ଭବାନୀପାଟଣା,୫ା୮(ଉତ୍ତମ କୁମାର ଦାଶ):କଳାହାଣ୍ଡି ଜିଲାରେ ଚାଷୀମାନେ କିଭଳି ଧାନ ସହ ଅନ୍ୟାନ୍ୟ ଡାଲିଜାତୀୟ ଶସ୍ୟ ଚାଷ କରିପାରିବେ ସେଥିନିମନ୍ତେ ରାଜ୍ୟ ସରକାରଙ୍କ ପକ୍ଷରୁ ମାଗଣା ବିରି ଓ ହରଡ ଡାଲି ବିହନ ବଣ୍ଟନ ଆରମ୍ଭ ହୋଇଛି। ଜିଲାର ପ୍ରତ୍ୟେକ ଗ୍ରାମ ପଞ୍ଚାୟତ ସ୍ତରରେ ଏହି ବିହନ ବଣ୍ଟନ ବ୍ୟବସ୍ଥା ରହିଛି । ହେଲେ କେତେକ ଅଞ୍ଚଳରେ ଏଥିରେ ଅନିୟମିତତା ସାମ୍ନାକୁ ଆସିଛି। ଧର୍ମଗଡ ବ୍ଲକ ବ୍ରାହ୍ମଣଛେଣ୍ଡିଆ ପଞ୍ଚାୟତରୁ ଏପରି ସଙ୍ଗିନ ଅଭିଯୋଗ ଆସିଛି। ଏଠାରେ ଚାଷୀମାନେ ମାଗଣା ବିହନ ପାଇବାରୁ ବଞ୍ଚତ୍ତ ହେଉଥିବା ପ୍ରକାଶ କରିଛନ୍ତି। ଏହି ପଞ୍ଚାୟତରେ ମେରଘରା, ବ୍ରାହ୍ମଣଛେଣ୍ଡିଆ, ଚିଲିଚିଲା, ଥନଟ ଭଳି ଗାଁ ରହିଥିବା ବେଳେ କାଁ ଭାଁ ଚାଷୀଙ୍କୁ ଛାଡିଦେଲେ ପ୍ରକୃତ ଚାଷୀଙ୍କ ପାଖରେ ଏହି ସରକାରୀ ବିହନ ପହଞ୍ଚତ୍ ନ ଥିବା ଅଭିଯୋଗ ଆଣିଛନ୍ତି ଚାଷୀ ଶାନ୍ତନୁ ମୁଣ୍ଡ,ରମଣୀ ମୁଣ୍ଡ। ଏହି ପଞ୍ଚାୟତ ଦାୟିତ୍ୱରେ ଥିବା ଭିଏଡବ୍ଲ୍ୟୁ (ଗ୍ରାମ୍ୟ କୃଷି କର୍ମଚାରୀ) ଅବଗତ କରାଇ ନ ଥିବାରୁ ସେମାନେ ଏହି ଯୋଜନାର ଲାଭ ଉଠାଇପାରୁ ନ ଥିବା ପ୍ରକାଶ କରିଛନ୍ତି। ଏପରି କି ଗତବର୍ଷ ମଧ୍ୟ ଏହି ସବୁ ମାଗଣା ବିହନ ପାଇ ନ ଥିବା ଚାଷୀ ନୟନ ବାଗ, ଶଙ୍ଖନାଦ ବାଗ ପ୍ରକାଶ କରିଛନ୍ତି।
କଳାହାଣ୍ଡି ଜିଲାରେ ଚଳିତ ଥର ବିରି ଡାଲି ବିହନ ୧୯ ହଜାର ପ୍ୟାକେଟ ଓ ହରଡ ଡାଲି ବିହନ ୧୦ ହଜାର ପ୍ୟାକେଟ ଆସିଥିବା ଜଣାପଡିଛି। ପ୍ରତ୍ୟେକ ବିହନ କିଟ୍ରେ ଚାରି କିଲୋ ଲେଖାଏ ରହିଥିବା ଜଣାପଡିଛି। ଅଣ ଜଳସେଚିତ ଅଞ୍ଚଳ ତଥା ଆଁଟ ଜମିରେ ଚାଷୀମାନେ ଏହି ଚାଷ କରିଥାନ୍ତି। ଆଉ ଚାଷୀମାନଙ୍କ ପାଇଁ ସରକାରଙ୍କ ପକ୍ଷରୁ ଯୋଗାଇ ଦିଆଯାଉଥିବା ଏହି ମାଗଣା ବିହନ ବେଶ ସହାୟକ ହୋଇଥାଏ। ତେବେ ଗ୍ରାମାଞ୍ଚଳରେ ଚାଷୀମାନେ ମାଗଣା ବିହନ ବାବଦରେ ଅବଗତ ନ ଥିବା କୃଷି ବିଭାଗର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଚାଷୀମାନେ କିଭଳି ଯୋଜନାର ଲାଭ ପାଇପାରିବେ ସେ ଉପରେ ପ୍ରୟାସ ଜାରି ରହିଥିବା ବେଳେ ତଳ ସ୍ତରରେ ଥିବା କିଛି ଅସାଧୁ କର୍ମଚାରୀଙ୍କ ପାଇଁ ପ୍ରକୃତ ଚାଷୀ ପାଖରେ ଯୋଜନା ପହଞ୍ଚତ୍ପାରୁନାହିଁ, ଯାହା ବିଡମ୍ବନାର ବିଷୟ ବୋଲି ପ୍ରକାଶ କରିଛନ୍ତି ଜିଲାର କିଛି ବରିଷ୍ଠ ଚାଷୀ ନେତା। ଏହାର ତଦନ୍ତ କରାଯାଇ ସମ୍ପୃକ୍ତ କର୍ମଚାରୀଙ୍କ ଉପରେ କାର୍ଯ୍ୟାନୁଷ୍ଠାନ ନେବାକୁ ଚାଷୀମାନେ ଦାବି କରିଛନ୍ତି। ଏ ସମ୍ପର୍କରେ ଧର୍ମଗଡ଼ କୃଷି ଜିଲା ଅଧିକାରୀ ସଞ୍ଜୟ କୁମାର ପାତ୍ରଙ୍କୁ ପଚାରିବାରୁ ଚାଷୀମାନେ ମାଗଣା ବିହନ ପାଇ ନ ଥିବା ଘଟଣାକୁ ସ୍ବୀକାର କରିବା ସହ ଯେଉଁମାନେ ଚଳିତଥର ବଞ୍ଚତ୍ତ ଅଛନ୍ତି ଆର ଥରକୁ ପାଇବେ ବୋଲି ପ୍ରକାଶ କରିଛନ୍ତି।
