ଭୁଠାରେ ହରିୟାଣା ପୋଲିସ ବ୍ୟାରିକେଡ୍ କରି ରାସ୍ତା ଅବରୋଧ କରିଥିଲା। ଚାଷୀମାନେ ତାକୁ ଭାଙ୍ଗି ବ୍ରିଜ୍ ତଳକୁ ଫିଙ୍ଗିଦେବା ପରେ ପୋଲିସ ସେମାନଙ୍କ ଉପରକୁ ଲୁହବୁହା ବାଷ୍ପ ଓ ପାଣି ପ୍ରୟୋଗ କରିଥିଲା। ଅଲ୍ ଇଣ୍ଡିଆ କିଷାନ ସଭା ଅନୁସାରେ ୫୦ ହଜାରରୁ ଅଧିକ ଚାଷୀ ଶୀତକାକର, ବର୍ଷା ଓ ପବନକୁ ଖାତିର ନ କରି ଏହି ଆନ୍ଦୋଳନରେ ସାମିଲ ହୋଇଛନ୍ତି। ସେମାନଙ୍କ ମଧ୍ୟରୁ ଅଧିକାଂଶ ବରିଷ୍ଠ ନାଗରିକ ଓ ମହିଳା ଟ୍ରାକ୍କର ଟ୍ରଲିରେ ଯାଉଥିବାବେଳେ କଲେଜ ଛାତ୍ରୀଛାତ୍ର କାର୍, ବାଇକ୍ରେ ଯାଉଛନ୍ତି। ସେମାନଙ୍କୁ ଘଉଡ଼ାଇବା ପାଇଁ ବ୍ୟାପକ ପୋଲିସ କର୍ମୀ ଓ ରାପିଡ୍ ଆକ୍ସନ ଫୋର୍ସ ଯବାନଙ୍କୁ ମୁତୟନ କରାଯାଇଛି। କେବଳ ଶମ୍ବା ନୁହେଁ, ପଞ୍ଜାବ-ହରିୟାଣା ସୀମାରେ ଥିବା ଅନେକ ସହରରେ ସମାନ ପରିସ୍ଥିତି ଦେଖିବାକୁ ମିଳିଥିଲା। ସାମାବର୍ତ୍ତୀ ଅଞ୍ଚଳରେ ୧୪୪ ଧାରା ଜାରି କରାଯାଇ ସୁରକ୍ଷା ଛାଉଣିରେ ପରିଣତ କରାଯାଇଛି। ଦିଲ୍ଲୀରେ ଉଭୟ ପଞ୍ଜାବ ଓ ହରିୟାଣାର ପ୍ରାୟ ୩ ଲକ୍ଷ ଚାଷୀ ପହଞ୍ଚତ୍ବା ପାଇଁ ଆନ୍ଦୋଳନରେ ସାମିଲ ହୋଇଥିବା ପୋଲିସ ଆକଳନ କରିଛି। ବିକ୍ଷୋଭରତ ଚାଷୀମାନେ ଦିଲ୍ଲୀକୁ ପ୍ରବେଶ କରିବାକୁ ଦିଆ ନ ଗଲେ ଜାତୀୟ ରାଜଧାନୀ ସହ ସଂଯୋଗ କରୁଥିବା ସମସ୍ତ ରାସ୍ତା ବନ୍ଦ କରିଦେବେ ବୋଲି ଧମକ ଦେଇଛନ୍ତି। ବିକ୍ଷୋଭ ଯୋଗୁ ଦିଲ୍ଲୀରୁ ପଡ଼ୋଶୀ ସହରଗୁଡ଼ିକୁ ମେଟ୍ରୋ ସେବାକୁ ବାତିଲ କରିଦିଆଯାଇଛି। ପଞ୍ଜାବ-ହରିୟାଣା ସୀମାକୁ ସିଲ୍ କରାଯାଇ ଯାନବାହନଗୁଡ଼ିକୁ ଯାଞ୍ଚ କରାଯାଉଛି। ଏହାର ପ୍ରତିବାଦରେ ବିକ୍ଷୋଭକାରୀମାନେ କେତେକ ସରକାରୀ ଯାନବାହନ ଜାଳିଦେଇଛନ୍ତି।
