ସୋରଡ଼ା,୧୧।୨(ଡି.ଏନ୍.ଏ.): ଖ୍ରୀଷ୍ଟ ଧର୍ମାବଲମ୍ବୀଙ୍କ ପ୍ରସିଦ୍ଧ ଲୁର୍ଦୁ ମେରି ପର୍ବ ଅସୁରବନ୍ଧ ପଞ୍ଚାୟତର ଦନ୍ତଲିଙ୍ଗି ଗ୍ରାମରେ ଶୁଭାରମ୍ଭ ହୋଇଯାଇଛି। ମିଶନ ଧର୍ମ ସଂଘର ପ୍ରୋଭିନସିଆଲ ଫାଦର ମ୍ୟାଥୁ ନାୟକ, ଧର୍ମାଞ୍ଚଳ ଫାଦର କବିରାଜ ବସ୍ତରାୟ, ଫାଦର ଶଶିକାନ୍ତ ମାଳୀଙ୍କ ତତ୍ତ୍ୱାବଧାନରେ ଆୟୋଜିତ ଏହି ପର୍ବରେ ଶନିବାରଠାରୁ ଭିଡ଼ ଆରମ୍ଭ ହୋଇଛି। ରାଜ୍ୟର ବିଭିନ୍ନ ଅଞ୍ଚଳରୁ ଧର୍ମୀୟ ଯାଜକ ପହଞ୍ଚିଛନ୍ତି। ଏପରିକି ଗଞ୍ଜାମ, ଗଜପତି, କନ୍ଧମାଳ ତଥା ରାଜ୍ୟର ବିଭିନ୍ନ ପ୍ରାନ୍ତରୁ ଶ୍ରଦ୍ଧାଳୁ ପହଞ୍ଚିବା ଆରମ୍ଭ କରିଛନ୍ତି । ୨ ତାରିଖରୁ ନବାହ୍ନ ଉପାସନା ଆରମ୍ଭ ହୋଇଥିବା ବେଳେ ୯ ତାରିଖରୁ ୧୧ ତାରିଖ ୩ ଦିନ ପ୍ରବଳ ସମାଗମ ହେବାର ସମ୍ଭାବନା ରହିଛି। ଏପରିକି ସକାଳୁ ରାତି ପର୍ଯ୍ୟନ୍ତ ଉପାସନା, ଶାନ୍ତିବାର୍ତ୍ତା ପ୍ରଦାନ, ବିଶ୍ୱଶାନ୍ତି ପ୍ରାର୍ଥନା, ସାମୂହିକ ସଙ୍ଗୀତ, ସାଂସ୍କୃତିକ ନୃତ୍ୟ ଶୋଭାଯାତ୍ରା ଆଦି କାର୍ଯ୍ୟକ୍ରମ ରହିଛି।
ନ’ ଅଙ୍କ ଦୁର୍ଭିକ୍ଷ ସମୟରେ ଜନସାଧାରଣ ଉପବାସରେ ଛଟପଟ ହେଉଥିବା ବେଳେ ଏଠାକାର ପାହାଡରେ ଲୁର୍ଦୁମାତା ଆବିର୍ଭାବ ହୋଇ ଜଗତର କଲ୍ୟାଣ ପାଇଁ ପ୍ରାର୍ଥନା କରିଥିବା କିମ୍ବଦନ୍ତୀ ରହିଛି। ସେହିଦିନଠାରୁ ପ୍ରତିବର୍ଷ ଏଠାରେ ଫେବୃୟାରୀ ମାସ ଏହିଦିନରେ ପର୍ବ ପାଳନ କରାଯାଉଛି । ଯାତ୍ରାରେ ଲକ୍ଷାଧିକ ଭକ୍ତଙ୍କ ସମାଗମ ହେଉଥିବା ବେଳେ ଏଥିରେ ସବୁଧର୍ମର ବ୍ୟକ୍ତି ଯୋଗଦେବାର ପରମ୍ପରା ରହିଆସିଛି । ଶାନ୍ତି ଶୃଙ୍ଖଳାକୁ ଦୃଷ୍ଟିରେ ରଖି ଆଇଆଇସି ରମେଶ କୁମାର ପ୍ରଧାନ, ଏସ୍ଆଇ ସୁନୀଲ କଣ୍ଡୋଗୋରୀଙ୍କ ନେତୃତ୍ୱରେ ପୋଲିସ ୨୪ ଘଣ୍ଟିଆ ପଇଁତରା ମାରୁଛି। ସମସ୍ତଙ୍କ ସହଯୋଗରେ ଯାତ୍ରା ହେଉଥିବା ଜନ୍ ବାପ୍ଟିଷ୍ଟ ବେହେରା କହିଛନ୍ତି ।
