ରିଆମାଳ,୪ା୬(ବଦ୍ରୀ ନାରାୟଣ ଅଗ୍ରଓ୍ବାଲ): ରିଆମାଳ ବନାଞ୍ଚଳ କୁଣ୍ଢେଇଗୋଳା ଫରେଷ୍ଟ ସେକ୍ସନ ଅନ୍ତର୍ଗତ ଚଢେଇମରା ଗ୍ରାମ ଜଙ୍ଗଲରୁ ଗୁରୁବାର ଜଣେ ବ୍ୟକ୍ତିଙ୍କ କ୍ଷତବିକ୍ଷତ ମୃତଦେହ ଜବତ ହୋଇଛି। ମୃତବ୍ୟକ୍ତି ଜଣକ ଚଢେଇମରା ଗ୍ରାମର ଚାଷୀ ପ୍ରଫୁଲ୍ଲ ବେହେରା(୫୫) ବୋଲି ଜଣାପଡ଼ିଛି। ସେହିପରି ପାରିପାର୍ଶ୍ୱିକ ପରିସ୍ଥତିରୁ ହାତୀ ଆକ୍ରମଣରେ ପ୍ରଫୁଲ୍ଲଙ୍କ ମୃତ୍ୟୁ ଘଟିଥିବା ବନ ବିଭାଗ ପକ୍ଷରୁ ସ୍ପଷ୍ଟ କରାଯାଇଛି।
ସୂଚନାନୁଯାୟୀ, ଚଢେଇମରା ଗ୍ରାମର ସ୍ବର୍ଗତଃ କଡୁ ବେହେରାଙ୍କ ପୁଅ ପ୍ରଫୁଲ୍ଲ (୫୫)ବୁଧବାର ଅପରାହ୍ନରେ ନିକଟସ୍ଥ ଜଙ୍ଗଲକୁ ଯାଇଥିବା ବେଳେ ଗୁରୁବାର ଘରକୁ ଫେରି ନ ଥିଲେ। ଫଳରେ ପରିବାର ଲୋକେ ବ୍ୟସ୍ତ ବିବ୍ରତ ହୋଇପଡିବା ସହ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ ମଧ୍ୟ ପ୍ରଫୁଲ୍ଲଙ୍କର ସନ୍ଧାନ ମିଳିନଥିଲା।
ଅନ୍ୟପକ୍ଷରେ କିଛିଦିନ ହେଲା ନିକଟସ୍ଥ ଚଢେଇମରା ଜଙ୍ଗଲରେ ବହୁ ସଂଖ୍ୟକ ହାତୀ ବିଚରଣ କରୁଥିବାରୁ କୌଣସି ଅଘଟଣ ଘଟିଥିବା ଆଶଙ୍କା କରିବା ସହ ଏନେଇ ଗ୍ରାମବାସୀ ଓ ବନ ବିଭାଗର ସହାୟତା ଲୋଡ଼ିଥିଲେ। ଗୁରୁବାର ବନ ବିଭାଗ କର୍ମଚାରୀ ଓ ଗ୍ରାମବାସୀ ମିଳିତ ଭାବେ ଉକ୍ତ ଜଙ୍ଗଲ ମଧ୍ୟରେ ଖୋଜାଖୋଜି କରିବାରୁ ସେଠାରେ ପ୍ରଫୁଲ୍ଲଙ୍କର କ୍ଷତବିକ୍ଷତ ମୃତଦେହ ପଡ଼ିଥିବା ଦେଖିବାକୁ ମିଳିଥିଲା। କୁଣ୍ଢେଇଗୋଳା ଫରେଷ୍ଟର ମନ୍ମଥ ବେହେରା ଓ ଅନ୍ୟ ବନ କର୍ମଚାରୀ ଘଟଣାସ୍ଥଳରୁ ପ୍ରଫୁଲ୍ଲଙ୍କ ମୃତଦେହ ଉଦ୍ଧାର କରିବା ସହ ବ୍ୟବଚ୍ଛେଦ ପାଇଁ ପ୍ରକ୍ରିୟା ଆରମ୍ଭ କରିଥିବା ଜଣାପଡ଼ିଛି। ପ୍ରଫୁଲ୍ଲଙ୍କ ମୃତ୍ୟୁ ଖବର ପ୍ରଚାରିତ ହେବା ପରେ ସେଠାରେ ଅଞ୍ଚଳର ଶତାଧିକ ଜନସାଧାରଣ ପହଞ୍ଚିଥିଲେ। ଫଳରେ ଚାପା ଉତ୍ତେଜନା ପ୍ରକାଶ ପାଇଥିଲା।
