ଧାନଚାଷରେ ଗୁଣ୍ଡିପୋକ, ଚିନ୍ତାରେ ଚାଷୀ
10:15 amOctober 13, 2023October 13, 2023 / 05

ଉମରକୋଟ,୧୩।୧୦(ସନ୍ତୋଷ ଶତପଥୀ): ପ୍ରଥମେ ସ୍ବଳ୍ପ ବର୍ଷା ଯୋଗୁ ଧାନ ଗଛ ଯେଉଁ ଭାବେ ବଢ଼ିବା କଥା ତାହା ହୋଇପାରିଲା ନାହିଁ। ଧାନ ଅମଳ କମିବା ଆଶଙ୍କା ଥିବାବେଳେ ବର୍ତ୍ତମାନ ବିପିଏଚ୍‌ ଗୁଣ୍ଡିପୋକ ଧାନ ଫସଲରେ ଲାଗିଲାଣି। ଏଥିଯୋଗୁ ଉମରକୋଟ ପୌରାଞ୍ଚଳ ୧ନମ୍ବର ୱାର୍ଡ ଦର୍ଗାଗୁଡା ଗ୍ରାମର ଧାନଚାଷୀ ଏବେ ଚିନ୍ତାରେ। ଚାଷୀ ବରୁଣ ଘୋଷ, ପ୍ରମୋଦ ସ୍ବାଇଁ, ଆପନା ସେଠୀ, ରଞ୍ଜନ ସେଠୀ, ନୀର ସେଠୀ, ଭାଗୀ ସେଠୀ, ଶରତ ଭୂୟାଁଙ୍କ ଧାନ ଜମି ବ୍ୟତୀତ ଆଖପାଖ ଶହ ଶହ ଏକର ଧାନଜମିରେ ଗୁଣ୍ଡିପୋକ ଲାଗିଥିବା ଦେଖିବାକୁ ମିଳିଛି।
ସୂଚନା ଅନୁଯାୟୀ ଧାନ ହେବା ସମୟରେ ଧାନକେଣ୍ଡାରୁ ଧାନ କ୍ଷୀର କମିଯାଏ। ଏହି ପୋକ ଧାନ ଗଛ ମୂଳରେ ରହି ସମସ୍ତ ରସକୁ ଶୋଷି ନେଇଥାନ୍ତି। ଫଳରେ ଗଛ ଦୁର୍ବଳ ହୋଇଯାଏ। ଗଛ ମୂଳରୁ ଧୀରେଧୀରେ ପଚିଶଢ଼ି ନଷ୍ଟ ହୋଇଯାଏ। ପୂର୍ବରୁ କୃଷି ଅଧିକାରୀମାନେ ଫସଲ ବୁଲି ବୁଲି ନିରୀକ୍ଷଣ କରୁଥିଲେ। କୌଣସି ସମସ୍ୟା ଦେଖାଗଲେ ତୁରନ୍ତ ଚାଷୀଙ୍କୁ ପରାମର୍ଶ ଦେଉଥିଲେ। କିନ୍ତୁ ବର୍ତ୍ତମାନ କୃଷି ବିଭାଗରେ ଏହାର ଅଭାବ ପରିଲକ୍ଷିତ ହେଉଛି। ପୋକ ଲାଗିଲେ ବା ଲାଗିବା ପୂର୍ବରୁ କୌଣସି କୃଷି ଅଧିକାରୀ କେବେ ମଧ୍ୟ ଆସି ସଚେତନ କରୁନାହାନ୍ତି ବୋଲି ଚାଷୀ ଅଭିଯୋଗ କରିଛନ୍ତି। ସରକାର ଚାଷୀଙ୍କୁ ସଚେତନ କରିବାକୁ ଅନେକ ଯୋଜନା କରୁଛନ୍ତି। କିନ୍ତୁ ତୃଣମୂଳ ସ୍ତରରେ କାର୍ଯ୍ୟକାରୀ ହେଉ ନ ଥିବା ଚାଷୀମାନେ ଅଭିଯୋଗ କରିଛନ୍ତି। ତେଣୁ ଚାଷୀ ବାଧ୍ୟହୋଇ ଦୋକାନୀଙ୍କ ଉପରେ ଭରସା କରନ୍ତି। ଘଟଣାକୁ ନେଇ ବ୍ଲକ କୃଷି ଅଧିକାରୀ ନୀଳକଣ୍ଠ ପରିଡ଼ାଙ୍କୁ ପଚାରିବାରୁ ପାଣି ଅଭାବରୁ ଏହି ସବୁ ରୋଗ ଦେଖାଯିବ, ମାଟିରେ ଖରା ନ ପଡିଲେ ଏହି ଭଳି ପୋକ ଲାଗିଥାଏ। ସୋମବାର ଏହି ଅଞ୍ଚଳକୁ ଯାଇ କ୍ଷେତ୍ର ପରିଦର୍ଶନ କରିବେ ବୋଲି କହିଛନ୍ତି। କୃଷି ବିଭାଗ ପକ୍ଷରୁ ସଚେତନ କରାଯାଉ ନାହିଁ ବୋଲି ଚାଷୀମାନେ ଯେଉଁ ଅଭିଯୋଗ କରିଛନ୍ତି ତାହାକୁ ସେ ଅସ୍ବୀକାର କରିଥିଲେ।