ମେଲବୋର୍ନ,୨।୧: ଭାରତରେ କ୍ରିକେଟର କ୍ରେଜ ଅଧିକ। ଖେଳ ପ୍ରତି ସମ୍ମାନ ତଥା ଖେଳାଳିଙ୍କ ପ୍ରତି ଥିବା ଭଲପାଇବାକୁ ଭଳିକି ଭଳି ଉପାୟରେ ଦେଖାଇଥାନ୍ତି ପ୍ରଶଂସକ। ସେଭଳି ମହାନ କ୍ରିକେଟର ସଚିନ ତେନ୍ଦୁଲକରଙ୍କ ବଡ଼ ପ୍ରଶଂସକ ସୁଧିର ଗୌତମ ଭାରତୀୟ ଟିମ୍ର ସମସ୍ତ ମ୍ୟାଚ୍ରେ ଉପସ୍ଥିତ ଥାନ୍ତି। ସେ ନିଜ ଶରୀରରେ ତ୍ରିରଙ୍ଗା ଆଙ୍କିବାକୁ ନେଇ ଚର୍ଚ୍ଚାରେ ରହିଆସିଛନ୍ତି। ସଚିନଙ୍କୁ ଭେଟିବାର ସ୍ବପ୍ନ ତାଙ୍କର ମଧ୍ୟ ସାକାର ହୋଇଛି। ଏଭଳି କିିଛି ପ୍ରଶଂସକ ପସନ୍ଦର କ୍ରିକେଟରଙ୍କୁ ଭେଟିବାର ସୁଯୋଗ ପାଇଥିବା ବେଳେ କିଛି ଦୂରରୁ ଦେଖି ସନ୍ତୁଷ୍ଟ ହୋଇଥାନ୍ତି।
ଏବେ ଜଣେ ଭାଗ୍ୟଶାଳୀ ପ୍ରଶଂସକଙ୍କୁ ଭାରତୀୟ କ୍ରିକେଟ ଟିମ୍ର ସଦସ୍ୟଙ୍କ ପାଖରେ ବସିବାର ସୁଯୋଗ ମିଳିଛି। ମେଲବୋର୍ନରେ ଅପରାହ୍ନ ଭୋଜନ କରିବାକୁ ଯାଇଥିଲେ ଖେଳାଳିମାନେ। ଏହି ସମୟରେ ପ୍ରଶଂସକ ନବଲଦୀପ ସିଂହ ସେମାନଙ୍କ ବିଲ୍ ମଧ୍ୟ ପୈଠ କରିଛନ୍ତି।
ରୋହିତ ଶର୍ମା, ରିଷଭ ପନ୍ଥ, ପୃଥ୍ବୀ ଶ, ନବଦୀପ , ଶୁଭମନ ଗିଲ ପ୍ରମୁଖ ଲଞ୍ଚ କରିବାକୁ ହୋଟେଲକୁ ଯାଇଥିଲେ। ସେମାନେ ଖାଇବା ମଗାଇଥିଲେ। ହେଲେ ନବଲଦୀପ ଖେଳାଳିଙ୍କୁ ନ ଜଣାଇ ସେମାନଙ୍କ ବିଲ୍ ଦେଇଥିଲେ। ଏପରିକି ସେମାନଙ୍କୁ ଅଧିକ ଖାଦ୍ୟ ପରସିବା ପାଇଁ ହୋଟେଲ କର୍ମଚାରୀଙ୍କୁ କହିଥିଲେ। ଖାଇସାରିବା ପରେ ଏ ନେଇ ଖେଳାଳିମାନେ ଜାଣିବାକୁ ପାଇଥିଲେ। ପରେ ରୋହିତ ନବଲଦୀପଙ୍କ ପାଖକୁ ଯାଇ ପଇସା ନିଅନ୍ତୁ ଭାଇ ବୋଲି କହିଥିଲେ। ଏହାର ଜବାବରେ ନବଲଜୀତ ନା, ଏହା ମୋ ପାଇଁ ସୌଭାଗ୍ୟ ବୋଲି କହିଥିଲେ। ଶେଷରେ ପନ୍ଥ ଏବଂ ରୋହିତ ତାଙ୍କୁ କୁଣ୍ଢାଇ ପକାଇଥିଲେ। ଏହି ସମୟର କିଛି ଭିଡିଓ ଏବଂ ୬୬୮୩ ଟଙ୍କାର ବିଲ୍ର ଫଟୋ ଆଦିକୁ ନବଲଦୀପ ସୋସିଆଲ ମିଡିଆରେ ଶେୟାର କରିଛନ୍ତି। ପ୍ରଶଂସକ ଭାବେ ନିଜ ପସନ୍ଦର କ୍ରିକେଟରଙ୍କ ପାଇଁ ଏତିକି କରି ତାଙ୍କୁ ଖୁସି ମିଳିଛି ବୋଲି ସେ କହିଛନ୍ତି।
